लखनऊनगरम्, १८ जनवरीमासः (हि.स.)। मौनी-अमावस्यायाः पावन-अवसरे रविवासरे उत्तरप्रदेशस्य राजधानी-लखनऊ-नगरे राष्ट्र-सेविका-समितेः भगिन्यः पथ-सञ्चलनं कृत्वा नारी-जागरणस्य राष्ट्र-निर्माणस्य च सन्देशं प्रदत्तवन्त्यः। लखनऊ-महानगर-कार्यालयेन आयोजिते अस्मिन् पथ-सञ्चलने सहस्रशः सेविकाः अनुशासनपूर्वकम् उत्साहेन च सहभागीभूताः।

नगर-निगमस्य पुरतः स्थितात् दयानिधान-उद्यानात् पथ-सञ्चलनस्य आरम्भः अभवत्। एकरूपेण गणवेशेन घोष-दलेन सह पद-सञ्चलनं कुर्वन्त्यः सेविकाः राष्ट्र-निर्माण-मन्त्रैः मार्गं गुंजयन्त्यः आसन्। पथ-सञ्चलनं नगर-निगमात् भाजपा-कार्यालयस्य पार्श्वतः अटल-चतुष्पथं प्रति गतं, ततः दक्षिणमुखी-हनुमान-मन्दिरस्य पुरतः साहू-सिनेमा-मण्डपं गत्वा मेफियर-चतुष्पथं प्रति आगत्य पुनः नगर-निगमस्य समीपे समाप्तम्। मार्गे विविध-स्थलेषु लखनऊ-निवासिनः पुष्प-वृष्ट्या प्रचण्ड-तालिकावादनैः च सेविकानाम् उत्साह-वर्धनं कृतवन्तः।

अस्मिन् अवसरे राष्ट्र-सेविका-समितेः अखिल-भारतीय-सह-सम्पर्क-प्रमुखा सीता अवदत् यत् अस्य कार्यक्रमस्य मुख्य-उद्देश्यं समाजे नारी-जागरणं कर्तुं तथा राष्ट्रस्य सर्वाङ्गीण-विकासे महिलानां सक्रियां निर्णायकां च भूमिकां स्थापितुं भवति। सा अवदत् यत् एतत् पथ-सञ्चलनं केवलं प्रदर्शनं न, अपि तु भारतीय-नारी-शक्तेः, संघटनस्य, राष्ट्रभक्तेः च सजीवः सन्देशः अस्ति। राष्ट्र-सेविका-समितिः निरन्तरं एतादृशैः कार्यक्रमैः समाजं जागरयति तथा भारतीय-नारीं राष्ट्र-निर्माणस्य मुख्य-धारया सह संयोजयति।

अस्मिन् अवसरे लखनऊ-नगरस्य महापौरः सुषमा-खर्कवाल: मुख्यातिथिरूपेण, वीणा-सिंहः च विशिष्टातिथिरूपेण उपस्थिताः आसन्। विशेषतः अखिल-भारतीय-सह-सम्पर्क-प्रमुखा सीता, प्रान्त-सञ्चालिका रत्नम्, प्रान्त-निधि-प्रमुखा मिथिलेश:, पूर्वी-उत्तरप्रदेशस्य क्षेत्र-प्रचारिका शशी च उपस्थिताः आसन्।

हिन्दुस्थान समाचार / अंशु गुप्ता