राज्यसभानिर्वाचने एकः प्रत्याशी परिवारात्, अपरः मुम्बईनगरस्य धनाढ्यः; पीडीए इत्यस्य अर्थः ‘परिवारविकास-प्राधिकरणम्’

समाजवादीपक्षीयाः कृकलासवत् वर्णान् परिवर्तयन्ति; सत्तायां पुनरागमनस्य आशा नष्टा, अतः मनमाना: प्रतिज्ञाः कुर्वन्ति : मुख्यमन्त्री

गोरखपुरम्, १२ अक्टोबरमासः (हि.स.)। उत्तरप्रदेशस्य मुख्यमन्त्री योगी आदित्यनाथः समाजवादीपक्षस्य शासन-काले शिक्षाव्यवस्थायाः दुर्दशां प्रति कटाक्षं कुर्वन् अवदत् यत् समाजवादीपक्षः शिक्षा च नदीतटद्वयमिव स्तः, ययोः कदापि मेलनं न भवति। समाजवादीपक्षः शिक्षायाः कट्टरविरोधी अस्ति। यः शिक्षायाः विरोधी भवति, सः शिक्षकाणां हितैषी कदापि भवितुं न शक्नोति। समाजवादीपक्षस्य शासनकाले शिक्षकाः अपि सुरक्षिताः न आसन्। अनेकाः शिक्षकाः सुरक्षार्थं विद्यालयं प्रति गच्छन्तः शस्त्राणि अपि वहन्ति स्म। समाजवादीपक्षस्य राजनीतिः सम्पूर्णतया परिवारस्य धनाढ्यानां च हितेषु सीमिता अभवत्।

मुख्यमन्त्री सोमवासरे महन्तदिग्विजय-नाथ-उद्याने आयोजिते शिक्षकमतदाता-संवादकार्यक्रमे सम्बोधनं कुर्वन् आसीत्। गोरखपुर-फैजाबाद-शिक्षकनिर्वाचन-क्षेत्रस्य विधानपरिषद्-सदस्यनिर्वाचने भाजपाप्रत्याशिनः ध्रुव-कुमारत्रिपाठिनः समर्थनार्थम् आयोजिते अस्मिन् कार्यक्रमे मुख्यमन्त्री अवदत् यत् एकस्मिन् पक्षे भाजपा अस्ति, या शिक्षायाः, शिक्षणसंस्थानानां, शिक्षकाणां सुरक्षायाश्च कृते कार्यं करोति। अपरस्मिन् पक्षे समाजवादीपक्षः अस्ति, यस्य शिक्षया सह किमपि सम्बन्धः नास्ति। समाजवादीपक्षीयाः शिक्षकान् उपदिशन्ति, तेषां हितैषिणः भवितुं नाटयन्ति च। सः प्रश्नम् अकरोत् यत् समाजवादीपक्षस्य चत्वारः मुख्यमन्त्रिणः अभवन्, तथापि शिक्षकाणां कृते नगदरहितचिकित्सा-सुविधा किमर्थं न प्रदत्ता? शिक्षाक्षेत्र-सम्बद्धानां समस्यानां समाधानं किमर्थं न कृतम्?

मुख्यमन्त्री अवदत् यत् समाजवादीपक्षस्य शासनकाले प्रदेशस्य युवानां च परिचयस्य सङ्कटम् आसीत्। छात्राः चिन्तिताः आसन्, तेषां पुरतः काचित् दिशा न आसीत्। परीक्षासु अनुचितसाधनानां प्रयोगः प्रदेशस्य परिचयः अभवत्। विद्यालय-भवनानि जीर्णानि आसन्, तेषां स्थितिं प्रति कस्यापि ध्यानं न आसीत्। युवानां भविष्यं सङ्कटग्रस्तम् आसीत्, किन्तु तत्कालीनं शासनं निष्क्रियतया आसीत्। शिक्षा-व्यवस्थां नाशयन्तः, अराजकतां प्रसारयन्तः, महिलानां शिक्षकाणां च सुरक्षायै संकटं जनयन्तः असामाजिक-तत्त्वान् शासनं संरक्षणं ददाति स्म। दस्यूकारिणः मुख्यमन्त्रिणः आवासे सम्मानिताः भवन्ति स्म। अद्य कश्चन शिक्षणसंस्थानस्य, शिक्षकस्य, महिलायाः वा सुरक्षायाः उल्लङ्घनं कर्तुं न शक्नोति। यदि कश्चित् एवं करोति, तर्हि कारागारं वा नरकं वा—एतयोः एकं मार्गं चिनोतु।

