हुगली, १० अक्टोबरमासः (हि.स.)। पश्चिमबङ्गालसर्वकारस्य पेयजल-स्वास्थ्यविभागस्य श्रमविभागस्य च राज्यमन्त्री भास्करभट्टाचार्यः आरोपितवान् यत् पूर्ववर्तिसर्वकारेण दुर्गापूजां केवलम् उत्सवरूपेण प्रस्तुत्य महालयायाः पूर्वमेव पूजामण्डपानाम् उद्घाटनं कृत्वा बङ्गालस्य संस्कृतेः उपहासः कृतः। शनिवासरे साहित्यिकपत्रिकायाः ‘कवितार दिनरात’ इत्यस्य पूजाविशेषाङ्कस्य विमोचन-समारोहे सः एतदुक्तवान्। अस्मिन् विशेषाङ्के मन्त्री भास्कर-भट्टाचार्यस्य पञ्च कविताः प्रकाशिताः सन्ति।

मन्त्री अवदत् यत् सनातनधर्मे दुर्गापूजा केवलम् उत्सवः न, अपितु आराधनायाः उपासनायाश्च विषयः अस्ति। पूजायाः सामान्योत्सवस्य च मध्ये भेदः अस्ति, यस्य अवगमनम् आवश्यकम्। अन्यान् प्रसन्नान् कर्तुं प्रयत्नशीलतया पूर्ववर्ति-सर्वकारेण दुर्गापूजायाः परम्परायाः धार्मिकमहत्त्वस्य च अवमूल्यनं कृतम् इति सः आरोपितवान्।

भास्करभट्टाचार्यः अवदत् यत् चतुस्त्रिंशत् वर्षाणां वामपन्थिशासनकाले दुर्गापूजा ‘शारदीयोत्सवः’ इति रूपेण प्रस्तुतवती। वामपन्थिविचारधारायाः विषये प्रश्नान् उत्थापयन् सः अपृच्छत् यत् ये जनाः, तस्य आरोपानुसारम्, धर्मस्य धार्मिकमहा-पुरुषाणां च उपहासं कुर्वन्ति, ते पूजामण्डपेषु कार्लमार्क्सस्य लेनिनस्य च विचारधाराभिः सम्बद्धानां पुस्तकानां विक्रयकेन्द्राणि स्थापयितुं किमर्थम् उत्सुकाः भवन्ति। रूसीमार्क्सवादी-विचार-धारायाः भारतीयसंस्कृतेः पारम्परिकेण धरोहरेण सह किमपि प्रत्यक्षसम्बन्धः नास्ति इति सः अवदत्।

तथापि मन्त्री स्पष्टं कृतवान् यत् पूजामण्डपेषु वामपन्थिपुस्तकानां विक्रय-केन्द्रस्थापने तस्य कापि आपत्तिः नास्ति। जनाः स्वयमेव निर्णयं करिष्यन्ति यत् ते रामकृष्णपरमहंसस्य आदर्शानाम् अनुसरणं कर्तुम् इच्छन्ति अथवा लेनिनस्य विचारधारया प्रेरिताः भवितुम् इच्छन्ति।

सः अग्रे अवदत् यत् श्रीरामपुरे लेनिनस्य प्रासङ्गिकता कियती अस्ति तथा बङ्गालस्य सामाजिकजीवने रामकृष्ण-परमहंसस्य महत्त्वं कियत् अस्ति, इत्यस्य निर्णयमपि जनाः एव करिष्यन्ति।

मन्त्रिणः अस्मिन् वक्तव्ये दुर्गापूजायाः धार्मिकमहत्त्वं, वामपन्थिविचारधारा बङ्गालस्य सांस्कृतिकधरोहर: च इत्येते विषयाः पुनः राजनीतिक-सांस्कृतिक-विमर्शस्य केन्द्रे आगताः सन्ति।

Hindusthan Samachar / Divya Ranjan