काकामिगाहारानगरम्, १ अक्टोबरमासः (हि.स.)। भारतीयपुरुष-हॉकीदलस्य प्रमुखः अग्रपङ्क्तिक्रीडकः मनदीपसिंहः गुरुवासरे महतीम् उपलब्धिं प्राप्य ३०० वरिष्ठान्ताराष्ट्रियक्रीडास्पर्धाः पूर्णवान्। जापानदेशस्य काकामिगाहारानगरे पाकिस्तानस्य विरुद्धम् एशियाई-क्रीडा-२०२६ इत्यस्य उपान्त्यचक्रस्य प्रतिस्पर्धायां सः एताम् उपलब्धिं प्राप्तवान्।

३१ वर्षीयः मनदीपः २०१३ तमे वर्षे १८ वर्षस्य वयसि वरिष्ठभारतीयदलस्य कृते पदार्पणं कृतवान्। हॉकी-इण्डिया-लीग्-स्पर्धायां केन्द्र-अग्रपङ्क्तिक्रीडकस्य रूपेण तस्य प्रभावशालिप्रदर्शनानन्तरं राष्ट्रियदले तस्य चयनम् अभवत्। ततः सः अनेकासु प्रमुखासु अन्ताराष्ट्रियक्रीडास्पर्धासु भारतस्य प्रतिनिधित्वं कृत्वा दलस्य सफलतासु महत्त्वपूर्णं योगदानं दत्तवान्।

तस्य अन्ताराष्ट्रिय-क्रीडाजीवनस्य प्रारम्भिकं महत्त्वपूर्णं सोपानं २०१६ तमे वर्षे अभवत्, यदा सः कनिष्ठविश्वचषक-विजयिनः भारतीयदलस्य सदस्यः आसीत्। ततः तस्य क्रीडाजीवनं ओलम्पिक्-क्रीडासु, एशियाई-क्रीडासु, राष्ट्रमण्डल-क्रीडासु तथा अन्यासु प्रमुखासु वैश्विक-महाद्वीपीय-स्पर्धासु प्राप्तैः अनेकैः पदकैः समृद्धम् अभवत्।

मनदीपः टोक्यो-२०२० तथा पेरिस्-२०२४ ओलम्पिक्-क्रीडयोः क्रमशः कांस्यपदकं विजितवतः भारतीयदलस्य सदस्यः आसीत्। एशियाई-क्रीडासु सः २०२३ तमे वर्षे हाङ्गचोउनगरे स्वर्णपदकविजयिनः दलस्य सदस्यः आसीत्, तथा २०१८ तमे वर्षे जकार्तानगरे एशियाई-क्रीडासु कांस्य-पदकविजयिनः भारतीयदलस्य अपि सदस्यः आसीत्।

तस्य पदकसङ्ग्रहे बर्मिङ्घम-२०२२ राष्ट्रमण्डल-क्रीडासु प्राप्तं रजतपदकं तथा २०१६ एवं २०१८ तमे वर्षे चॅम्पियन्स-ट्रॉफी-स्पर्धयोः प्राप्ते रजतपदके अपि अन्तर्भवतः। महाद्वीपीय-स्पर्धासु सः २०२५ तमे वर्षे एशिया-कप-स्पर्धायां स्वर्णपदकं तथा २०१३ तमे वर्षे रजतपदकं प्राप्तवान्। २०१८ तथा २०२३ तमे वर्षे एशियाई-चॅम्पियन्स-ट्रॉफी-विजयिनः भारतीयदलस्य सदस्यः अपि सः आसीत्।

भारतीयक्रीडाक्षेत्रे तस्य योगदानं दृष्ट्वा मनदीपः २०२१ तमे वर्षे प्रतिष्ठितेन अर्जुनपुरस्कारेण सम्मानितः अभवत्।

हॉकी-इण्डिया इत्यस्य अध्यक्षः डॉ. दिलीपः टिर्की मनदीपं अभिनन्द्य अवदत्, “३०० वरिष्ठान्तरराष्ट्रीयक्रीडास्पर्धाः पूर्णं कर्तुं शक्नुयात् इति अत्यन्तं गौरवपूर्णा उपलब्धिः अस्ति। एषा भारतीयहॉकीक्रीडां प्रति मनदीपस्य समर्पणस्य प्रमाणम् अस्ति। हॉकी-इण्डिया पक्षतः अहं तस्मै अस्याः विशेषोपलब्धेः कृते हार्दिकं अभिनन्दनं ददामि तथा भारतीयवेष्टने तस्य निरन्तरसफलप्रदर्शनस्य बहूनां स्मरणीयक्षणानां च कामनां करोमि।”

हॉकी-इण्डिया इत्यस्य महासचिवः भोला नाथसिंहः अपि मनदीपस्य अस्याः उपलब्धेः कृते अभिनन्दनं कृतवान्। सः अवदत्, “३०० वरिष्ठान्तरराष्ट्रीयक्रीडास्पर्धाः पूर्णाः कर्तुं शक्नुयात् इति दशकाधिक-कालव्यापिनः क्रीडाजीवनस्य एकम् अन्यत् महत्त्वपूर्णं सोपानम् अस्ति। सः अनेकासु प्रमुखासु अन्ताराष्ट्रियस्पर्धासु भारतस्य यात्रायाः महत्त्वपूर्णः भागः अभवत् तथा सः सर्वदा देशस्य गौरवेण प्रतिनिधित्वस्य दायित्वं निर्वहितवान्। हॉकी-इण्डिया इत्यस्य पक्षतः अहं मनदीपम् अभिनन्दामि तथा अन्ताराष्ट्रियहॉकीक्षेत्रे तस्य बहूनां सफलवर्षाणां कामनां करोमि।”

Hindusthan Samachar / Divya Ranjan