ग्वालियरम्, १८ अक्टोबरमासः (हि.स.)। केन्द्रीयमन्त्री ज्योतिरादित्यसिन्धिया ग्वालियरस्य शीतलामातामन्दिरस्य समीपे गतायां रात्रौ अनियन्त्रितेन ट्रकयानेन पददलिताः १४ जनाः मृताः इति घटनां प्रति गहनं दुःखं प्रकटितवान्। सः एतां भीषणां दुर्घटनां पीडादायिनीं हृदयविदारिकां च वर्णयन् शोकसंवेदनाः प्रकटितवान्।

मातुः शीतलायाः दर्शनार्थम् आगतान् श्रद्धालून् पददलयन् अनियन्त्रितम् एतत् ट्रकयानं १४ जनानाम् प्राणान् अपाहरत्। राज्यसर्वकारेण मृतानां प्रत्येकं परिवाराय चतुर्लक्षरूप्यकाणि, गम्भीररूपेण आहतेभ्यः द्विलक्षरूप्यकाणि, अन्येभ्यः आहतेभ्यः पञ्चाशत्सहस्ररूप्यकाणि च आर्थिक-साहाय्यरूपेण दातुं घोषितम्। अस्मिन् दुर्घटनायां श्रद्धालूनाम् अकालमृत्युना केन्द्रीयमन्त्री सिन्धिया अत्यन्तं दुःखितः अस्ति।

सिन्दियः सामाजिकमाध्यमे अस्याः दुर्घटनायाः अत्यन्तं पीडादायिनीं हृदय-विदारिकां च घटनां वर्णयन् मातुः जगदम्बायाः प्रार्थनां कृतवान् यत् सा दिवङ्गतानाम् आत्मनः स्वश्रीचरणेषु स्थानं ददातु, शोकसन्तप्तेभ्यः परिजनेभ्यः असहनीयदुःखं सोढुं शक्तिं प्रयच्छतु, सर्वेभ्यः आहतेभ्यः च शीघ्रं स्वास्थ्यलाभं ददातु।

सिन्धिया उक्तवान् यत् अस्यां दुःखपूर्णायां वेलायां तस्य गहनाः संवेदनाः शोकाकुलपरिवारैः सह सन्ति। सः मध्यप्रदेशसर्वकारेण सह जनपदस्य प्रभारीमन्त्रिणा च निरन्तरं सम्पर्के अस्ति। तेन उक्तं यत् दुर्घटनायाः अनन्तरं राज्यसर्वकारेण मृतानां परिजनेभ्यः घातितेभ्यः च आर्थिकसाहाय्यं प्रदातुं तथा सर्वेषां घातितानां निःशुल्कचिकित्सां सुनिश्चितां कर्तुं निर्देशाः दत्ताः सन्ति।

मुख्यमन्त्री डॉ. मोहनयादवः मृतानां प्रत्येकं परिवाराय चतुर्लक्षरूप्यकाणि, गम्भीररूपेण आहतेभ्यः द्विलक्षरूप्यकाणि, अन्येभ्यः आहतेभ्यः पञ्चाशत्सहस्ररूप्यकाणि च आर्थिकसाहाय्यरूपेण दातुं घोषणां कृतवान्।

मुख्यमन्त्रिणा आर्थिकसाहाय्यस्य घोषणा कृता

ग्वालियरस्य दुर्घटनां प्रति मुख्यमन्त्री डॉ. मोहनयादवः अपि गहनं दुःखं प्रकटितवान्। तेन उक्तं यत् अस्यां दुःखपूर्णायां वेलायां राज्यसर्वकारः सर्वेषां प्रभावितपरिवाराणां पृष्ठे दृढतया तिष्ठति। मुख्यमन्त्रिणा राज्यसर्वकारस्य पक्षतः मृतानां परिजनेभ्यः चतुर्लक्षरूप्यकाणि, गम्भीररूपेण आहतेभ्यः द्विलक्षरूप्यकाणि, अन्येभ्यः आहतेभ्यः पञ्चाशत्सहस्ररूप्यकाणि च आर्थिक-साहाय्यं दातुं निर्देशाः दत्ताः। सर्वेषाम् आहतानां निःशुल्कचिकित्सा अपि करिष्यते।

