जयपुरम्/जोधपुरम्, ४ दिसम्बरमासः (हि.स.)। राज्यपालः कुलाधिपतिश्च हरिभाऊ बागडे इति महोदयः गुरुवासरे एस.एन. चिकित्सामहाविद्यालये विश्वविद्यालयस्य समीक्षासभायाः अध्यक्षतां कृतवान्। सभायां शैक्षणिकप्रगतेः, अनुसंधानस्य, परीक्षासुधारस्य, अधोसंरचनाविकासस्य, छात्रकल्याणस्य, संबद्धमहाविद्यालयानां कार्यपद्धतेश्च विस्तृतरीत्या समीक्षा कृता।

राज्यपालेन बागडे-महोदयेन विश्वविद्यालयप्रशासनं निर्दिष्टं यत् छात्रहितान् सर्वोपरि स्थाप्य गुणवत्तापूर्णं शिक्षणम्, अनुसन्धानम्, क्रीडासुविधाः, छात्रनिवासव्यवस्था च सुदृढीकरणीयाः। निर्माणाधीनस्य विश्वविद्यालयभवनस्य कार्ये गुणवत्तामापदण्डानां कठोरपालनं, समयबद्धं समापनं च सुनिश्चितव्यमिति सः अवदत्। राज्यपालः उवाच नवीनशिक्षानीतिः भारतीयमूल्येषु राष्ट्रीयदृष्टौ च आधारितास्ति; अतः भारतीयज्ञानपरम्परायाः, प्राचीनचिकित्साविज्ञानस्य आधुनिकानुसन्धानस्य च समन्वयेन विद्यार्थिनां ज्ञानचरित्रकौशलानां संतुलितविकासः आवश्यकः। चिकित्साशिक्षा केवलं कुशलचिकित्सकान् न उत्पादयेत्, अपितु समाजसेवायां समर्पितान् संवेदनशीलनागरिकानपि निर्मातुं प्रयत्नः करणीय इति।

राज्यपालेन विश्वविद्यालयात् अपेक्षितं यत् उत्कृष्टं शिक्षणप्रशिक्षणम्, प्रभावी-अनुसन्धानतन्त्रं, बहुमुखीछात्रविकासश्च प्रमुखतया स्वीक्रियेत, येन विश्वविद्यालयः राष्ट्रीय-अंताराष्ट्रीयस्तरयोः उत्कृष्टतां स्थापयितुं समर्थः भवेत्। कुलगुरुः प्रो. एम.के. आसरेरी अवगतं कृतवान् यत् सत्रे २०२५–२६ मध्ये ३३२९ विद्यार्थी अध्ययनरताः; एनईपी २०२० अंतर्गतं द्विभाषीयपाठ्यक्रमोऽपि प्रवर्तितः। संबद्धमहाविद्यालयेषु उन्नतशिक्षावर्गः, बहुविषयकानुसन्धानप्रयोगशालाः च संचालिताः। विश्वविद्यालयेन ग्रामं बोरावास् इति गोदीकृत्य विविधाः कल्याणयोजनाः प्रवर्त्यन्ते।

हिन्दुस्थान समाचार / अंशु गुप्ता