गान्धीजयन्त्यां मुक्तविश्वविद्यालये रामधुन्, वृक्षारोपणं स्वच्छताभियानं च

प्रयागराजः, ०२ अक्टोबरमासः (हि.स.)। उत्तरप्रदेशराजर्षिटण्डनमुक्तविश्वविद्यालयस्य कुलसचिवः कर्नल् विनयकुमारः उक्तवान् यत् महात्मागान्धिना सत्यं अहिंसा च स्वजीवनस्य आधारौ कृत्वा देशं स्वातन्त्र्यस्य मार्गं प्रदर्शितम्। तस्य जीवनात् एषा शिक्षा प्राप्यते यत् दृढसङ्कल्पेन, सत्येन शान्तिपूर्णप्रयासैश्च महत्तमपरिवर्तनमपि सम्भवं कर्तुं शक्यते। गान्धिनः विचाराः अद्यापि समाजाय प्रासङ्गिकाः सन्ति।

महात्मागान्धिनः जयन्त्याः अवसरे शुक्रवासरे उत्तरप्रदेशराजर्षिटण्डनमुक्तविश्वविद्यालयस्य त्रिवेणीसामुदायिककेन्द्रे, यमुनापरिसरे मानविकीविद्याशाखायाः तत्त्वावधाने रामधुन्, वृक्षारोपणं स्वच्छताभियानं च आयोजितम्। कार्यक्रमस्य शुभारम्भः महात्मागान्धिनः पूर्वप्रधानमन्त्रिणः लालबहादुरशास्त्रिणश्च चित्रयोः माल्यार्पणेन अभवत्।

कुलपतेः प्रो. अखिलेशकुमारसिंहस्य निर्देशानुसारम् आयोजिते कार्यक्रमे कुलसचिवः कर्नल् विनयकुमारः उक्तवान् यत् गान्धिना सत्याग्रहस्य, अहिंसायाः स्वदेशीयवस्तूनां च माध्यमेन अन्यायस्य विरोधस्य मार्गः प्रदर्शितः। तस्य जीवनं सरलतायाः, सत्यस्य सामाजिकदायित्वस्य च प्रेरणां ददाति। अस्माभिः तस्य आदर्शान् स्वव्यवहारे आचरितुं प्रयत्नः करणीयः।

पूर्वप्रधानमन्त्रिणं लालबहादुरशास्त्रिणं श्रद्धापूर्वकं स्मरन् कर्नल् विनयकुमारः उक्तवान् यत् शास्त्रीजी स्वस्य सरलतायै, ईमानदारितायै, दृढसङ्कल्पाय देशभक्त्यै च प्रसिद्धः आसीत्। तस्य जीवनं बोधयति यत् यथार्थं नेतृत्वं पदेन शक्त्या वा न, अपि तु ईमानदारिता, त्यागः, अनुशासनं राष्ट्रसेवा च इत्येतेषां माध्यमेन निर्मीयते।

कार्यक्रमस्य समये रामधुन् सह गान्धिनः विचाराः आदर्शाश्च स्मारिताः। ततः कार्यक्रमसमन्वयकस्य प्रो. सत्यपालतिवारिणः निर्देशनानुसारं वृक्षारोपणं स्वच्छताभियानं च सञ्चालितम्। अस्मिन् विश्वविद्यालयस्य शिक्षकैः कर्मचारिभिश्च सक्रियतया सहभागिता कृता। अभियानस्य माध्यमेन स्वच्छतायाः, पर्यावरणसंरक्षणस्य सामाजिकदायित्वस्य च विषये जागरूकतायाः सन्देशः प्रदत्तः।

कार्यक्रमस्य संयोजनं प्रो. विनोदकुमारगुप्तेन कृतम्। सञ्चालनं आयोजनसचिवेन डॉ. शिवेन्द्रप्रतापसिंहेन कृतम्। प्रो. सत्यपालतिवारिणा च सर्वेषाम् आगन्तुकानां प्रति कृतज्ञता प्रकटिता।

अस्मिन् अवसरे जनसम्पर्काधिकारी डॉ. प्रभातचन्द्रमिश्रः, प्रो. रुचिबाजपेयी, डॉ. साधनाश्रीवास्तवः, डॉ. सतीशचन्द्रजैसलः, प्रो. एस.कुमारः, प्रो. पी.के.स्टालिनः, प्रो. छत्रसालसिंहः, प्रो. ए.के.मलिकः, प्रो. वी.के.गुप्तः, प्रो. एस.पी.तिवारी इत्यादयः शिक्षकाः कर्मचारीगणाश्च उपस्थिताः आसन्।

Hindusthan Samachar / Dheeraj Maithani