शभोपालम्, १० अक्टोबरमासः (हि.स.)। मध्यप्रदेश-ट्रैवलमार्ट्-२०२६ इत्यस्य अन्तर्गतं देशविदेशेभ्यः आगतेभ्यः प्रतिनिधिभ्यः मध्यप्रदेशस्य प्राकृतिक-सौन्दर्यं, समृद्धम् ऐतिहासिकवैभवम्, जैवविविधतां, रोमाञ्चकारीपर्यटनस्य च सम्भावनाः परिचाययितुं शनिवासरे विविधाः विशेषगतिविधयः आयोजिताः। एतासां गतिविधीनां माध्यमेन प्रतिनिधयः प्रदेशस्य पर्यटनस्थलानि समीपतः ज्ञातुं, स्थानीयपरिवेशस्य अनुभवम् अवाप्तुं, मध्यप्रदेशं विविधपर्यटनगन्तव्यरूपेण च अवगन्तुं अवसरं प्राप्तवन्तः।

ऐतिहासिकस्थलभ्रमणम्, शिकारा-नौकाविहारः, पक्षिनिरीक्षणभ्रमणम्, योगाभ्यासः, हेलिकॉप्टर-विहारः च प्रतिनिधीनाम् अनुभवम् अविस्मरणीयम् अकुर्वन्। ट्रैवलमार्ट्-कार्यक्रमे विभिन्नासु गतिविधिषु सहभागितायै १४९ विशिष्ट-प्रतिनिधयः पञ्जीकृतवन्तः। उपलब्ध-विवरणानुसारं प्रतिनिधिभिः ३३८ गतिविधयः चयनिताः। तासु शिकारा-नौकाविहारः सर्वाधिकः लोकप्रियः आसीत्, यस्य कृते १२० चयनानि अभवन्। एतदतिरिक्तं ऐतिहासिकस्थलभ्रमणाय ९५, पक्षिनिरीक्षणभ्रमणाय ७०, योगाभ्यासाय ३८, हेलिकॉप्टर-विहाराय च १५ चयनानि अभवन्।

भोपालस्य कमलापार्क इत्यत्र आयोजितेन ऐतिहासिकस्थलभ्रमणेन प्रतिनिधयः नगरस्य ऐतिहासिकपरिचयं सांस्कृतिक-वैभवं च समीपतः ज्ञातुं अवसरं प्राप्तवन्तः। एमपीटी-बोट्-क्लब इत्यत्र आयोजितेन शिकारा-नौकाविहारेण जलपर्यटनस्य प्राकृतिकसौन्दर्यस्य च मनोहरः अनुभवः प्राप्तः। वनविहारक्षेत्रे आयोजिते पक्षि-निरीक्षणभ्रमणे प्रतिनिधयः पक्षिणां प्राकृतिकपरिवेशस्य च सान्निध्ये समयं यापयितुं अवसरं प्राप्तवन्तः।

प्रतिनिधीनां शारीरिकमानसिकस्वास्थ्यं दृष्ट्वा विभिन्नेषु होटल इत्येतेषु योगाभ्यास-कार्यक्रमाः आयोजिताः। एतदतिरिक्तं भेल्-प्रांगणे आयोजितेन हेलिकॉप्टर-विहारेण प्रतिभागिभ्यः रोमाञ्चस्य उत्साहस्य च परिपूर्णः अनुभवः प्रदत्तः। एताभिः गतिविधिभिः मध्यप्रदेशे ऐतिहासिक-पर्यटनस्य, जलपर्यटनस्य, प्रकृति-पर्यटनस्य, स्वास्थ्यकल्याण-पर्यटनस्य, साहसिकपर्यटनस्य च विविधाः सम्भावनाः प्रभावीरीत्या प्रदर्शिताः।

क्रिस्टिना ग्रूपे ऐतिहासिकस्थलभ्रमणस्य अनुभवस्य प्रशंसां कुर्वती अवदत्, “मध्यप्रदेशस्य ऐतिहासिकवैभवं सांस्कृतिकपरिचयं च समीपतः ज्ञातुं मम कृते अत्यन्तं विशेषः अनुभवः आसीत्। ऐतिहासिकस्थलभ्रमणेन कस्यचित् स्थानस्य इतिहासं तस्य जीवितपरम्पराश्च अवगन्तुं अवसरः प्राप्यते। एतादृश्यः गतिविधयः पर्यटकान् गन्तव्यस्थलेन भावनात्मकरीत्या सम्बद्धान् कर्तुं महत्त्वपूर्णां भूमिकां निर्वहन्ति।”

