Enter your Email Address to subscribe to our newsletters
— निःशुल्क-सामग्री-वितरणं च वार्षिकोत्सवस्य आयोजनम् अभवत्।
प्रयागराजः, 26 दिसम्बरमासः (हि.स.)। भारतीयपतितोद्धारसभायाः नवदहल्यां स्थितस्य, संचालनाधीनं बालविद्यानिकेतनम्—लाजपत्-भवन-कल्याणीदेवी, प्रयागराजे—एकं भव्यं कार्यक्रमम् आयोजयत्। अस्मिन् कार्यक्रमे लोकसेवक-मण्डलस्य, नवदेहल्यां स्थितस्य, राष्ट्रियाध्यक्षः राजकुमारः चोपड़ा मुख्यातिथिरूपेण उपस्थितः आसीत्। सः बालानां उज्ज्वलं भविष्यं कामयमानः शिक्षां समाज-विकासस्य आधाररूपेण निरूपितवान्। तेन उक्तं यत् संस्कारशील-शिक्षा-प्रणाली एव देशं विश्वगुरुत्व-पदे स्थापयितुं समर्था भवति।
अस्मिन् अवसरे विद्यालये अध्ययरतानां बालानां कृते निःशुल्कं उष्ण-वस्त्राणि, विद्यालय-स्यूताः, पादत्राणानि, पादकोषाः, लेखन-पुस्तिकाः, पाठ्य-पुस्तकानि, लेखनीकाः इत्यादीनि आवश्यक-लेखन-सामग्रीणि वितरितानि। सामग्री-प्राप्य बालानां मुखानि हर्षेण प्रस्फुटितानि। कार्यक्रमस्य अन्तर्गतं विद्यालयस्य वार्षिकोत्सव-समारोहः अपि हर्षोल्लासेन आचरितः, यस्मिन् बालैः सांस्कृतिक-प्रस्तुतयः प्रदत्ताः, येन उपस्थित-अतिथीनां मनांसि आकृष्टानि।
विशिष्टातिथिरूपेण लोकसेवक-मण्डलस्य सचिवः ब्रह्मप्रकाशः तिवारी अवदत् यत् अध्यक्षेन खैरातीलालेन भोलेन पतितोद्धारसभायै यत् कार्यं कृतं तत् समाजस्य कृते अनुकरणीयं वर्तते। कार्यक्रमस्य उपसंहारे आयोजकैः अतिथीन् प्रति कृतज्ञता व्यक्ता। कार्यक्रमस्य अध्यक्षतां वरिष्ठ-पार्षदः शिवसेवकः सिंहः अकरोत्, कार्यक्रम-सञ्चालनं च शिक्षिका पूजा अग्रवाल कृतवती। बालविद्यानिकेतनस्य पर्यवेक्षिका (सुपरवाइजर) संगीता भट्ट सर्वेषां प्रति आभारं प्रकटितवती।
कार्यक्रमे कान्ता चोपड़ा, वरिष्ठः समाजसेवी शिक्षकः श्रीनारायणः यादवः, कर्मचारी-नेता रविशंकरः मिश्रः, पूजा अग्रवाल, तृप्तिः सहगल, दीपा टण्डन, अरविन्दः चोपड़ा, छाया चोपड़ा इत्यादयः सहस्रशः जनाः तथा अभिभावकाः अपि उपस्थिता आसन्।
---------------
हिन्दुस्थान समाचार / अंशु गुप्ता