आरक्षक-अधीक्षकः अभिषेकभारती प्रशस्तिपत्राणि प्रदाय बालिकानाम् उत्साहम् अवर्धयत्, सहायतादूरभाष-क्रमाङ्कानां च सूचनां दत्तवान्।

औरैया, १२ अक्टोबरमासः (हि.स.)। उत्तरप्रदेशस्य औरैयाजनपदे मिशन शक्तिः ६.० अभियानस्य अन्तर्गतं सोमवासरे आरक्षी अधीक्षककार्यालयस्य सभागारे सम्मानसमारोहः आयोजितः। अस्मिन् समारोहे आरक्षक-अधीक्षकः अभिषेक-भारती विभिन्नविद्यालयानां संस्थानां च ६० प्रतिभाशालिनीभ्यः छात्राभ्यः प्रशस्तिपत्राणि प्रदाय ताः सम्मानितवान्। छात्राः परिश्रमेण, आत्मविश्वासेन, लग्नतया च अग्रे गन्तुं प्रेरिताः।

समारोहे नगरपालिकान्तरमहा-विद्यालयस्य, जनतान्तर्महाविद्यालयस्य, गोपाल-अन्तर्महाविद्यालयस्य, स्वामी-प्रेमशिवानन्द-अन्तर्महाविद्यालयस्य, भारतीबालिकान्तरमहाविद्यालयस्य, शेमफोर्ड फ्यूचरिस्टिक विद्यालयस्य, वैदिक-टेक्नीक-अन्तर्महाविद्यालयस्य, सेण्ट् साईनाथ-अन्तर्महाविद्यालयस्य, ग्रीनवैली पब्लिक विद्यालयस्य (दिबियापुर), श्रीराधाकृष्णविद्यालयस्य (फफून्द), ज्ञानस्थली-अकादमी-संस्थानस्य अपेक्षा-बालविकाससमित्याः च छात्राः सम्मानिताः। एतासु शिक्षायां, क्रीडासु, सङ्गीते, शतप्रतिशत-उपस्थितौ, सामाजिकक्षेत्रे च उत्कृष्टं प्रदर्शनं कृतवत्यः बालिकाः सम्मिलिताः आसन्।

आरक्षक-अधीक्षकः अभिषेकभारती छात्राः सम्बोधयन् अवदत् यत् ताः स्वलक्ष्याणि निर्धारित्य पूर्णपरिश्रमेण आत्मविश्वासेन च अग्रे गच्छेयुः। सः साइबर-अपराधान् प्रति जागरूकाः भवितुं तथा आवश्यकतायां आरक्षी-सहायतादूरभाषस्य साहाय्यं स्वीकर्तुं च आह्वानम् अकरोत्। अस्मिन् अवसरे छात्राभ्यः मुख्यमन्त्री-सहायता-दूरभाषस्य १०७६, महिलाशक्ति-दूरभाषस्य १०९०, साइबर-सहायतादूरभाषस्य १९३०, स्वास्थ्यसेवायाः १०२, रुग्णवाहिकासेवायाः १०८, बाल-सहायतादूरभाषस्य १०९८, महिला-सहायतादूरभाषस्य १८१, आपत्कालीन-सेवायाः ११२ च विषये सूचनाः प्रदत्ताः।

कार्यक्रमे बिधूनाक्षेत्रस्य वृत्ताधिकारी, प्रतिसारनिरीक्षकः, महिला-आरक्षक-स्थानकस्य प्रभारी च अन्ये आरक्षक-कर्मचारिणः उपस्थिताः आसन्।

Hindusthan Samachar / Divya Ranjan