भोपालनगरम्, १८ जनवरीमासः (हि.स.)। मध्यप्रदेशस्य मुख्यमन्त्री डाॅ.मोहन-यादवः शनिवासर-रात्रौ पूर्व-मन्त्रिणः गोपाल-भार्गवस्य स्वामी-दयानन्द-नगरस्थितं निवास-स्थानं गत्वा सौजन्य-साक्षात्कारं कृतवान्।

अस्मिन् अवसरे मुख्यमन्त्री डाॅ.यादवः भार्गव-परिवारद्वारा बाल-हृदय-रोगिणां उपचार-सहायार्थं स्थापितस्य वैदिका-फाउण्डेशन-इत्यस्य विशेष-कक्षस्य लोकार्पणं कृतवान्।

मुख्यमन्त्री डाॅ.यादवः भार्गवेन विविध-स्वास्थ्य-समस्याभिः पीडितानां नागरिकाणां सहायार्थं सञ्चालितानां सेवा-कार्याणां विषये अपि सूचनां प्राप्तवान्। अस्मिन् प्रसङ्गे मुख्यमन्त्री अवदत् यत् गोपाल-भार्गवः अनेक-वर्षेभ्यः सेवाया: अस्य संकल्पस्य पूर्त्यर्थं निरन्तरं प्रयत्नं करोति। एतानि सेवा-कार्याणि उत्कृष्टं, अनुकरणीयं च आदर्श-रूपाणि सन्ति। पीडित-जनानां सहाय्यं पावनं कार्यम् अस्ति।

सः अवदत् यत् सागर-जनपदात् राजधानीं प्रति ये रोगिणः आगच्छन्ति , तेषां समुचित-उपचारस्य चिन्तां सः दीर्घकालात् करोति। अस्य क्रमस्य अन्तर्गतं एम्बुलेन्स-सेवा तथा ७०-शय्यायुक्त-व्यवस्था विकसिताभवत्। गम्भीर-रोगैः पीडितानां रोगिणां तथा तेषां परिचर्या-कुर्वतां कुटुम्ब-सदस्यानां कृते भोजन-निवास-व्यवस्था अपि कृतास्ति, या अत्यन्तं प्रशंसनीया अस्ति।

अस्मिन् अवसरे मुख्यमन्त्री डाॅ.यादवः उपचारार्थं भोपालनगरम् आगतान् केचन नागरिकान् अपि मिलित्वा तेषां कुशल-क्षेमं पृष्टवान्। पूर्व-मन्त्रिणः भार्गवस्य निवासे सुसज्जितं बाल-भवनम् अपि विकसितम् अस्ति। मुख्यमन्त्री डाॅ.यादवः एतस्य कक्षस्य, निवास-व्यवस्थायाः तथा पाकशाला-व्यवस्थायाः निरीक्षणम् अपि कृतवान्।

हिन्दुस्थान समाचार / अंशु गुप्ता