किशनगंजः, 19 अक्टूबरमासः (हि.स.)।शारदीयनवरात्रस्य महानवम्याः पुण्यावसरे सोमवासरे किशनगञ्जनगरस्य रुईधासास्थिते महाकालमन्दिरे दुर्गायाः नवमस्वरूपायाः भगवत्याः सिद्धिदात्र्याः विधिविधानपूर्वकं पूजनार्चनं कृतम्। मन्दिरपरिसरः वैदिकमन्त्राणाम् उच्चारणेन, घण्टानिनादेन, भगवत्याः जयघोषैश्च भक्तिमयः अभवत्। भगवत्याः दर्शनार्थं पूजार्थं च प्रातःकालादेव श्रद्धालूनाम् आगमनक्रमः प्रारब्धः, यः दिवसभरं निरन्तरम् अभवत्।

महानवम्याः पावनावसरे हवनानुष्ठानं प्रति अपि श्रद्धालुषु विशेषोत्साहः दृष्टः। महाकालमन्दिरस्य पुरोहितस्य गुरोः साकेतस्य सान्निध्ये धार्मिकानुष्ठानानि सम्पन्नानि।

श्रद्धालवः भगवत्याः सिद्धिदात्र्याः समक्षं नतमस्तकाः भूत्वा स्वपरिवारस्य सुखशान्त्यै, समृद्धये, सुखसमृद्धिपूर्णजीवनाय च प्रार्थितवन्तः। नवरात्रेः अन्तिमे दिवसे मन्दिरे भक्तिमयः वातावरणः विराजमानः आसीत्।

किशनगञ्जनगरात् अतिरिक्तं समीपस्थेभ्यः क्षेत्रेभ्यः अपि बहुसङ्ख्याकाः श्रद्धालवः भगवत्याः दर्शनार्थम् आगतवन्तः।

पुरोहितः गुरुः साकेतः अवदत् यत् नवरात्रेः महानवमी भगवत्याः सिद्धिदात्र्याः आराधनायै समर्पिता अस्ति। धार्मिकमान्यतानुसारं भगवत्याः सिद्धिदात्र्याः आराधनेन भक्तेभ्यः सिद्धीनां, ज्ञानस्य, मनोवाञ्छितफलस्य च प्राप्तिः भवति।

महानवम्यां हवनस्य, कन्यापूजनस्य, भगवत्यै विशेषनैवेद्यसमर्पणस्य च परम्परा अस्ति। श्रद्धालवः कन्याः देव्याः स्वरूपं मत्वा तासां पूजनं कुर्वन्ति, ताभ्यः भोजनं प्रदाय आशीर्वादं च प्राप्नुवन्ति।

तेन उक्तं यत् भगवत्यै सिद्धिदात्र्यै हलवा, पूरिका, कृष्णचणकानां च नैवेद्यं समर्पयितुं परम्परा प्रचलिता अस्ति। मान्यता अस्ति यत् ये भक्ताः शुद्धेन मनसा भगवत्याः आराधनां कुर्वन्ति, तेषु भगवत्याः कृपा निरन्तरं वर्तते। रुईधासास्थिते महाकालमन्दिरे भगवत्याः दुर्गायाः पूजनार्चनेन सह महाकालबाबा इत्यस्य अपि नित्यं पूजनं क्रियते। सन्ध्यारत्याः समये श्रद्धालवः एकत्र समागत्य भक्तिभावेन पूजां कुर्वन्ति।

महानवम्याः पुण्यावसरे मन्दिरे विशेषः धार्मिकोत्साहः दृष्टः। श्रद्धालवः भगवत्याः दुर्गायाः समक्षं समाजे शान्तेः, सद्भावस्य, सर्वेषां कल्याणस्य च कामनां कृतवन्तः।

Hindusthan Samachar / Dheeraj Maithani