समाजवादीपक्षीयाः अत्यन्तं कपटिनः मिथ्यावादिनश्च

समाजवादीपक्षं प्रति तीव्रं प्रहारं कुर्वन् मुख्यमन्त्री अवदत् यत् अस्य पक्षस्य नेतारः अत्यन्तं कपटिनः मिथ्यावादिनश्च सन्ति। ये रामभक्तेषु गुटिकाप्रहारम् अकुर्वन्, अयोध्यां गत्वा अपि राममन्दिरं न गच्छन्ति, तत्र मनगढन्तानि मिथ्या-प्रचाराणि कुर्वन्ति, राममन्दिरस्य विरोधे न्यायालये पक्षं स्थापयन्ति स्म, ते एव अद्य कालनेमीवत् रामनाम जपन्ति।

पीडीए इत्यस्य अर्थः—‘परिवारविकास-प्राधिकरणम्’ तथा ‘परस्य धनम् आत्मसात्करणम्’

मुख्यमन्त्री समाजवादीपक्षस्य पीडीए इति घोषणायाः वास्तविकम् अर्थं ‘परिवार-विकासप्राधिकरणम्’ तथा ‘परस्य धनम् आत्मसात्करणम्’ इति व्याख्याय राज्यसभानिर्वाचनमपि अस्य प्रमाणम् इति अवदत्। एकः प्रत्याशी ‘परिवारविकास-प्राधिकरणस्य’ प्रतिनिधित्वेन चचाजान अभवत्, अपरः ‘परस्य धनम् आत्मसात्करणम्’ इति सूत्रेण मुम्बईनगरस्य धनाढ्यः अभवत्। तेषां पीडीए इत्यस्मिन् समाजस्य शेषवर्गेभ्यः कापि स्थाने नास्ति। समाजवादीपक्षीयाः पुनः पुनः कृकलासवत् वर्णान् परिवर्तयन्ति। तेषां परिवर्तनं दृष्ट्वा कृकलास: अपि प्रसन्नः भवेत् यत् समाजवादीपक्षरूपेण तस्य एकं नूतनं मित्रं प्राप्तम्।

समाजवादीपक्षस्य उपदेशः मकरवत्

मुख्यमन्त्री अवदत् यत् समाजवादीपक्षस्य एषः उपदेशः—तस्य सत्तायाम् आगमनेन शान्तिः, सुरक्षिता व्यवस्था च भविष्यति—तादृशः अस्ति, यथा कश्चन मकरः जलस्य तटे आगत्य वदेत् यत् अधुना सः आखेटकं त्यक्तवान्। समाजवादीपक्षीयाः नौकां पारं नेतुं न, अपितु तां निमज्जयितुं प्रवृत्ताः सन्ति। तेषु कदापि विश्वासः न करणीयः। ते शिक्षायाः नौकां निमज्जयन्ति, शिक्षकान् अपमानयन्ति, शिक्षाक्षेत्रं च पूर्णतया कलङ्कयन्ति। अतः तेषु विश्वासः कर्तुं न शक्यते।

