मंडी, 21 दिसंबरमासः (हि.स.)।

भारतीयसांस्कृतिकनिधिना मण्डीनगरे ताः विशिष्टाः विभूतयः सम्मानिताः ये कला नाट्यलेखनक्षेत्रेषु उल्लेखनीयकार्यं कृतवन्तः। रविवासरे राजमहलनामके पथिकाश्रये सम्पन्ने अस्मिन् सम्मानसमारोहे मण्डीजनपदस्य उपायुक्तः अपूर्वदेवगनः ताः विभूतयः स्मृतिचिह्नैः प्रशस्तिपत्रैः अङ्गवस्त्रैः च सम्मानितवान्।

सम्मानितेषु मण्डीकलमसम्बद्धेषु कलमकारेषु पारुलकपूरः प्रवीनरावतः गौरवशर्मा कृतिकाकपूरबिष्टा च सम्मानं प्राप्तवन्तः। लेखनक्षेत्रे दिलीपमोदगिलः इन्दुवैद्यः सत्यमहेशशर्मा च सम्मानिताः।

स्थानीयनृत्यकलाक्षेत्रे सुमनपण्डिता ईशाडोग्रा च सम्मानं प्राप्तवत्यौ। टांकरीलिपेः संरक्षणार्थं पारुलअरोडा तथा मण्डयालीभाषायाः संरक्षणार्थं दीपकुमारः सम्मानितः। नाट्यक्षेत्रे दक्षाउपाध्याया रूपउपाध्यायः च सम्मानितौ।

काव्यक्षेत्रे डॉ मस्तरामसैनी लतेशकुमारशर्मा सुरेन्द्रपालवैद्यः च सम्मानं प्राप्तवन्तः। स्थानीयदेवीदेवतायाः इतिहाससंरक्षणार्थं ताराचन्दपटियालः कपिलचटर्जी च सम्मानितौ।

अस्मिन् अवसरे उपायुक्तः अपूर्वदेवगनः मण्डीक्षेत्रस्य कलानां सततं प्रोत्साहनं कृतवान्। सः अवदत् यत् मण्डीजनपदस्य अन्येषु संस्कृतिसम्बद्धेषु कार्येषु अपि जनसहयोगेन जिला प्रशासनं तानि सर्वाणि कार्याणि विकसितं करिष्यति। कलाकारान् नाट्यकारान् लेखकान् च सः परामर्शं दत्तवान् यत् स्वस्वक्षेत्रेषु विद्यमानानां कलानां प्रवर्धने निरन्तरं स्वकार्यं कुर्वन्तु। अस्य कृते जिला प्रशासनं सर्वप्रकारेण साहाय्यं करिष्यति।

ततः पूर्वं मुख्यातिथेः स्वागतं कुर्वन् संयोजकः नरेशमल्होत्रा अवदत् यत् कलाकाराणां प्रोत्साहने प्रतिभायाः प्रकाशने च इंटेक् संस्था सदैव भूमिकां निर्वहिष्यति। सः अवदत् यत् एतेषां प्रकाराणां सम्मानानां माध्यमेन कलाकाराः स्वशिखरं प्राप्तुं समर्थाः भविष्यन्ति। सः मण्डीजनपदस्य कलासंस्कृतेः अन्यासां धरोहराणां च विकासार्थं सदैव समर्थनं दास्यति इति प्रतिज्ञां कृतवान्। विशेषतया मण्डीकलमविषये सः उक्तवान् यत् जिला प्रशासनं अस्मिन् सम्बन्धे कतिपयाः योजनाः निर्मितवान् अस्ति याः आगामिमासेषु कार्यान्विताः भविष्यन्ति।

समारोहस्य अन्ते सर्वेषां उपस्थितानां कृते धन्यवादं ज्ञापयन् इंटेक संस्थायाः सहसंयोजकः अनिलशर्मा अवदत् यत् इंटेक् संस्था भविष्ये अपि सर्वान् कलमकारान् समर्थयिष्यति तथा समये समये तान् प्रोत्साहयिष्यति।

---------------

हिन्दुस्थान समाचार