‘इण्डिया बुक् आफ् रिकार्ड्स्’ इत्यस्मिन् अभिलेखे नाम अङ्कितम्, अल्पवयसि असाधारणस्मरणशक्तेः प्रदर्शनम्

सूरतम्, ०८ सितम्बरमासः(हि.स.)। गुजरातस्य सूरतनगरनिवासी नीरव कतारिया ५ वर्षाणि ११ मासाश्च वयस्कः अस्ति। सः स्वस्य असाधारणस्मरणशक्तेः बलेन गुजरातस्य नाम गौरवान्वितं कृतवान् अस्ति। नीरवः केवलं १ निमेषे ३१ क्षणेषु गुजरातस्य समस्तानाम् आरटीओ-स्थानानां सङ्केताङ्कान् द्रुतगत्या उच्चार्य राष्ट्रियस्तरे स्वप्रतिभां प्रमाणितवान्। तस्य एषा उपलब्धिः ‘इण्डिया बुक् आफ् रिकार्ड्स्’ इत्यस्मिन् अभिलेखे अङ्किता अस्ति।

नीरवस्य अस्याः उपलब्धेः पृष्ठभूमौ तस्य जिज्ञासुप्रवृत्तिः निरन्तरं प्रश्नान् प्रष्टुं च अभिरुचिः महत्त्वपूर्णा आसीत्। एकदा परिवारेण सह यात्रायाः समये सः मार्गे गच्छतां विभिन्नवाहनानां सङ्ख्यापट्टिकासु लिखितान् आरटीओ-सङ्केताङ्कान् दृष्टवान्। सः पितरौ अपृच्छत् यत् तेषां वाहने ‘जीजे-५’ इति लिखितम् अस्ति, परन्तु अग्रे गच्छति वाहने ‘एमएच’ इति किमर्थं लिखितम् अस्ति? अयं लघुः प्रश्नः तस्य अधिकाधिकं ज्ञानं प्राप्तुं रुचिं वर्धितवान्।

२० दिवसानां सज्जता

नीरवस्य माता कृणाली कतारिया इत्यस्याः अनुसारं नीरवस्य जिज्ञासा प्रश्नान् प्रष्टुं च प्रवृत्तिः अत्यधिका अस्ति। प्रायः २० दिवसेषु सः गुजरातस्य समस्तान् आरटीओ-सङ्केताङ्कान् कण्ठस्थीकृतवान्। ततः परिवारजनाः अमन्यन्त यत् तस्याः प्रतिभायाः प्रोत्साहनं करणीयम्। अतः ते ‘इण्डिया बुक् आफ् रिकार्ड्स्’ इत्यस्मिन् अभिलेखे स्थानप्राप्त्यर्थं प्रयासं कर्तुं निर्णयं कृतवन्तः।

‘इण्डिया बुक् आफ् रिकार्ड्स्’ इत्यस्मिन् ‘फास्टेस्ट् किड् टु रिकाल् आल् गुजरात् आरटीओ लोकेशन्स्’ इति कीर्तिमानं प्राप्य नीरवः प्रमाणितवान् यत् समुचिता दिशा प्रोत्साहनं च लभ्येत चेत् अल्पवयसि अपि बालकाः महतीः उपलब्धीः प्राप्तुं शक्नुवन्ति। नीरवस्य एषा उपलब्धिः तस्य परिवारस्य कृते एव न, अपितु सूरतनगरस्य समग्रगुजरातस्य च कृते गौरवस्य क्षणः अस्ति। तस्य प्रतिभा अन्येषां बालकानाम् अभिभावकानां च कृते अपि प्रेरणास्रोतः जायमाना अस्ति।

---

Hindusthan Samachar / Dheeraj Maithani