Enter your Email Address to subscribe to our newsletters
नवदिल्ली, ०८ सेप्टेम्बरमासः (हि.स.)। प्रधानमन्त्री नरेन्द्रमोदी अद्य गुजरात-महाराष्ट्रयोः प्रवासं करिष्यति। अस्मिन् अवसरे सः गुजरातस्य वडोदरानगरे ३५ सहस्रकोटिरूप्यकाणाम् अधिकमूल्यानां विकासपरियोजनानां शिलान्यासम् उद्घाटनं च करिष्यति। ततः मुम्बईनगरे ग्लोबल् फिनटेक फेस्ट २०२६ इत्यस्य उद्घाटनं कृत्वा सभां सम्बोधयिष्यति।
प्रधानमन्त्रिकार्यालयस्य अनुसारं प्रधानमन्त्री नरेन्द्रमोदी ८ सेप्टेम्बरमासे मध्याह्ने प्रायः १२ वादने वडोदरानगरे विविधासां विकासपरियोजनानां शिलान्यासम् उद्घाटनं राष्ट्राय समर्पणं च करिष्यति। तासु पश्चिमसमर्पित-मालगलियारा इत्यस्य त्रयाणां महत्त्वपूर्णखण्डानां राष्ट्राय समर्पणं प्रमुखम् अस्ति। एतेषां ३२६ किलोमीटर्-दीर्घखण्डानां निर्माणे २०,७०० कोटिरूप्यकाणाम् अधिका राशिः व्ययिता अस्ति। तेषु साणन्द-उत्तर-मकरपुरा, न्यू-उमरगाम-न्यू-सफाले तथा न्यू-सफाले-जेएनपीटी इति खण्डाः सम्मिलिताः सन्ति।
एतेषां खण्डानां प्रारम्भेन समर्पितमाल-गलियाराजालं स्वस्य सम्पूर्णदीर्घतायां सञ्चालनाय सज्जं भविष्यति। जेएनपीए-तः प्रत्यक्षरेल-सम्पर्केन आयात-निर्यातवस्तूनां शीघ्रतरं परिवहनं सम्भवं भविष्यति। अनेन औद्योगिककेन्द्राणां पत्तनानां च मध्ये सम्पर्कः सुदृढः भवितुं, रसदव्ययः न्यूनीभवितुं तथा मुम्बईनगरस्य रेलजाले भारः न्यूनीभवितुं च अपेक्षा अस्ति।
प्रधानमन्त्री मोदी न्यू-साणन्द-उत्तर, न्यू-मकरपुरा, न्यू-उमरगाम तथा न्यू-जेएनपीटी-मुम्बई इत्येतेभ्यः स्थानेभ्यः मालवाहकरेलसेवानां प्रारम्भाय हरितध्वजं प्रदर्शयिष्यति। तदतिरिक्तं वडोदरातः टाण्डारोड्-पर्यन्तं नूतनरेलसेवामपि प्रारभयिष्यति, येन वडोदरा, छोटाउदयपुरम्, अलीराजपुरम् इत्येतेषां जनपदानां जनाः लाभान्विताः भविष्यन्ति।
सः छोटाउदयपुर-धार-परियोजनायाः अन्तर्गतं निर्मितां जोबाट-टाण्डारोड्-नूतनरेलरेखामपि राष्ट्राय समर्पयिष्यति। एषा रेलरेखा अलीराजपुरस्य दूरस्थेषु आदिवासीक्षेत्रेषु राष्ट्रीयरेलजालेन सह सम्पर्कं स्थापयिष्यति।
प्रधानमन्त्री मोदी ३२९ किलोमीटर्-दीर्घतायाः तथा ९,७०० कोटिरूप्यकाणाम् अधिकव्यययुक्तानां त्रयाणां रेलपरि-योजनानां शिलान्यासं करिष्यति। तासु वडोदरा-रतलाम् तृतीय-चतुर्थरेल-रेखायोजनाः, मियागाम-करजन्-चोरन्दा-मलसार-आमानपरिवर्तन-परियोजना तथा विश्वामित्री-डभोई-द्विकरणपरियोजना च सम्मिलिताः सन्ति। एताभिः परियोजनाभिः यात्रिवाहनस्य माल-वाहनस्य च क्षमता वर्धयितुं, रेलमार्गेषु सम्मर्दः न्यूनीकर्तुं तथा गुजरात-मध्यप्रदेशयोः मध्ये सम्पर्कं सुदृढं कर्तुं च साहाय्यं भविष्यति।
