- कम्बल-वितरणाय आश्रयगृह-संचालनाय च सर्वेभ्यः जनपदेभ्यः पर्याप्तः धनराशिः प्रदत्तः - मुख्यमन्त्री

गोरखपुरम्, 28 दिसम्बरमासः (हि.स.)। मुख्यमन्त्री योगी आदित्यनाथः अवदत् यत् प्रबलशीतवायुवेगकाले दीनान् आवश्यकतावतश्च रक्षितुं सर्वकारः संवेदनशीलः अस्ति। कश्चिदपि कष्टाश्रितः न भवेत्- इति धुया डबल-इञ्जिन-सर्वकारः पूर्णप्रतिबद्धतया कार्यं करोति। जनान् शीतवायुवेगात् रक्षितुं कम्बलम्, ऊर्णा-वस्त्र-वितरणम्, आश्रयगृह-सञ्चालनम्, सार्वजनिकेषु स्थलेषु च अग्निव्यवस्था- एतेषां कृते प्रदेशस्य सर्वेभ्यः जनपदेभ्यः पर्याप्तः धनराशिः प्रदत्तः अस्ति। आवश्यकतायां सति विद्यालयानाम् अवकाशघोषणां कर्तुं, अतीवावश्यकतायां च आभासी-माध्यमेन अध्यापन-व्यवस्थां कर्तुं जिलाधिकारिणः निर्देशिताः सन्ति।

रविवासरे सायं गोरखपुरमहानगरे द्वयोः आश्रयगृहयोः निरीक्षणानन्तरं पत्रकारैः सह संवादे मुख्यमन्त्रिणा एतत्सर्वमुक्तम्। निरीक्षणकाले सः अधिकारिणः निर्देशितवान् यत् सर्वेषु आश्रयगृहेषु पर्याप्तानि शय्यास्थानानि, कम्बलानि, स्वच्छता च सुनिश्चिती क्रियताम्; भोजन-व्यवस्था-विहीनानां कृते भोजनम् अपि उपलब्धं भवतु। टीपी-नगर-पास तथा धर्मशाला-विपणम् इत्यनयोः स्थानयोः स्थितेष्वाश्रयगृहेषु इमां व्यवस्थाम् अवलोकितवान्, तत्र स्थितानां कुशलक्षेमं पृष्ट्वा स्नेहपूर्णं संवादं कृतवान्। बहिर्गतेषु स्थलेषु स्वयं कम्बलान् भोजनं च वितीर्य जनान् आश्वासितवान्।

मुख्यमन्त्री अवदत् यत् उत्तरभारते तथा उत्तरप्रदेशेऽपि प्रबलशीतवायुवेगस्य प्रभावः दृश्यते; तस्मात् प्रशासनं जनप्रतिनिधयः च आवश्यकतावन्तेषु कम्बल-ऊर्णा-वस्त्र-वितरणम्, सार्वजनिकेषु स्थलेषु अग्निव्यवस्था, आश्रयगृहसञ्चालनं च निरन्तरं कुर्वन्ति। जनान् सम्बोधयन् सः अवदत्- साधनयुक्ताः जनाः अन्यान् सहायतां कुर्वन्तु; नीहारे धूम्रतायां च अनावश्यकयात्रां वर्जयन्तु, आवश्यकतायां सति वेगं नियन्त्रयन्तु; यथा वृक्षात् तुषारादवशेषयितुं जलसेचनं क्रियते, ऊष्णकालेऽपि घर्मादवशेषयितुं जलपानं क्रियते तथैव शीतकालेऽपि जलस्य पानं पर्याप्तं कुर्वन्तु। सार्वजनिकेषु स्थलेषु प्रज्वलितान् काष्ठान् न हरन्तु- तानि आवश्यकतावद्भ्यः पशुभ्यश्च उपकाराय सन्ति।

सः अवदत् यत् गोरखपुर-महानगरे 480 स्थलेषु अग्निव्यवस्था कृताऽस्ति, 22,000 तः अधिकेषु आवश्यकतावद्भ्यः कम्बल-ऊनी-वस्त्र-वितरणं सम्पन्नम्। एतत् सर्वं सर्वकारस्य संवेदनशील-अभियानस्य अङ्गम् इति। अस्मिन् अवसरे महापौरः डॉ.मंगलेश-श्रीवास्तवः, सांसदः रविकिशनशुक्लः, विधायकौ विपिन-सिंहः, महेन्द्रपाल-सिंहः, राज्य-महिला-आयोगस्य उपाध्यक्षा चारु-चौधरी, भाजपा-महानगर-संयोजकः राजेशगुप्तः, कालीबाड़ीमहन्तः रवीन्द्रदासः, स्थानीयपार्षदाः तथा प्रशासनम्, आरक्षिणः, नगरनिगमस्य वरिष्ठ-अधिकारिणश्च उपस्थिताः आसन्।

हिन्दुस्थान समाचार / अंशु गुप्ता