Enter your Email Address to subscribe to our newsletters
जम्मूः, 15 अक्टूबरमासः (हि.स.)। जम्मूनगरे स्थिते गवर्नमेंट जीजीएम साइंस महाविद्यालये ‘मनोदर्पण’ मनोवैज्ञानिकपरामर्शप्रकोष्ठस्य पक्षतः विद्यार्थिनां मानसिकस्वास्थ्यस्य, भावनात्मकदृढतायाः समग्रकल्याणस्य च संवर्धनार्थं व्यक्तिगतपरामर्शसत्राणाम् आयोजनं कृतम्।
महाविद्यालयस्य प्राचार्यस्य डॉ. रोमेश कुमार गुप्तस्य नेतृत्वे आयोजिते कार्यक्रमे मनोवैज्ञानिकपरामर्शविशेषज्ञा डॉ. शबीला वानी विद्यार्थिभ्यः मार्गदर्शनम् अयच्छत्। प्रायः २० पञ्जीकृतविद्यार्थिनः गोपनीयेषु व्यक्तिगतपरामर्शसत्रेषु भागं गृहीत्वा स्वकीयाः शैक्षणिकाः, व्यक्तिगताः, मनोवैज्ञानिकाश्च समस्याः चर्चितवन्तः।
प्रकोष्ठस्य संयोजकः प्रो. बल कृष्णः स्वागतोद्बोधने अवदत् यत् महाविद्यालयपरिसरे एतादृशं सहयोगपूर्णं वातावरणं भवितव्यम्, यत्र विद्यार्थिनः निःसङ्कोचं स्वसमस्यानां विषये चर्चां कर्तुं शक्नुयुः। डॉ. शबीला वान्या विद्यार्थिभ्यः तनावप्रबन्धनस्य, आत्मपरिचर्यायाः, शैक्षणिकदबावस्य सामना कर्तुं तथा भावनात्मकदृढतायाः विकासस्य उपायाः कथिताः।
प्राचार्यः डॉ. रोमेश कुमार गुप्तः विद्यार्थिनां कल्याणं समग्रशिक्षायाः महत्त्वपूर्णम् अङ्गम् इति प्रतिपादयन् अवदत् यत् समये हस्तक्षेपः तथा सुलभः व्यावसायिकपरामर्शः मानसिकस्वास्थ्यसम्बद्धानां समस्यानां निवारणे महत्त्वपूर्णां भूमिकां निर्वहति। कार्यक्रमस्य आयोजने डॉ. मतीन हफीजः, डॉ. निशा, डॉ. अरुण कुमार शर्मा, डॉ. अर्जुन सिंह राठौरः, प्रो. सुशील कुमारः तथा डॉ. ज्योतदीप कौरः सहकारिताम् अकुर्वन्।
अस्य प्रयत्नस्य उद्देश्यम् मानसिकस्वास्थ्यसम्बद्धानां समस्यानां विषये मुक्तरूपेण चर्चां कर्तुं प्रोत्साहनं दातुं तथा विद्यार्थिभ्यः आवश्यकं सहकारं परामर्शं च उपलब्धं कारयितुम् आसीत्।
Hindusthan Samachar / Dheeraj Maithani