प्रभावितपरिवाराणां स्थितेः अवलोकनाय आवश्यकसाहाय्यस्य च व्यवस्थापनाय मुख्यमन्त्रिणा मन्त्री ऐदलसिंहकंसाना तथा राकेशशुक्ला इत्येतौ ग्वालियरं गन्तुं निर्देशितौ। प्रभावितपरिवाराः ग्वालियर-शिवपुरी-श्योपुरजनपदेभ्यः सन्ति इति सूचितम्। मुख्यमन्त्री स्वसन्देशे दिवङ्गतेभ्यः श्रीमहाकालस्य चरणयोः स्थानं, परिजनेभ्यः दुःखं सोढुं शक्तिं, आहतेभ्यः शीघ्रं स्वास्थ्यलाभं च प्रदातुं बाबा महाकालं प्रार्थितवान्।

अर्धरात्रेः अनन्तरं मन्दिरद्वारे आक्रन्दः

शनिवासर-रविवासरयोः मध्यरात्रौ प्रायः १:३० वादने चीनौरमार्गस्य अवनति-स्थानस्य समीपे दुर्घटना अभवत्। सप्तम्याः पर्वणि शीतलामातामन्दिरे दर्शनार्थं बहु-सङ्ख्यकाः श्रद्धालवः आगतवन्तः आसन्। मन्दिरं परितः प्रसादस्य पूजासामग्रीणां च आपणाः स्थापिताः आसन्। एतस्मिन्नेव समये चीनौरदिशः आगच्छन् भारीवस्तुभिः पूर्णं ट्रकयानम् अवनतिमार्गे अनियन्त्रितम् अभवत्।

ट्रकः मार्गे स्थापितान् आरक्षकाणां अवरोधकान् भग्नान् कुर्वन् अग्रे अगच्छत् तथा आपणान् श्रद्धालून् च स्वाधीनान् कृत्वा पददलितवान्। अन्ते वाहनं मन्दिरस्य मुख्यप्रवेशद्वारस्य भित्तौ अभिहतम्। आघातः एतावान् भीषणः आसीत् यत् भित्तिः अपतत् तथा बहवः जनाः ट्रकस्य भग्नावशेषाणां च अधः निपीडिताः अभवन्। घटनास्थले सर्वत्र आक्रन्दः कोलाहलश्च अभवत्। स्थानीयजनाः आरक्षकैः प्रशासनिकाधिकारिभिः च सह उद्धारकार्यं प्रारब्धवन्तः तथा आहतान् चिकित्सालयान् प्रापितवन्तः।

जनपदप्रशासनेन दुर्घटनायां १४ जनानां मृत्योः पुष्टिः कृता। घातितानां विभिन्नेषु चिकित्सालयेषु चिकित्सा प्रचलति। मृतकेषु बालकाः, किशोराः, महिलाः, वृद्धाश्च सन्ति। चिकित्सालयेषु परिजनाः स्वकीयजनानाम् अन्वेषणं कुर्वन्तः आसन्। अनेकेषां परिवाराणां कृते धार्मिकपर्व दुःखपूर्णे प्रसङ्गे परिणतम्।

सुरक्षाव्यवस्थायाः विद्यमानत्वेऽपि कथं मन्दिरं प्राप्तवत् ट्रकयानम्?

दुर्घटनायाः अनन्तरं मन्दिरमार्गे यातायातनियन्त्रणस्य श्रद्धालूनां सुरक्षायाः च व्यवस्थां प्रति गम्भीराः प्रश्नाः उत्पन्नाः सन्ति। आरक्षी अधीक्षकः धर्मवीरसिंहयादवः उक्तवान् यत् श्रद्धालूनां जनसम्मर्दं दृष्ट्वा मन्दिरं प्रति गच्छति मार्गे भारीवाहनानां आवागमनं निवारयितुं व्यवस्था कृता आसीत्। तथापि ट्रकः अवरोधकान् भग्नान् कृत्वा मन्दिरस्य प्रवेशद्वारपर्यन्तं प्राप्तवान्। दुर्घटनायां कर्तव्ये नियुक्तौ द्वौ आरक्षकौ एकः गृहरक्षकसैनिकश्च अपि आहताः अभवन्।

जनपदाधिकारी रुचिकाचौहानस्य कथना-नुसारं ट्रकः अवनतिमार्गे अनियन्त्रितः भूत्वा मन्दिरस्य दिशि आगतवान् तथा घटनास्थले अवरोधकाः भग्नाः प्राप्ताः। दुर्घटनायाः कारणानां सुरक्षाव्यवस्थायां सम्भावितायाः त्रुटेश्च अन्वेषणं क्रियते।

Hindusthan Samachar / Divya Ranjan