Enter your Email Address to subscribe to our newsletters
दरभंगा, 16 अक्टूबरमासः (हि.स.)।
दरभङ्गाजनपदस्य बेनीपुरस्थे प्रसिद्धे आध्यात्मिकस्थले गुरुशान्तिधाम्नि शारदीयनवरात्रस्य पञ्चम्यां तिथौ गुरुवासरे १०५१ कलशानां विशेषपूजाऽर्चना वैदिकमन्त्राणाम् उच्चारणमध्ये श्रद्धापूर्वकं सम्पन्ना। धाम्नः महामण्डलेश्वरस्य स्वामिनः लक्ष्मणानन्दसरस्वतीमहाराजस्य सान्निध्ये आयोजिते अस्मिन् धार्मिकानुष्ठाने बहुसङ्ख्याकाः श्रद्धालवः भागं गृह्णन्ति।
धामपरिसरे निर्मिते विशेषपूजामण्डपे अखण्डदीपः निरन्तरं प्रज्वलति। अयं श्रद्धालूनां कृते आस्थायाः श्रद्धायाश्च प्रमुखं केन्द्रं वर्तते। पूजामण्डपे प्रवेशार्थं पारम्परिकाः नियमाः निर्धारिताः सन्ति। श्रद्धालवः धौतकंचुके धृत्वा शिरसि पागवस्त्रं धारयित्वा एव प्रवेशस्य अनुमतिं प्राप्नुवन्ति। एतया व्यवस्थया आयोजने प्राचीनवैदिकपरम्परायाः सह मिथिलायाः सांस्कृतिकवैभवस्य दृश्यम् अपि दृश्यते।
पूजामण्डपे विद्वद्भिः पण्डितैः दुर्गासप्तशत्याः निरन्तरं पाठः क्रियते। तत्रैव श्रद्धालवः मण्डपस्य परिक्रमां कृत्वा सुखसमृद्धिशान्तीनां लोककल्याणस्य च कामनां कुर्वन्ति। पारम्परिकविधिविधानेन सम्पन्नायाम् अस्यां विशेषकलशपूजायां श्रद्धालूनाम् उत्साहः वर्तते।
शारदीयनवरात्रस्य प्रथमदिने गुरुशान्तिधाम्नः १०५१ कलशानां भव्यशोभायात्रा निष्क्रामति। अस्मिन् धार्मिकायोजने भागं ग्रहीतुं बिहारस्य विभिन्नजनपदेभ्यः, देशस्य अन्येभ्यः भागेभ्यः, समीपस्थात् नेपालदेशाच्च श्रद्धालवः आगच्छन्ति। श्रद्धालवः पूर्णभक्तिभावेन पूजाऽर्चनायाम् अन्येषु धार्मिककार्यक्रमेषु च भागं गृह्णन्ति।
अस्य धार्मिकमहोत्सवस्य सफलायोजने स्वामी सदानन्दसरस्वती, स्वामी दिव्यानन्दसरस्वती, शङ्करकुमारः इत्यादयः धाम्नः अन्ये सेवकाः च सक्रियतया संलग्नाः सन्ति।
---------------
Hindusthan Samachar / Dheeraj Maithani