Enter your Email Address to subscribe to our newsletters
—जागरूकता अभियाने प्रतिबंधितं चाइनीजमांझासूत्रं प्रति दृढतया प्रतिबंधनीयम्
वाराणसी, 24 दिसंबरमासः (हि.स.)।उत्तरप्रदेशस्य धार्मिकनगरी काशी वाराणसीनगरे बहूनां प्रशासनिकनिषेधानां तथा निरन्तरं प्रवर्तमानानां जनजागरणाभियानानां सत्त्वेऽपि पतङ्गविनोदेषु निषिद्धस्य घातकस्य चाइनीजमाञ्जस्य उपयोगः अद्यापि न विरमति। विशेषतः बालकाः युवानश्च गोप्यरूपेण विक्रियमाणस्य अस्य भयङ्करस्य माञ्जस्य प्रयोगं कुर्वन्ति, यः मानवलोकस्य एव न, अपि तु पशुपक्षिणामपि जीवनाय गम्भीरं संकटं जनयति।
एतत् विषयं केन्द्रीकृत्य बुधवासरे मछोदरीस्थे श्रीस्वामीनारायणमन्दिरे स्थितस्य महन्तस्य सन्तस्वामीप्रेमस्वरूपदासस्य आह्वानेन सामाजिकसंस्थया “सुबह-ए-बनारस-क्लब्” इत्याख्यया जनजागरणाभियानं प्रवर्तितम्। मैदागिनस्थे श्रीहरिश्चन्द्रबालिकामाध्यमिकविद्यालयस्य प्राङ्गणे छात्राभिः संस्थासदस्यैश्च हस्तेषु बैनरपताकाः पतङ्गांश्च धारयित्वा जनान् चाइनीजमाञ्जस्य प्रयोगं न कर्तुम् इति प्रार्थितम्।
अस्मिन् कार्यक्रमे विद्यालयस्य प्रधानाचार्या डॉ. प्रियङ्का तिवारी, नगरस्य निजीचिकित्सालयस्य चिकित्सकः डॉ. अशोककुमाररायः तथा संस्थासदस्यः मुकेशजायसवालः माञ्जस्य वर्धमानोपयोगे गहनां चिन्तां व्यक्तवन्तः।
डॉ. प्रियङ्का तिवारी अवदत् यत् पतङ्गोत्तोलनं अस्माकं संस्कृतेः प्राचीनः आनन्ददायकश्च अंशः आसीत्, किन्तु यदा एषः एव शौकः प्राणघातकः भवति, येन न केवलं मनुष्याः अपि तु निरपराधाः पशुपक्षिणोऽपि प्राणान् त्यजन्ति, तदा तत् गम्भीरापराधस्य वर्गे पतति। सा अवदत् यत् शासनप्रशासनाभ्यां काले काले अस्य विषये कार्यवाही कृता अस्ति, किन्तु समाजस्य सहभागितां विना एषा समस्या न समाप्तुं शक्नोति। सा पतङ्गप्रेमिणः प्रति आह्वानं कृतवती यत् जनहितं मानवतां च मनसि निधाय विदेशीचाइनीजमाञ्जस्य सर्वथा परित्यागं कुर्वन्तु, स्वदेशीयेन सुरक्षितेन माञ्जेन च स्वशौकं पूरयन्तु।
अन्यैः वक्तृभिः अपि उक्तं यत् न्यायालयस्य स्पष्टाज्ञायाः सत्त्वेऽपि निषिद्धः माञ्जः निर्भयतया विक्रीयते, येन वर्षपर्यन्तं मनुष्याणां पशुपक्षिणां च जीवनं संकटग्रस्तं भवति। अद्यावधि अनेकेषु घटनासु निरपराधबालकानां युवानां वृद्धानां च प्राणहानिः अभवत्, घायितानां संख्या तु अगणनीया अस्ति। अतः जनहिताय अस्य विषये कठोरनिषेधस्य अत्यावश्यकता वर्तते।
जनजागरणाभियाने विद्यालयस्य शिक्षिकाः कर्मचारिणः छात्राश्च उत्साहेन सहभागितां कृत्वा समाजं प्रति सुरक्षितपतङ्गविनोदस्य सन्देशं प्रसारितवन्तः।
हिन्दुस्थान समाचार