लखनऊ, २८ दिसम्बरमासः (हि.स.)। शताब्दीवर्षम् उपलक्ष्य राष्ट्रीय-स्वयंसेवक-सङ्घेन (आर.एस.एस.) अवधप्रान्ते २०२६ तमे वर्षे जनवरी-मासस्य प्रथम-दिनाङ्कात् हिन्दू-सम्मेलनानि आरब्धुं योजना कृता अस्ति। सङ्घेन मण्डल-स्तरे बस्ती-स्तरे च हिन्दू-सम्मेलनानामायोजनस्य योजना विनिर्मिता अस्ति। सम्मेलनानां सफलतायै खण्ड-स्तरे नगर-स्तरे च संचालनसमितयः गठिताः सन्ति। समितिषु सन्तानां धर्माचार्याणाञ्च समावेशः दृश्यते। संयोजकाः सह-संयोजकाः च पूर्वमेव निश्चिताः सन्ति। हिन्दू-सम्मेलन-स्थलेषु भूमि-पूजन-कार्यक्रमाः अपि प्रचलन्ति।

अस्यामेव श्रृङ्खलायां रविवासरे लखनऊ-नगरस्य संवाद-नगरम् इति स्थाने हिन्दू-सम्मेलनस्य भूमि-पूजनम् अभवत्। जियामऊ-बस्ती-स्थले हिन्दू-सम्मेलनं ४ जनवरी तमे दिनाङ्के भविष्यति। अस्मिन् अवसरे विभाग-सेवा-प्रमुखः सुभाषः अग्रवालः, नगर-सङ्घचालकः, नगर-कार्यवाहः संदीपः चतुर्वेदी, सह-नगर-कार्यवाहः शिवकुमारः, नगर-व्यवस्था-प्रमुखः शशिकान्तः, डा. उमेशः रायः, अभिषेकः यादवः च प्रमुखतया उपस्थिताः भविष्यन्ति।

सम्मेलने ज्वलन्त-विषयाः चर्चयिष्यन्ते

प्रान्त-प्रचार-प्रमुखः डा. अशोकः दुबे अवदत् यत्- हिन्दू-सम्मेलने हिन्दू-समाजं पुरतः विद्यमानाः ज्वलन्ताः समस्याः प्रकाशयितुं प्रयत्नः करिष्यते। हिन्दू-समाजः हिन्दूत्वेन, हिन्दू-नेतृत्वं च हिन्दूनां हिताय दृढतया स्थित्वा कार्यं करोतु, समाजे हिन्दुत्व-भावः दृढो भवतु, हिन्दू-समाजस्य सामूहिक-शक्तेः प्रकटीकरणं स्यात्- एतादृशः प्रयत्नः करिष्यते। तदतिरिक्तमस्माकं मन्दिराणि जन-जागृतेः केन्द्राणि भवन्तु, तथा पञ्च-परिवर्तन-विषयाः समाजस्य आचरणे अभिव्यक्ताः स्युः- एतस्मिन् विषये समाजस्य प्रबोधनं कर्तुं प्रयत्नः करिष्यते।

हिन्दुस्थान समाचार / अंशु गुप्ता