गुरोः ऋणात् कश्चिदपि कदापि मुक्तः न भवति

मुख्यमन्त्री अवदत् यत् शिक्षकः समाजस्य मार्गदर्शकः, व्यवस्थायाः सञ्चालकः, राष्ट्रस्य भविष्यनिर्माता च भवति। शिक्षकाणां तेषां हितानां च कृते यत्किमपि क्रियते, तत् न्यूनमेव भवति, यतः गुरोः ऋणात् कश्चिदपि कदापि मुक्तः न भवति। भारते गुरुसम्मानस्य विशिष्टा परम्परा अस्ति। श्रीरामस्य श्रीकृष्णस्य च व्यक्तित्व-विकासे तयोः गुरूणां महर्षिवसिष्ठस्य महर्षिसान्दीपनेश्च महत्त्व-पूर्णा भूमिका आसीत्। यदा चन्द्रगुप्तः चाणक्यसदृशस्य गुरोः मार्गदर्शनं प्राप्नोति, तदैव भारतस्य स्वर्णयुगस्य निर्माणं भवति। शिक्षकस्य वास्तविकः सम्मानः तदा भवति, यदा तेन शिक्षिताः छात्राः प्रदेशस्य राष्ट्रस्य च नाम उज्ज्वलं कुर्वन्ति। तदा जनाः अपि पृच्छन्ति—एतेषां गुरुः कः? एते कुत्र पठितवन्तः? कुत्रतः आगतवन्तः?

आन्दोलनं विना शिक्षकाणाम् अपेक्षाः पूरिताः

मुख्यमन्त्री अवदत् यत् प्रथमवारं शिक्षकाणाम् अपेक्षाः धरनाप्रदर्शनं विना सर्वकारेण पूरिताः। सर्वकारेण प्राथमिकशिक्षातः विश्वविद्यालयस्तरपर्यन्तं शिक्षकाणां, शिक्षाव्यवस्थया सम्बद्धानां सर्वेषां कर्मचारिणां तेषां परिवारजनानां च कृते पञ्चलक्षरूप्यकाणां नगदरहित-चिकित्सासुविधा प्रदत्ता। एतदतिरिक्तं वेतनस्य कर्तनं विना शिक्षकाणां कृते सुरक्षाबीमासुविधा अपि प्रदत्ता। सर्वकारेण सञ्चालिते अथवा अनुदानिते विद्यालये कार्यरतः कश्चन शिक्षकः दुर्भाग्यवशात् दुर्घटनायाः शिकारः भवति चेत् तस्य परिवाराय अष्टाशीति-लक्षरूप्यकात् आरभ्य एककोटि-विंशतिलक्षरूप्यकाणि यावत् धनराशिं प्रदातुं व्यवस्था कृता अस्ति। शिक्षामित्रेभ्यः, अन्येभ्यः शिक्षकेभ्यः पाककारेभ्यश्च सुरक्षाबीमासुविधा प्रदत्ता। सर्वकारेण शिक्षामित्राणां मानदेयं दशसहस्ररूप्यकेभ्यः अष्टादशसहस्र-रूप्यकाणि यावत्, अनुदेशकानां मानदेयं च नवसहस्र-रूप्यकेभ्यः सप्तदशसहस्ररूप्यकाणि यावत् वर्धितम्।

महिला शिक्षिका स्कन्धे शस्त्रं वहति स्म—मुख्यमन्त्रिणा रोचकः प्रसङ्गः कथितः

कार्यक्रमे मुख्यमन्त्री स्वस्य सांसद-कार्यकालस्य २००४ तमवर्षस्य एकं रोचकं प्रसङ्गं कथितवान्। सः अवदत् यत् एकदा स्वस्य संसदीयक्षेत्रं गच्छन् सः एकां महिलाशिक्षिकां साइकिलयानेन गच्छन्तीं दृष्टवान्, या स्वस्कन्धे शस्त्रं वहति स्म। तस्याः कारणं पृष्टे सा अवदत्—‘भवता ज्ञायते एव यत् सर्वकारस्य स्थितिः कीदृशी अस्ति। अतः स्वस्य विद्यालयस्य बालकानां च सुरक्षार्थम् अहं स्वयमेव स्कन्धे शस्त्रं धृत्वा गच्छामि।’

