मातुः कात्यायन्याः दर्शनार्थं पङ्क्तयः, अष्टभुजायाः महाकाल्याश्च दर्शनं कृत्वा भक्तैः कृता त्रिकोणपरिक्रमा

मीरजापुरम्, १६ अक्टोबरमासः (हि.स.)। शारदीयनवरात्रस्य षष्ठ्यां शुक्रवासरे विन्ध्यधाम्नि श्रद्धालूनां महाजनसमागमः अभवत्। प्रातःकालादेव मन्दिरं प्रति गमनमार्गाः भक्तैः पूर्णतया समाकीर्णाः अभवन्। मङ्गलारत्यनन्तरं मन्दिरस्य कपाटोद्घाटनेन सह दर्शनपूजनस्य क्रमः प्रारब्धः। पुष्पैः रत्नजटिताभरणैश्च सुसज्जितायाः मातुः विन्ध्यवासिन्याः मनोहारिणीं मूर्तिं दृष्ट्वा भक्ताः भावविभोराः अभवन्।

देशस्य विभिन्नेभ्यः प्रदेशेभ्यः समागताः श्रद्धालवः मातुः कात्यायन्याः स्वरूपस्य दर्शनं कृत्वा नारिकेलं, चुनरीवस्त्रं प्रसादं च समर्पितवन्तः। दर्शनात् पूर्वं भक्ताः गङ्गाघाटेषु स्नानम् अकुर्वन्। मातुः विन्ध्यवासिन्याः दर्शनानन्तरं बहुसङ्ख्याकाः श्रद्धालवः अष्टभुजापर्वते स्थितायाः मातुः अष्टभुज्याः महाकाल्याश्च मन्दिरं प्राप्तवन्तः। उभयोः देव्योर् दर्शनं कृत्वा भक्तैः त्रिकोणपरिक्रमा सम्पूर्णा कृता।

नवरात्रोत्सवस्य कारणात् विन्ध्यधाम्नः वीथयः मन्दिरपरिसरश्च पुष्पैः वर्णवर्णाभिः विद्युद्दीप्तिभिश्च अलङ्कृताः सन्ति। देवीमन्दिराणाम् आसपासं साधकाः वैदिकमन्त्राणाम् उच्चारणमध्ये पूजनानुष्ठानेषु निरताः आसन्। मातुः जयघोषैः सम्पूर्णं धाम निनादितम् अभवत्।

मेलायाम् आगतानां श्रद्धालूनां सुविधायै सुरक्षायै च जनपदप्रशासनस्य अधिकारिणः क्षेत्रस्य भ्रमणं कृत्वा व्यवस्थानां निरीक्षणं कुर्वन्तः आसन्। श्रीविन्ध्यपण्डासमाजस्य पदाधिकारिणः अपि श्रद्धालूनां सेवायां निरताः आसन्।

Hindusthan Samachar / Dheeraj Maithani