Enter your Email Address to subscribe to our newsletters
गुवाहाटी, 15 दिसम्बरमासः (हि.स.)। असमराज्यपरिवहननिगमस्य (एएसटीसी) गुवाहाटीनगरे रूपनगर-स्थितस्य नव-निर्मितस्य मुख्यालयस्य सोमवासरे औपचारिकम् उद्घाटनम् असम-सर्वकारस्य परिवहनमन्त्री श्रीचरणबोडो-महोदयेन कृतम्। अस्मिन् अवसरे आयोजिते कार्यक्रमे सम्बोधनं कुर्वन् मन्त्री महोदयः अवदत् यत् चत्वारिंशदधिक-वर्षाणां अनन्तरं अद्य असमराज्यपरिवहननिगमाय नूतनं स्थायीं पत्तनं प्राप्तम् अस्ति, यत् निगमस्य कृते महत्त्वपूर्णा उपलब्धिः अस्ति।
परिवहनमन्त्री अवदत् यत् वर्तमानकाले असमराज्यपरिवहननिगमस्य स्थितिः स्थिरा सुदृढा च अभवत्। मुख्यमन्त्री डॉ. हिमन्तबिस्वशर्मणः नेतृत्वे राज्यस्य परिवहनक्षेत्रे ये विकासकार्याणि सम्पन्नानि, तेषु एएसटीसी-निगमस्य महत्त्वपूर्णा भूमिका अस्ति। पल्टन-विपण्यशालातः स्थानान्तरणं कृत्वा रूपनगरे स्थायी-मुख्यालयस्य स्थापनया निगमस्य पुनर्जीवनं सुलभं भविष्यति इति तेन उक्तम्। अपि च, जालुकबाड़ी-स्थाने निगमाय प्राप्तायां विंशति-बीघा-भूमौ अत्याधुनिक-अन्तर्राज्यीय-बस-टर्मिनलस्य (आईएसबीटी) निर्माणं कृत्वा परिवहनव्यवस्थाम् अधिकं सुगमं कर्तुं प्रयासः करिष्यते इति अपि अवदत्।
कार्यक्रमे असमराज्यपरिवहननिगमस्य अध्यक्षः श्रीपल्लवलोचनदास-महोदयः एतत् परिवर्तनदिशायां महत्त्वपूर्णां पहलम् इति वर्णयामास। सः अवदत् यत् पूर्वोत्तररेलवेण सह सम्पन्ने परामर्श-ज्ञापने हस्ताक्षरानन्तरं पल्टनबाजार-स्थितस्य पुरातन-कार्यालयस्य स्थाने रूपनगरे नूतनं मुख्यालयं स्थापितम् अस्ति, तथा च जालुकबाड़ी-स्थाने निगमाय 20 बीघा-भूमिः अपि प्राप्ता अस्ति।
अस्मिन् अवसरे असमराज्यपरिवहननिगमस्य प्रबन्ध-निर्देशकः श्रीचिन्मयप्रकाशफूकन-महोदयः स्वागत-भाषणम् अकरोत्। कार्यक्रमे निगमस्य उपाध्यक्षः श्रीप्रणवज्योतिलहकरः, आयुक्त-सचिवः श्रीआकाशदीपः, परिवहनविभागस्य आयुक्त-सचिवः श्रीमानवेन्द्रप्रतापसिंहः, संयुक्त-आरक्षक-आयुक्तः श्रीअंकुरजैनः तथा अन्ये बहवः गणमान्याः व्यक्तयः उपस्थिताः आसन्।
हिन्दुस्थान समाचार / अंशु गुप्ता