निशिथ् नोटानी शिकारा-नौकाविहारस्य अनुभवविषये अवदत्, “मध्यप्रदेशे जलपर्यटनस्य सम्भावनाः अत्यन्तम् आकर्षकाः सन्ति। शिकारा-नौकाविहार-काले प्राकृतिकसौन्दर्यस्य शान्त-वातावरणस्य च आनन्दानुभवः अद्भुतः आसीत्। एतादृश्यः गतिविधयः पर्यटकानां यात्रां सुखदविश्रामक्षणैः समृद्धां कुर्वन्ति, प्रदेशस्य पर्यटनानुभवं च अधिकम् अविस्मरणीयं कुर्वन्ति।”

डॉ. बितानकुमारदत्तः पक्षिनिरीक्षण-भ्रमणविषये अवदत्, “प्रकृतेः जैवविविधतायाश्च समीपतः अवलोकनस्य अवसरः कस्यापि पर्यटनानुभवस्य विशेषतां वर्धयति। पक्षिनिरीक्षणभ्रमणकाले प्राकृतिकपरिवेशेन सह सम्बद्धतायाः अनुभवः प्राप्तः। मध्यप्रदेशे प्रकृति-पर्यटनस्य वन्यजीवाधारितपर्यटनस्य च विकासाय व्यापकाः सम्भावनाः सन्ति।”

बलराजकपूरः हेलिकॉप्टर-विहारस्य अनुभवम् रोमाञ्चकारीं वर्णयन् अवदत्, “हेलिकॉप्टर-विहारेण मध्यप्रदेशस्य पर्यटनानुभवे रोमाञ्चस्य नवीनः आयामः योजितः। कस्यचित् गन्तव्यस्थलस्य भिन्नदृष्टिकोणेन अवलोकनस्य अवसरः यात्रिकाणाम् आकर्षणस्य केन्द्रं भवितुम् अर्हति। एतादृश्यः गतिविधयः प्रदेशे साहसिकपर्यटनस्य नवीनपरिचयं निर्मातुं सहायकाः भविष्यन्ति।”

आर्थर् हेकरः योगाभ्यासकार्यक्रमविषये स्वविचारान् प्रकटयन् अवदत्, “यात्राकाले योगाभ्याससदृश्यः गतिविधयः शारीरिक-मानसिकसन्तुलनं स्थापयितुम् अवसरं ददति। मध्यप्रदेश-ट्रैवलमार्ट्-कार्यक्रमेण सह स्वास्थ्यकल्याणाय महत्त्वं दानम् एकः सकारात्मकः प्रयासः अस्ति। एतेन सन्देशः प्राप्यते यत् मध्यप्रदेशः पर्यटकेभ्यः केवलं दर्शनीयस्थलानि एव न, अपितु विश्रामस्य आत्मशान्तेश्च अनुभवान् अपि प्रदातुं शक्नोति।”

चिरा फेट्रोमः विविधासु गतिविधिषु प्राप्तस्य समग्रानुभवस्य विषये अवदत्, “मध्यप्रदेश-ट्रैवलमार्ट्-२०२६ मध्ये विविधप्रकारक-गतिविधीनां समावेशः अत्यन्तं प्रशंसनीयः अस्ति। अत्र इतिहासस्य, प्रकृतेः, रोमाञ्चस्य, स्वास्थ्यकल्याणस्य च एकत्र अनुभवः प्राप्तुं शक्यते। एतादृशाः आयोजनाः प्रदेशस्य विविधपर्यटनसम्भावनानाम् अवगमने तासां च व्यापकस्तरे प्रस्तुतौ महत्त्वपूर्णां भूमिकां निर्वहन्ति।”

मध्यप्रदेश-ट्रैवलमार्ट्-२०२६ अन्तर्गतं आयोजिताभिः गतिविधिभिः प्रदर्शितं यत् प्रदेशस्य पर्यटनं केवलम् ऐतिहासिक-स्मारकेषु प्रमुखदर्शनीयस्थलेषु च सीमितं नास्ति, अपितु अत्र प्रकृतिसान्निध्यस्य, जलपर्यटनस्य, पक्षिनिरीक्षणस्य, योगाभ्यासस्य, रोमाञ्चकारीणाम् अनु-भवानां च व्यापकाः सम्भावनाः सन्ति। प्रतिनिधीनां सहभागितया गतिविधिषु च तेषां रुचिना अनुभवाधारितपर्यटनस्य वर्धमानं महत्त्वं स्पष्टतया प्रतिपादितम्।

Hindusthan Samachar / Divya Ranjan