गोरखपुरम्, १२ अक्टोबरमासः (हि.स.)। महिलानां सुरक्षायाः, सम्मानस्य, स्वावलम्बनस्य च ध्येयम् साकारं कर्तुं प्रदेशसर्वकारस्य बहुआयामी अभियानं ‘मिशन-शक्तिः’ मुख्यमन्त्री योगी आदित्यनाथः सोमवासरे अग्रे वर्धितवान्। शारदीयनवरात्रस्य द्वितीयायां तिथौ जगज्जनन्याः आदिशक्तेः द्वितीयस्वरूपायाः मातरं ब्रह्मचारिणीं प्रति श्रद्धां समर्प्य मुख्यमन्त्री गोरखपुरे ‘मिशन-शक्तिः’ जागरूकताशोभायात्रां हरितध्वजं प्रदर्श्य प्रस्थापितवान्।

योगिराजबाबागम्भीरनाथप्रेक्षागृहे कृषकेभ्यः प्रत्यक्षलाभान्तरणमाध्यमेन सस्यहानिपूर्त्यर्थं कृषिनिवेशानुदानराशेः हस्तान्तरणात् पूर्वं मुख्यमन्त्री योगी प्रेक्षागृहपरिसरात् मिशन-शक्तेः षष्ठ-चरणस्य अन्तर्गतं जागरूकता-शोभायात्राया: शुभारम्भम् अकरोत्। अस्यां शोभायात्रायां पञ्चशतानि द्विचक्रिका-वाहनानि सम्मिलितानि आसन्।

जागरूकताशोभायात्रायां हरितध्वजं प्रदर्श्य प्रस्थापयित्वा मुख्यमन्त्री सामाजिक-माध्यमे प्रकाशिते सन्देशे अवदत्, “द्वि-इञ्जिनयुक्तः सर्वकारः मातृशक्तेः सुरक्षां, सम्मानं, स्वावलम्बनं च सुनिश्चितं कर्तुं पूर्णप्रतिबद्धतया कार्यं कुर्वन् अस्ति। नारीसशक्तीकरणमेव सुरक्षितस्य, समृद्धस्य, विकसितस्य च उत्तरप्रदेशस्य आधारशिला अस्ति।”

जागरूकताशोभायात्राया: शुभारम्भावसरे प्रदेशसर्वकारस्य कृषिमन्त्री सूर्यप्रताप-शाही, सांसदः रविकिशनशुक्लः, महापौरः डॉ. मङ्गलेशश्रीवास्तवः, विधायकाः फतेहबहादुरसिंहः, श्रीरामचौहानः, विपिन-सिंहः, महेन्द्रपालसिंहः, डॉ. विमलेश-पासवानः, प्रदीपशुक्लः, विधान-परिषद्सदस्यः डॉ. धर्मेन्द्रसिंहः, सर्वण-निषादः, राज्य-महिला-आयोगस्य उपा-ध्यक्षा चारूचौधरी च उपस्थिताः आसन्। तैः सह प्रशासनस्य आरक्षकबलस्य च वरिष्ठाधिकारिणः अपि उपस्थिताः आसन्।

Hindusthan Samachar / Divya Ranjan