लखनऊम्, १६ अक्टूबर (हि.स.)। रक्षामन्त्री राजनाथसिंहः गुरुवासरे लखनऊमहानगरे विपक्षिणं दलं प्रति आक्षेपान् कुर्वन् अवदत् यत् कांग्रेसदलम् देशं हिंसाया अराजकतायाश्च वह्नौ प्रक्षेप्तुम् इच्छति। महात्मगान्धिनः राजनैतिकम् उत्तराधिकारित्वं स्वीकुर्वती कांग्रेस हिंसाम् अराजकतां च आश्रित्य ‘सत्तापरिवर्तनम्’ इत्यादीनां विषयाणाम् उल्लेखेन स्वकीयस्य राजनैतिकपराजयस्य प्रतिशोधं देशात् ग्रहीतुम् इच्छति। रक्षामन्त्री स्वस्य संसदीयक्षेत्रस्य लखनऊस्य प्रवासस्य द्वितीयदिने प्रदेशभाजपामुख्यालये आयोजितायां पत्रकारसम्मेलनसभायां सम्बोधनं कुर्वन् एतानि वक्तव्यानि दत्तवान्।

राजनाथसिंहः अवदत् यत् कांग्रेसदलम् यथा बाङ्ग्लादेशसदृशीः परिस्थितीः भारते जनयितुं स्वप्नं पश्यति, तेन स्पष्टं भवति यत् कांग्रेसदलेन ‘गान्धी’ इति नाम्नः प्रयोगस्य नैतिकाधारः परित्यक्तः अस्ति। उत्तरप्रदेशे कांग्रेसदलम् सप्तत्रिंशत् वर्षेभ्यः सत्तायाः बहिः वर्तते। एतत् जनतायाः मतानां कथितायाः चौर्यघटनायाः कारणेन अभवत् अथवा कांग्रेसदलस्य कार्यविमुखतायाः प्रशासनिकविफलतायाश्च कारणेन, इति प्रदेशस्य देशस्य च जनाः सम्यक् अवगच्छन्ति।

राजनाथसिंहः अवदत् यत् उत्तरप्रदेशस्य चौरीचौरानगरे आङ्ग्लशासनकाले हिंसात्मकघटना घटितवती। तदनन्तरं महात्मगान्धिना सम्पूर्णम् असहयोगान्दोलनं प्रत्याहृतम्। सः अवदत् यत् ‘सत्तापरिवर्तनम्’, ‘प्रतिरोधः’ तथा ‘संसदि न, अपितु मार्गे एव समाधानं अन्वेष्टव्यम्’ इत्यादीनि घोषवाक्यानि वक्तव्यानि च स्पष्टयन्ति यत् दिल्लीनगरे यत् किमपि प्रचलति, तत् राजनैतिकसमाधानस्य अन्वेषणस्य स्थाने अराजकतामाध्यमेन भारतस्य प्रगतिं बाधितुं कृतः निन्दनीयः प्रयासः अस्ति।

रक्षामन्त्री अवदत् यत् भारतस्य प्रगत्या वैश्विकक्षेत्रे वर्धमानेन प्रभावेण च अनेकाः शक्तयः असहजताम् अनुभवितुं शक्नुवन्ति। निर्वाचनासु निरन्तरं पराजयं प्राप्यमाणाः केचन राजनैतिकदलाः अद्य जानीमः अथवा अजानन्तः एतादृशानां शक्तीनां हस्तेषु क्रीडन्ति इव दृश्यन्ते, इति देशेन अवगन्तव्यम्। सः अवदत् यत् रक्षोत्पादनक्षेत्रे भारतेन उल्लेखनीया सफलता प्राप्ता अस्ति। आत्मनिर्भरत्वस्य दिशि अग्रे गच्छन्तः वयं सम्प्रति रक्षोत्पादानाम् निर्यातकदेशरूपेण अपि स्वकीयाम् अभिज्ञां स्थापयितुं सफलाः अभवामः। प्रधानमन्त्री नरेन्द्रमोदिनः नेतृत्वे अन्तर्राष्ट्रीयक्षेत्रे भारतस्य प्रतिष्ठा वर्धिता, भारतस्य विश्वसनीयता च सुदृढा जाता।

