गांधीनगरम्, 15 अक्टूबरमासः (हि.स.)।

१७ तमायाः अखिलभारतीयायाः अन्तरसाई कबड्डीप्रतियोगितायाः २०२६–२७ तमस्य वर्षस्य महिलावर्गे समूहबीमध्ये कोल्लमदलेन स्वर्णपदकं विजितम्। एषा प्रतियोगिता गुजरातराज्यस्य गान्धीनगरनगरे आयोजिता।

महिलावर्गे क्रीडिकाभिः उत्कृष्टक्रीडाकौशलस्य, सामूहिकसमन्वयस्य, क्रीडाभावनायाश्च प्रदर्शनं कृत्वा प्रथमं स्थानं प्राप्तम्। कोकराझारक्रीडाप्रशिक्षणकेन्द्रेण द्वितीयं स्थानं प्राप्य रजतपदकं विजितम्, यदा तु मयिलादुथुराईक्रीडाप्रशिक्षणकेन्द्रेण तृतीयं स्थानं प्राप्य कांस्यपदकं प्राप्तम्।

प्रतियोगितायाः अवधौ दलैः प्रभावशालिनः आक्रमणस्य, सुदृढरक्षणस्य, रणनीतिकावबोधस्य, उत्कृष्टक्रीडाभावनायाश्च परिचयः प्रदत्तः। क्रीडिकानां प्रदर्शनात् तासां परिश्रमः, अनुशासनं, समर्पणं च स्पष्टतया परिलक्षितम्। एषा प्रतियोगिता युवा क्रीडिकाभ्यः राष्ट्रियस्तरे स्वप्रतिभां प्रदर्शयितुं, महत्त्वपूर्णानां स्पर्धानां अनुभवम् अवाप्तुं, उच्चस्तरीयप्रतियोगितानां कृते स्वसज्जतां सुदृढां कर्तुं च अवसरं प्रददाति। एतादृशाः आयोजनाः भारतीयक्रीडाप्राधिकरणस्य अन्तर्गतं कबड्डीक्रीडायाः प्रतिस्पर्धात्मकस्तरं सुदृढं कर्तुं महत्त्वपूर्णां भूमिकां निर्वहन्ति।

१७ तमायाः अखिलभारतीयायाः अन्तरसाई कबड्डीप्रतियोगितायाः २०२६–२७ तमस्य वर्षस्य आयोजनं युवा क्रीडाप्रतिभानाम् उत्साहवर्धनाय तथा व्यवस्थितप्रशिक्षणस्य प्रतिस्पर्धात्मकावसराणां च माध्यमेन क्रीडासु उत्कृष्टतायाः संवर्धनाय महत्त्वपूर्णं मञ्चम् अस्ति। अस्याः उपलब्धेः कृते भारतीयक्रीडाप्राधिकरणेन सर्वेभ्यः पदकविजेतृभ्यः क्रीडकेभ्यः, प्रशिक्षकेभ्यः, सहायककर्मचारिभ्यश्च तेषां सफलतायाः योगदानस्य च कृते अभिनन्दनं प्रेषितम्।

---------------

Hindusthan Samachar / Dheeraj Maithani