काठमांडूः, 17 अक्टूबरमासः (हि.स.)।

नेपालक्रिकेटसङ्घेन सूचितं यत् नेपालप्रीमियरलीग् (एनपीएल) इत्यस्य आयोजनाय अन्ताराष्ट्रियक्रिकेटपरिषदः (आईसीसी) आधिकारिकानुमतिः प्राप्ता अस्ति। आईसीसी इत्यस्य नियमानुसारं एनपीएल इत्यस्यां प्रतियोगितायां भागं गृह्णन्तः सर्वे विदेशीयक्रीडकाः स्वस्वक्रिकेटमण्डलेभ्यः अनापत्तिप्रमाणपत्रम् (एनओसी) अनिवार्यतया प्राप्नुयुः। प्रतियोगितायाः निष्पक्षतां सुनिश्चितुं आईसीसी इत्यस्य भ्रष्टाचारनिरोधकसंहिता कठोरतया कार्यान्विता भविष्यति।

शनिवासरे कीर्तिपुरस्थे त्रिभुवनविश्वविद्यालयस्य क्रिकेटक्रीडाङ्गणे आयोजितायां पत्रकारसम्मेलने कैन इत्यस्य सचिवः पारसखड्का अवदत् यत् आईसीसी इत्यस्य अनुमतिप्राप्त्या एनपीएल इत्यस्य प्रतिष्ठायाः विश्वसनीयतायाश्च अन्तरराष्ट्रीयस्तरे मान्यता प्राप्स्यते।

आईसीसी इत्यस्य प्रावधानानुसारं प्रतियोगितायाः प्रारम्भात् पूर्ववर्तिषु षट्सु मासेषु कस्यामपि अवैधायाम् अथवा अननुमोदितायां क्रिकेटप्रतियोगितायां भागं गृहीतवन्तः क्रीडकाः एनपीएल इत्यस्यां भागं ग्रहीतुं पात्राः न भविष्यन्ति।

अन्तरराष्ट्रीयक्रिकेटात् निवृत्तिं प्राप्तवन्तः विदेशीयक्रीडकाः अपि स्वकीयैः घरेलूक्रिकेटमण्डलैः सह समन्वयं कृत्वा अनापत्तिप्रमाणपत्रस्य प्रक्रियां सम्पूर्णां कुर्युः। कैन इत्यनेन उक्तं यत् फ्रेञ्चाइजीक्रिकेटे मैचफिक्सिङ्ग् तथा स्पॉटफिक्सिङ्ग् इत्यनयोः जोखिमः अधिकः भवति। अतः सम्पूर्णप्रतियोगितायाः अवधौ आईसीसी इत्यस्य भ्रष्टाचारनिरोधकविभागस्य (एसीयू) नियमानां पूर्णतया पालनं कारयिष्यते।

नेपालदेशे अस्मिन् विषये पृथक् विधिनिर्माणस्य प्रक्रिया प्रचलति। तथापि एनपीएल इत्यस्य आयोजनकाले अन्वेषणस्य कार्यवाहीविषयकस्य च क्षेत्रस्य निर्धारणम् आईसीसी इत्यस्य अन्तरराष्ट्रीयाचारसंहितानुसारं भविष्यति। कैन इत्यस्य अनुसारम् अनेन क्रीडकाः, दलस्वामिनः, अन्ये सम्बन्धितपक्षकाराश्च अधिकं सतर्काः उत्तरदायिनश्च भवितुम् अर्हन्ति।

एनपीएल इत्यस्मै आधिकारिकटी-२० मान्यताप्रदानस्य विषये आईसीसी इत्यनेन सह औपचारिकपत्रव्यवहारः सम्पन्नः अस्ति। कैन इत्यनेन सूचितं यत् अस्मिन् विषये प्राविधिकस्पष्टीकरणं सोमवासरपर्यन्तं प्राप्तुं सम्भावना अस्ति।

प्रतियोगितायां निर्णयपुनरावलोकनप्रणाल्याः (डीआरएस) कार्यान्वयनस्य प्रक्रिया अपि अन्तिमचरणे अस्ति। सचिवः पारसखड्का इत्यस्य अनुसारम् आगामीषु द्वित्रेषु दिनेषु अस्मिन् विषये आधिकारिकनिर्णयस्य घोषणा भविष्यति।

क्रीडाङ्गणे एकादशक्रीडकेषु चत्वारः विदेशीयाः सप्त नेपालीयाश्च अनिवार्याः

एनपीएल इत्यस्य प्रत्येकं फ्रेञ्चाइजीदलं स्वदले अधिकतमम् अष्ट विदेशीयक्रीडकान् अनुबन्धितुं शक्नोति। तथापि क्रीडाङ्गणे क्रीडमानस्य एकादशक्रीडकानां दले सप्त नेपालीयाः चत्वारः विदेशीयक्रीडकाः च अनिवार्यतया समावेशनीयाः भविष्यन्ति।

काठमाण्डूनगरे आईसीसी एशियासम्मेलनम्

कैन इत्यनेन एतदपि सूचितं यत् आगामी नवम्बरमासस्य १९ दिनाङ्कात् २१ दिनाङ्कपर्यन्तं काठमाण्डूनगरे ‘आईसीसी एशियासम्मेलनम्’ आयोजयिष्यते।

त्रिदिवसीये अस्मिन् सम्मेलने एशियादेशानां टेस्ट् तथा एसोसिएट् श्रेणीनां क्रिकेटमण्डलानाम् अध्यक्षाः, सचिवाः, मुख्यकार्यकारी-अधिकारिणश्च भागं ग्रहीष्यन्ति। सम्मेलनावसरे एशियायाः क्रिकेटक्रीडायाः नीतिगतविकाससम्बद्धेषु विषयेषु चर्चा भविष्यति।

कैन इत्यस्य योजना विदेशीयप्रतिनिधिभ्यः एनपीएल इत्यस्य अन्तिमक्रीडां दर्शयितुम् अपि अस्ति, येन नेपालीयक्रिकेटस्य नेपालदेशस्य च आतिथ्यसामर्थ्यस्य अन्ताराष्ट्रियस्तरे प्रचारः

प्रसारश्च कर्तुं शक्येत।

---------------

Hindusthan Samachar / Dheeraj Maithani