राजनाथसिंहः अवदत् यत् वयं कदापि देशस्य निर्वाचनव्यवस्थायाः विषये सन्देहं न कृतवन्तः। वयं कदापि संवैधानिकसंस्थानां प्रतिष्ठां मलिनीकर्तुं प्रयासं न कृतवन्तः। जनान् भ्रमितुं प्रयत्नम् अपि कदापि न कृतवन्तः। वयं सर्वदा देशस्य जनानां, संविधानस्य, संवैधानिकसंस्थानां च सम्मानं कृतवन्तः। भारतस्य भविष्यं वयम् सर्वेषां सामूहिकी दायित्वम् अस्ति। अस्माभिः संघर्षस्य स्थाने संवादस्य राष्ट्रनिर्माणस्य च मार्गः स्वीकरणीयः।

रक्षामन्त्री अवदत् यत् राहुलगान्धिना लोकतन्त्रस्य रक्षायाः नाम्ना ‘व्यवधानस्य राजनीतिम्’ आचरितुं त्यक्त्वा जनमतस्य सम्मानं कुर्वता स्वकीयायाः राजनैतिकभूमिकायाः विषये आत्मचिन्तनं कर्तव्यम्। भारतस्य लोकतान्त्रिकसंस्थाः राजनैतिकस्वार्थानां बलिं कर्तुं न शक्यन्ते। मिथ्याक्रोधेन, संस्थानां प्रतिष्ठां मलिनीकर्तुं प्रयत्नैः, राजनैतिकावसरवादेन च भारतस्य विकासयात्रा बाधितुं न शक्यते। राहुलगान्धिना तस्य सहयोगिभिश्च अवगन्तव्यं यत् लोकतन्त्रम् अराजकतां प्रसारयितुं, संवैधानिकसंस्थानां विश्वसनीयतायाः उपरि प्रहारं कर्तुं अथवा भारतस्य विकासयात्रायां विघ्नम् उत्पादयितुं अनुमतिपत्रं नास्ति। यदा राजनैतिकस्वार्थः सत्यात् राष्ट्रियहिताच्च श्रेष्ठः मन्यते, तदा लोकतान्त्रिकविमर्शः तथ्यतर्कयोः स्थाने दुराग्रहस्य दुष्प्रचारस्य च शिकारः भवति।

‘सत्तापरिवर्तनम्’ इत्यादीनां शब्दानां प्रयोगः स्पष्टयति यत् तेषां संघर्षः सुधारार्थं नास्ति, न च विशेषगहनपुनरीक्षणस्य (एस.आइ.आर.) कृते अस्ति। ज्ञानेशकुमारस्य विषये अपि तेषां संघर्षः नास्ति, न च देशस्य युवानां उज्ज्वलभविष्यस्य कृते अस्ति। अपितु देशे अराजकतां जनयित्वा केनापि प्रकारेण सत्तां प्राप्तुं कृतायाः तेषां कूटयोजनायाः अयं भागः अस्ति। राजनाथसिंहः अवदत् यत् ते सर्वसम्मुखं दृढस्वरेण सर्वकारं पातयितुं वदन्ति। एतेन स्पष्टं भवति यत् लोकतान्त्रिकसंस्थानां विनाशः देशे च अशान्तेः प्रसारः एव तेषाम् एकमात्रम् उद्देश्यम् अस्ति।

रक्षामन्त्री अवदत् यत् देशस्य युवानः अराजकतायाः राजनीतेः साधनरूपेण प्रयोक्तुं प्रयासः क्रियते। एतादृशं दृश्यते यत् कांग्रेसदलम् तस्य राजनैतिकसहयोगिनश्च प्रत्यक्षतया तथा स्वसमर्थकसङ्गठनानां माध्यमेन युवानां शक्तिं रचनात्मककार्येषु राष्ट्रनिर्माणे च विनियोजयितुं स्थाने राजनैतिकसंघर्षस्य अराजकतायाश्च प्रसारस्य साधनं कुर्वन्ति।

पत्रकारसम्मेलने उत्तरप्रदेशस्य उपमुख्यमन्त्री ब्रजेशपाठकः, भाजपायाः प्रदेशाध्यक्षः पङ्कजचौधरी तथा दलस्य अन्ये नेतारः उपस्थिताः आसन्।

Hindusthan Samachar / Dheeraj Maithani