उत्तमा शिक्षाव्यवस्था शिक्षकस्य सर्वोत्तमं सम्मानम्

मुख्यमन्त्री योगी आदित्यनाथः अवदत् यत् शिक्षकस्य सर्वोत्तमं सम्मानम् उत्तमा शिक्षाव्यवस्था एव अस्ति। सर्वकारः एतस्याः दिशि कार्यं कुर्वन् अस्ति। ‘ऑपरेशन कायाकल्प’ तथा ‘प्रोजेक्ट अलङ्कार’ इत्येतयोः अन्तर्गतं विद्यालयानां भव्य-भवनानि निर्माय तेषु आवश्यकसुविधाः उपलब्धाः कृताः। केवलं माध्यमिकशिक्षया सम्बद्धेभ्यः २,३०० राजकीय-अनुदानित-विद्यालयेभ्यः भेदभावं विना धनराशिः प्रदत्ता। शिक्षकाः छात्राश्च उत्तमेषु भवनानि उपविशेयुः, तेषां कृते आधारभूतसुविधाः स्युः, स्मार्टकक्षाः, सङ्गणकप्रयोगशालाः, अङ्कीय-पुस्तकालयाश्च निर्मीयेरन्—एतासां सर्वासां सुविधानां प्रदाने सर्वकारेण सम्पूर्णप्रदेशे कार्यं प्रगतिपथे नीतम्।

मुलायमसिंहयादवेन नवीननिवृत्तिवेतन-योजना प्रारब्धा, किन्तु धनं न निक्षिप्तम्

मुख्यमन्त्री योगी आदित्यनाथः अवदत् यत् मुलायमसिंहयादवः मुख्यमन्त्री आसीत् तदा २००५ तमे वर्षे तेन नवीन-निवृत्तिवेतनयोजना प्रारब्धा। इच्छति चेत् सः तां योजनां न अपि प्रारब्धुं शक्नोति स्म। किन्तु समाजवादीपक्षीयाः ‘मधुरं खादन्ति, कटुकं त्यजन्ति’ इति नीतिम् अनुसरन्ति। समाजवादीपक्षः अद्य मिथ्याप्रतिज्ञाः केवलम् एतस्मात् कारणात् करोति यत् तस्यापि ज्ञातम् अस्ति—तस्य सर्वकारः पुनः कदापि न भविष्यति। अतः यत्किमपि वक्तुं शक्यते। समाजवादीपक्षः जनान् वञ्चयति।

मुख्यमन्त्री अवदत् यत् मुलायम-सिंहयादवेन नवीननिवृत्तिवेतन-योजना प्रारब्धा तदा नियमः आसीत् यत् अस्यां योजनायां सम्मिलितस्य प्रत्येकस्य व्यक्तेः एकं खातं उद्घाटनीयम्। सर्वकारस्य कर्मचारिणः च दश-दशप्रतिशतं योगदानं संयोज्य तस्यां पंजीकायां निक्षेपणीयम् आसीत्। किन्तु समाजवादीपक्षः सर्वं धनं हर्तुं प्रवृत्तः पक्षः अस्ति। तेन एकस्यापि सरकारीकर्मचारिणः शिक्षकस्य वा पंजीका न उद्घाटिता, एकमपि रुप्यकं न निक्षिप्तम्।

मुख्यमन्त्री अवदत् यत् भाजपासर्वकारस्य गठनानन्तरं २०१८ तमे वर्षे तेन एकायोगः गठितः। २०१९ तमवर्षस्य आरम्भे दशसहस्रकोटिरूप्यकाणि अतिरिक्ततया उपलब्धानि कृत्वा चतुर्दशलक्षं सरकारी-कर्मचारिणां पंजीका: उद्घाट्य तेषु धनराशिः प्रेषिता। मुलायमसिंहयादवस्य अनन्तरम् अखिलेशयादवः अपि मुख्यमन्त्री अभवत्, किन्तु तेन किमपि न कृतम्। अस्माकं सर्वकारः शिक्षकाणां कर्मचारिणां च हिताय किमपि कार्यं कर्तुं न सङ्कोचिष्यते। वयं भवद्भिः सह स्मः, भवतां हितानां संरक्षणं करिष्यामः। यतः अस्माकं प्रदेशः अधुना रोगग्रस्तराज्यं न, अपितु राजस्वाधिक्ययुक्तं राज्यम् अस्ति।

