- नवम्बरमासस्य ५ दिनाङ्कतः ८ दिनाङ्कपर्यन्तं ग्लास्गोनगरे भविष्यति प्रतियोगिता, विश्वपुलिस-अग्निशमन-क्रीडास्पर्धासु पूर्वं स्वर्णरजतपदके विजेता।

वाराणसी, १९ अक्टोबरमासः (हि.स.)। वाराणसीनगरस्य कराटेक्रीडकः गौरवमौर्यः स्कॉटलैण्डस्य ग्लास्गोनगरे आयोज्यमानायां द्वादश्यां राष्ट्रमण्डलीयकराटेप्रतियोगितायां २०२६ तमे वर्षे भारतस्य प्रतिनिधित्वं करिष्यति। नवम्बरमासस्य पञ्चमदिनाङ्कात् अष्टमदिनाङ्कपर्यन्तम् आयोज्यमानायाम् अस्यां प्रतिष्ठितायां प्रतियोगितायां गौरवस्य लक्ष्यं देशाय पदकं विजित्य अन्तरराष्ट्रीयमञ्चे राष्ट्रध्वजस्य गौरवं वर्धयितुम् अस्ति।

गौरवमौर्यः कराटेक्रीडायां राष्ट्रियस्तरे अन्ताराष्ट्रियस्तरे च स्वप्रतिभां सिद्धवान् अस्ति। तेन २०१९ तमे वर्षे चीनदेशे आयोजितायाम् अष्टादश्यां विश्वपुलिस-अग्निशमन-क्रीडास्पर्धायां रजतपदकं प्राप्तम्। ततः २०२२ तमे वर्षे नीदरलैण्ड्देशे आयोजितायां एकोनविंशत्यां विश्वपुलिस-अग्निशमन-क्रीडास्पर्धायां स्वर्णपदकं विजितम्। एतदतिरिक्तं सः अखिलभारतीयपुलिसक्रीडास्पर्धासु अपि स्वर्णपदकं प्राप्तवान्। २०१८ तमे वर्षे सः कराटे इण्डिया (केएआई) संस्थया आयोजितायाम् एकविंशतिवर्षाधः कनिष्ठराष्ट्रियकराटेप्रतियोगितायां रजतपदकं प्राप्तवान्।

भारततिब्बतसीमापुलिसबलस्य (आईटीबीपी) स्वकीयदायित्वानां निर्वहणेन सह गौरवः क्रीडायाः प्रति समर्पणेन नियमिताभ्यासेन च कराटेक्रीडायां विशिष्टां परिचितिं निर्मितवान्। तस्य उपलब्धयः निरन्तरपरिश्रमस्य, अनुशासनस्य, लक्ष्यं प्रति प्रतिबद्धतायाश्च प्रतीकानि सन्ति।

ग्लास्गोनगरे आयोज्यमाना एषा प्रतियोगिता गौरवाय अन्तरराष्ट्रीयस्तरे स्वप्रतिभाप्रदर्शनस्य अन्यः महत्त्वपूर्णः अवसरः भविष्यति। सः प्रतियोगितायां श्रेष्ठं प्रदर्शनं कृत्वा देशाय पदकं प्राप्तुं सङ्कल्पेन भागं ग्रहीष्यति। तस्याः उपलब्धेः कारणात् वाराणसीनगरस्य क्रीडाजगति अपि उत्साहः वर्तते।

गौरवमौर्यः अवदत्, “अन्ताराष्ट्रियमञ्चे भारतस्य राष्ट्रध्वजं गौरवेण उच्चं स्थापयितुं देशाय पदकं प्राप्तुं च मम लक्ष्यं वर्तते।” सः देशवासिभ्यः शुभकामनाः सहकारितां च प्रार्थयन् अवदत् यत् प्रतियोगितायां स्वस्य सर्वोत्तमं प्रदर्शनं कर्तुं सः प्रतिबद्धः अस्ति।

Hindusthan Samachar / Dheeraj Maithani