सः प्रायः १,७८० कोटिरूप्यकाणां व्यययुक्तानां त्रयाणां राष्ट्रिय-राजमार्ग-परियोजनानां शिलान्यासं करिष्यति। तासु एनएच-४८ इत्यस्य कामरेज-चलथानखण्डस्य षड्भिः पङ्क्तिभिः निर्माणम्, वडोदरा-सूरतखण्डे तापी-नर्मदानद्योः उपरि प्रमुखसेतुभिः सह अतिरिक्तसंरचनानां निर्माणं तथा एनएच-५३ इत्यस्य अभावा, मिण्ढोला, खजोड्-चतुष्पथेषु स्तरविभक्तसंरचनानां निर्माणं च सम्मिलितम् अस्ति।
तदतिरिक्तं प्रधानमन्त्री एनएच-४८ इत्यस्य वडोदरा-सूरतखण्डे मार्गसुरक्षां वर्धयितुं तथा दुर्घटनाप्रवणस्थानानां समस्यां निवारयितुं कण्डारी-चतुष्पथे लुवारा-पाटियायां च षड्पङ्क्तियुक्तयोः उड्डयन-सेतू इत्यनयोः उद्घाटनं करिष्यति।
प्रधानमन्त्री गुजरातसर्वकारस्य प्रायः २,६०० कोटिरूप्यकाणां विविध-परियोजनानां शिलान्यासम् उद्घाटनं च करिष्यति। तासु वडोदरा-नगरीय-विकासप्राधिकरणस्य रिङ्गरोड्-द्वितीय-चरणम्, कडाणा-बन्धे ११० मेगावाट्-क्षमतालब्धा तैरन्तीसौरऊर्जापरियोजना तथा वडोदरा-नगरपालिकायाः नूतन-कार्यालयभवनं च सम्मिलितानि सन्ति। प्रधानमन्त्रिणः आवासयोजनायाः अन्तर्गतं आवासपरियोजनानां तथा पूर्ववडोदरायाः ११ ग्रामाणां कृते जलापूर्तिपरियोजनायाः अपि उद्घाटनं भविष्यति।
सः सायं प्रायः ५:४५ वादने मुम्बईनगरे ग्लोबल् फिनटेक् फेस्ट् (जीएफएफ) २०२६ इत्यस्य उद्घाटनं कृत्वा सभां सम्बोधयिष्यति। विश्वस्य प्रमुखेषु प्रभावशालिषु च वार्षिक-वित्तप्रौद्योगिकी-सम्मेलनेषु गण्यमानस्य जीएफएफ-स्य सप्तमं संस्करणं ८ सेप्टेम्बरमासात् ११ सेप्टेम्बरमासपर्यन्तं मुम्बईनगरे आयोज्य-मानम् अस्ति।
२०२० तमवर्षात् जीएफएफ नीतिनिर्मातॄन्, नियामकान्, केन्द्रीयबङ्कान्, वित्तीय-संस्थानानि, फिनटेक्-निर्माणी, प्रौद्योगिकी-निर्माणी, निवेशकान् तथा शिक्षाविदः इत्यादीन् वैश्विकहितधारकान् एकस्मिन् मञ्चे आनयन् अन्ताराष्ट्रिय-विचारविमर्शमञ्चः अभवत्।
अस्य वर्षस्य सम्मेलनस्य विषयः “प्रभावं प्रति सम्भावना—एजेण्टिक् एआई, टोकनीकरणं, क्वाण्टम्समावेशीवित्ताय विश्वसनीयाः, परस्परसम्बद्धाः वैश्विक-व्यवस्थाः” इति अस्ति। सम्मेलने एजेण्टिक्-कृत्रिमबुद्धिः, प्रोग्रामेबल्-वित्तम्, टोकनीकरणं तथा क्वाण्टम्-प्रौद्योगिकी इत्यादीनां उदयमान-प्रौद्योगिकीनां माध्यमेन विश्वस्तरे विश्वसनीया, समावेशिनी, प्रभावशालिनी च वित्तीयव्यवस्था कथं विकसितुं शक्यते इति विषये चर्चा भविष्यति।
Hindusthan Samachar / Divya Ranjan