स्वशासनकाले समाजवादीपक्षीयाः सर्वं धनम् अपहरन्ति स्म

मुख्यमन्त्री अवदत् यत् २०१७ तमवर्षात् पूर्वं समाजवादीपक्षीयाः सर्वं धनम् अपहरन्ति स्म, लुण्ठनं च कुर्वन्ति स्म। सैफई-सङ्घटनम् एतादृशीम् अराजकतां प्रसारयति स्म यत् प्रदेशस्य विकासः पूर्णतया अवरुद्धः आसीत्। युवभ्यः रोजगारः न प्राप्यते स्म। शिक्षायोगेषु सैफई-सङ्घटनेन स्वकीयाः सम्बन्धिनः एव नियुक्ताः। नियुक्तिप्रक्रियासु किं भवति स्म, इति सर्वे जानन्ति। धनं गृहीत्वा सर्वं सैफई-माध्यमेन निर्धारितं भवति स्म।

२०१७ तमे वर्षे अस्माकं सर्वकारस्य गठनसमये प्रदेशे शिक्षकाणां पदानि दीड्-लक्षात् अधिकानि रिक्तानि आसन्। वयं नियुक्तिप्रक्रियाः प्रारब्धाः, निष्पक्षचयनं च अभवत्। प्रत्येकस्मात् जनपदात् अभ्यर्थिनः चयनिताः। प्रत्येकस्मिन् आयोगे शिक्षकाः सदस्यरूपेण नियुक्ताः। यदा भवद्भिः प्रदेशे केन्द्रे च उत्तमः सर्वकारः निर्मितः, तदा देशस्य विकासः भवति। अधुना प्रदेशः स्वपरिचयाय अन्येषाम् आश्रयं न करोति। उत्तरप्रदेशस्य निवासी यत्र कुत्रापि गच्छति, तत्र जनाः तं स्नेहेन आलिङ्गितुं उत्सुकाः दृश्यन्ते। अद्य प्रदेशे विकासः, सांस्कृतिकवैभवम्, निवेशः, रोजगारश्च वर्तन्ते।

शिक्षकः समाजस्य जागरूकः प्रहरी

मुख्यमन्त्री अवदत् यत् शिक्षकः समाजस्य जागरूकः प्रहरी, व्यवस्थायाः निर्माता, राष्ट्रस्य समृद्धेः आधारश्च अस्ति। शिक्षकैः तादृशः प्रतिनिधिः निर्वाचनीयः, यः तेषां हिताय कार्यं करिष्यति। तेन ध्रुवकुमारत्रिपाठिनः बहुमतैः विजयं साधयितुं आह्वानं कृतम्। सः ध्रुवकुमारत्रिपाठिनं माध्यमिकशिक्षक-सङ्घस्य वरिष्ठनेतृभ्यां स्वर्गीयाभ्याम् ओमप्रकाशशर्मणा पञ्चाननरायेण च स्थापितायाः परम्परायाः संवाहकम् अवदत्। मुख्यमन्त्री जनप्रतिनिधीन् अपि स्वस्वक्षेत्रेषु अभियानं सञ्चाल्य ध्रुव-त्रिपाठिनः प्रचण्डविजयं सुनिश्चितं कर्तुम् आहूतवान्। मतदानं २३ अक्टोबर-दिनाङ्के भविष्यति। तद्दिने माध्यमिक-शिक्षया सम्बद्धेभ्यः सर्वेभ्यः मतदातृभ्यः अवकाशः घोषितः अस्ति।

