* मङ्गलारत्याः सह शारदीयनवरात्रस्य शुभारम्भः

* जय माता दी इति जयघोषैः मन्दिरपरिसरः गुञ्जितः

प्रयागराजः, ११ अक्टोबरमासः (हि. स.)। सङ्गमनगरी प्रयागराजे शक्तिपीठे मातुः कल्याणीदेव्याः मन्दिरे शारदीयनवरात्रमहोत्सवस्य शुभारम्भः वैदिकमन्त्राणाम् उच्चारणेन, शङ्खनादेन, घण्टाघडियालवाद्यानां मधुरध्वनिना च सह मातुः मङ्गलारत्या अभवत्। प्रातः पञ्चवादनात् पञ्चदशाधिके समये आरत्याः अनन्तरमेव मन्दिरे श्रद्धालूनां पङ्क्तयः आरब्धाः। सहस्रशः भक्ताः मातुः चरणयोः प्रणम्य सुखसमृद्ध्योः कल्याणस्य च कामनाम् अकुर्वन्। प्रथमदिने माता कल्याणी देवी भगवत्याः शैलपुत्र्याः दिव्यस्वरूपेण भक्तेभ्यः दर्शनं दत्तवती।

मध्याह्ने द्विवादनानन्तरं मातुः महाभोगस्य षोडशोपचारपूजनं कृतम्। ततः अनन्तरं मातुः भव्यः शृङ्गारः कृतः। माता वृषभम् आरूढा आसीत् तथा तस्याः हस्तयोः त्रिशूलं कमलपुष्पं च सुशोभिते आस्ताम्। स्वर्णरजताभरणैः सह बेला, गुलाब, गेन्दापुष्पैः च मातुः मनोहरः शृङ्गारः कृतः। सायं सप्तवादने पण्डितः सुशील कुमार पाठकः मातुः महाआरतीम् अकरोत्। आरत्याः समये श्रद्धालवः भक्तिभावेन मातुः आराधनाम् अकुर्वन्।

सायं षड्वादनात् मध्यरात्रौ द्वादशवादनपर्यन्तं दर्शनार्थं भक्तानां विशालः जनसमूहः समागतः। मन्दिरपरिसरः जय माता दी इति जयघोषैः गुञ्जितः अभवत्। श्रद्धालवः मातुः दर्शनं कृत्वा परिवारस्य सुखशान्त्याः, आरोग्यस्य, मङ्गलमयजीवनस्य च प्रार्थनाम् अकुर्वन्। नवरात्रमहोत्सवस्य अवसरे मन्दिरपरिसरे तद्बहिः मार्गे च आकर्षकाः विद्युद्दीपसज्जाः कृताः सन्ति, येन सम्पूर्णं क्षेत्रं भक्तिमयेन वातावरणेन परिपूर्णम् अभवत्।

नवरात्रपर्यन्तं शतचण्डीमहायज्ञः प्रचलिष्यति

मन्दिरस्य महामन्त्री पण्डितः श्याम जी पाठकः अवदत् यत् नवरात्रस्य प्रथमदिने मातुः मङ्गलारत्याः, महारुद्राभिषेकस्य, शतचण्डीमहायज्ञस्य च आयोजनं कृतम्। पण्डितस्य सन्तोष कुमार मिश्रस्य आचार्यत्वे एकादश ब्राह्मणैः विधिविधानपूर्वकं यज्ञः सम्पन्नः। यज्ञः प्रातः अष्टवादनात् एकादशवादनपर्यन्तं तथा सायं चतुर्वादनात् षड्वादनात् त्रिंशन्निमेषाधिकपर्यन्तं च अभवत्। एषः धार्मिकानुष्ठानः सम्पूर्णनवरात्रकालं प्रचलिष्यति।

पण्डितः सुशील कुमार पाठकः अवदत् यत् यज्ञे बहुसङ्ख्याकाः श्रद्धालवः भागं गृहीत्वा पुण्यलाभं प्राप्तवन्तः। अनेके भक्ताः मन्दिरपरिसरे स्वबालकानां मुण्डनसंस्कारम् अपि कारितवन्तः।

द्वितीयदिने माता ब्रह्मचारिणीस्वरूपेण दर्शनं दास्यति

माध्यमप्रभारी राजेश केसरवानीः अवदत् यत् नवरात्रस्य द्वितीयदिने सोमवासरे मातुः कल्याणीदेव्याः शृङ्गारः भगवत्याः ब्रह्मचारिण्याः स्वरूपेण क्रियते। अस्मिन् स्वरूपे माता तपोमुद्रायां स्थिता भविष्यति तथा तस्याः हस्तयोः कमण्डलुः जपमाला च सुशोभिते भविष्यतः। सः श्रद्धालून् मातुः दर्शनपूजनं कृत्वा नवरात्रमहोत्सवे सहभागीभवितुं प्रार्थितवान्।

Hindusthan Samachar / Dheeraj Maithani