भोपालम्/गयाजी, १० अक्टोबरमासः (हि.स.)। मध्यप्रदेशस्य मुख्यमन्त्री डॉ. मोहनयादवः लोकसभायां विपक्षनेतारं राहुलगान्धिनं लक्ष्यीकृत्य आरोपितवान् यत् सः राजनीतिकविषयेषु रचनात्मक-भूमिकां निर्वहणस्य स्थाने अराजकतायाः वातावरणं निर्मातुं प्रयतते। तेन उक्तं यत् लोकतन्त्रे यदा जनता कस्यचित् दलस्य पञ्चवर्षेभ्यः कृते जनादेशं ददाति, तदा विपक्षस्य दायित्वम् अस्ति यत् सः स्वकीयां भूमिकां निर्वहेत्, सङ्घटनं सुदृढं कुर्यात् तथा जनाः तस्मात् दलात् दूरे किमर्थं गच्छन्ति इति आत्ममन्थनं कुर्यात्। मुख्यमन्त्री शनिवासरे बिहारप्रवासस्य समये गयाजीनगरे सञ्चारमाध्यमैः सह वार्तालापे एतदुक्तवान्।

मुख्यमन्त्री डॉ. यादवः अवदत् यत् निर्वाचनायोगस्य विरोधस्य विषये काङ्ग्रेसदलेन स्वकीयः पक्षः स्पष्टः कर्तव्यः। तेन प्रश्नः कृतः यत् यदि दलस्य निर्वाचनप्रक्रियायां आपत्तिः अस्ति, तर्हि तेन स्वकीयानां राजनीतिकनिर्णयानां दृष्टि-कोणस्य च विषये अपि विचारः करणीयः। बिहारस्य, पश्चिमबङ्गस्य उत्तरप्रदेशस्य च काङ्ग्रेसदलस्य राजनीतिकस्थितेः उल्लेखं कुर्वन् मुख्यमन्त्री अवदत् यत् अन्येषु प्रश्नान् उत्थापयितुं पूर्वं दलं स्वस्थितेः विश्लेषणं कुर्यात्। तेन तमिलनाडुराज्ये राजनैतिक-दलानां मध्ये परिवर्तमानानां समी-करणानाम् अपि उल्लेखः कृतः। सः अवदत् यत् जनता एतान् घटनाक्रमान् पश्यति। मुख्यमन्त्री विपक्षम् आहूतवान् यत् सः लोकतन्त्रे स्वकीयां जिम्मेदारीं सकारात्मकतया रचनात्मकतया च निर्वहेत्।

प्रधानमन्त्रिणः नरेन्द्रमोदिनः नेतृत्वस्य उल्लेखं कुर्वन् मुख्यमन्त्री अवदत् यत् २०१४ तमवर्षात् परं देशे स्थिरसर्वकारस्य सुदृढनेतृत्वस्य च अनुभवः प्राप्तः। तेन उक्तं यत् प्रधानमन्त्री निरन्तरं तृतीयवारं देशस्य नेतृत्वं कुर्वन् अस्ति। लोकतान्त्रिक-व्यवस्थायां जनादेशस्य एतत् महत्त्वपूर्णम् उदाहरणम् अस्ति। मुख्यमन्त्री डॉ. यादवः अवदत् यत् भारतं आर्थिकशक्तिरूपेण स्वस्थितिं सुदृढां कुर्वन् विभिन्नेषु क्षेत्रेषु च प्रगतिं करोति। अतः अस्मिन् समये विपक्षेण अपि देशस्य उपलब्धीनां विकाससम्बद्धविषयाणां च विषये सार्थकचर्चा करणीया।

बिहार-मध्यप्रदेशयोः सम्बन्धाः ऐतिहासिकाः

मुख्यमन्त्री डॉ. यादवः बिहार-मध्यप्रदेशयोः ऐतिहासिकसम्बन्धानाम् उल्लेखं कुर्वन् अवदत् यत् उभयोः प्रदेशयोः सम्बन्धाः प्राचीनकालादेव सन्ति। तेन सम्राट् अशोकस्य काले मगधस्य अवन्त्याश्च ऐतिहासिकसम्बन्धस्य उल्लेखः कृतः। मुख्यमन्त्री अवदत् यत् उज्जयिन्याः बिहारस्य च सांस्कृतिकवैभवं राज्यद्वयस्य सम्बन्धान् अधिकं सुदृढान् करोति। बिहार-मध्यप्रदेशौ मिलित्वा धार्मिक-पर्यटनस्य प्रवर्धनाय कार्यं कर्तुं शक्नुतः। बिहारस्य मुख्यमन्त्रिणः सम्राट् चौधरीमहोदयस्य उल्लेखं कुर्वन् तेन उक्तं यत् राज्ययोः मध्ये उत्तमसमन्वयेन विकासाय सांस्कृतिकगतिविधिभ्यश्च गतिः प्रदातुं शक्यते।

गयाजीप्रवासस्य समये धार्मिकश्रद्धायाः उल्लेखं कुर्वन् डॉ. यादवः अवदत् यत् मन्दिराणि मठाश्च श्रद्धालूनां कृते सन्ति। तेन फल्गुनद्याः तीरे पितॄणां तर्पणस्य धार्मिकपरम्पराणां च महत्त्वस्य विषये अपि चर्चा कृता। मुख्यमन्त्री अवदत् यत् सांस्कृतिकवैभवस्य धार्मिकस्थलानां च विकासमाध्यमेन राज्ययोः सम्बन्धान् सुदृढान् कर्तुं शक्यते।

Hindusthan Samachar / Divya Ranjan