सूर्यप्रतापशाही अवदत्—मुख्यमन्त्रिणा योगिना शिक्षायाः कायाकल्पः कृतः

कृषिमन्त्री सूर्यप्रतापशाही अवदत् यत् योगिसर्वकारेण प्राथमिक-माध्यमिक-विद्यालयानां कायाकल्पः कृतः। ‘प्रोजेक्ट अलङ्कार’ योजनया भवनानां, शौचालयानां, पुस्तकालयानां च सुविधाः वर्धिताः। शिक्षकाः आन्दोलनं विना सप्तमवेतनमानं प्राप्तवन्तः। नगदरहित-चिकित्सासुविधया शिक्षकाणां महती सहायता अभवत्।

समाजवादीपक्षस्य शिक्षया ज्ञानक्षेत्रेण च सम्बन्धः नास्ति : रविकिशनः

सांसदः रविकिशनशुक्लः अवदत् यत् ध्रुवत्रिपाठी निःस्वार्थभावेन शिक्षकाणां पक्षं समर्थयति, तेषां समस्याः च उत्थापयति। शिक्षकाः तस्य समर्थनार्थम् एकत्रिताः सन्ति। समाजवादीपक्षस्य शिक्षया ज्ञानक्षेत्रेण च किमपि सम्बन्धः नास्ति। पूर्ववर्तिषु सर्वकारेषु शिक्षणसंस्थासु अवैधाधिकारग्रहणस्य अराजकतायाश्च वातावरणम् आसीत्। अद्य गोरखपुरे स्वास्थ्यविश्वविद्यालयः सैनिकविद्यालयश्च इत्यादीनां सुविधानां विकासः कृतः।

ध्रुवत्रिपाठी अवदत्—वर्षाणां पुरातनाः याचना: पूरिताः

भाजपाप्रत्याशी ध्रुवकुमारत्रिपाठी अवदत् यत् शिक्षकाणां दीर्घकालीनमागः—नगदरहितचिकित्सासुविधा—अधुना पूरिता। २००५ तमवर्षस्य एप्रिलमासस्य प्रथमदिनात् पूर्वं विज्ञापितेषु पदेषु नियुक्तेभ्यः शिक्षकभ्यः पुरातननिवृत्ति-वेतनस्य लाभः प्राप्तः। पदोन्नतिप्रक्रिया जनपदविद्यालयनिरीक्षकस्तरे सुगमा कृता। उपदानस्य सीमा विंशति-लक्षरूप्यकेभ्यः पञ्चविंशतिलक्षरूप्यकाणि यावत् वर्धिता। वित्तविहीनविद्यालयेषु कार्यरतानां शिक्षकाणां सेवाविनियमावली अन्तिमचरणे अस्ति।

अस्मिन् कार्यक्रमे कारागारमन्त्री दारासिंहचौहानः, अल्पसङ्ख्यककल्याण-राज्यमन्त्री दानिशआजादः, ग्रामीण-विकासराज्यमन्त्री विजयलक्ष्मीगौतमः, सांसदः रविकिशनशुक्लः, जगदम्बिका-पालः, विजयदूबे, गोरखपुरस्य महापौरः डॉ. मङ्गलेशश्रीवास्तवः, भाजपायाः प्रदेश-महामन्त्री गोरखपुरक्षेत्रप्रभारी च अभिजातमिश्रः, क्षेत्रीयाध्यक्षः विनोदरायः, भाजपायाः प्रदेशोपाध्यक्षः विधानपरिषद्-सदस्यश्च डॉ. धर्मेन्द्रसिंहः, रमेशसिंहः, कामेश्वरसिंहः, उत्तरप्रदेशमाध्यमिक-शिक्षकसङ्घस्य बृजेशरायः, जय नारायणदूबे, संजीवरायः, अवधेशसिंहः, ज्ञानेशरायः, शैलेन्द्रशुक्लः, अजयशाही इत्यादयः प्रमुखतया उपस्थिताः आसन्।

Hindusthan Samachar / Divya Ranjan