फिरोजाबादम्, २० अक्टूबरमासः (हि.स.)। प्रदेशसर्वकारस्य पर्यटनमन्त्रिणा जयवीरसिंहेन मङ्गलवासरे उक्तं यत् प्रदेशे विधि-व्यवस्थां संरक्षन् भाजपा-सर्वकारः २०२७ तमवर्षस्य विधानसभा-निर्वाचनानाम् अनन्तरम् अपि अक्षुण्णः स्थास्यति। सः दावाम् अकरोत् यत् २०१७ तमवर्षात् पूर्वं प्रदेशे शासनं कृतवद्भ्यः जनैः पुनः अवसरः न प्रदास्यते।

उत्तरप्रदेशसर्वकारस्य पर्यटन-संस्कृति-मन्त्री जयवीरसिंहः मङ्गलवासरे फिरोजाबाद-नगरे आसीत्। सः अत्र शिकोहाबाद-नगरे अखिल-भारतीय-क्षत्रिय-महासभया आयोजिते दशहरा-मेलन-समारोहे, हवने, शस्त्रपूजन-कार्यक्रमे च सम्मिलितः अभवत्।

अस्मिन् अवसरे सः २०२७ तमवर्षस्य विधानसभा-निर्वाचनानि अधिकृत्य अवदत् यत् प्रदेशस्य प्रजा अत्याचारिणं सर्वकारं पुनः सत्तां न समर्पयिष्यति। सः २०१७ तमवर्षात् पूर्वं प्रदेशे शासनं कृतवद्भ्यः पुनः अवसरस्य अप्राप्तेः दावां कुर्वन् मुख्यमन्त्रिणः योगिनः आदित्यनाथस्य नेतृत्वे विधि-व्यवस्थायाः सुदृढतायाः वार्ताम् अकथयत्।

मन्त्री जयवीरसिंहः अवदत् यत् विजयादशमी असत्यस्य उपरि सत्यस्य, अनीतेः उपरि नीतेः, अत्याचारस्य च उपरि सदाचारस्य विजयस्य प्रतीकम् अस्ति। भगवता श्रीरामेण अधर्मस्य उपरि विजयं सम्प्राप्य समाजाय सत्यस्य न्यायस्य च सन्देशः प्रदत्तः। अस्मिन् पर्वणि सर्वैः सङ्कल्पः करणीयः यत् अन्यायस्य शोषणस्य च भाजनं भूताः जनाः न्यायम् आप्नुयुः। सहैव सर्वेषां वर्गाणां धर्माणां च जनाः समानान् अवसरान् प्राप्नुयुः। सः अवदत् यत् प्रदेशे विधि-व्यवस्थां प्रतिष्ठापयन् सर्वकारः २०२७ तमवर्षस्य विधानसभा-निर्वाचनानन्तरम् अपि स्थिरः स्थास्यति।

सपा-प्रमुखस्य अखिलेश-यादवस्य पक्षतः भाजपोपरि विपक्षस्य मतदातॄणां नामानि विलोपयितुं स्वसमर्थकानां च मतदातॄणां नामानि संवर्धयितुम् आरोपेषु मन्त्री अवदत् यत् वास्तवितानां वैधानां च मतदातॄणां नामानि मतदाता-सूच्यां स्थास्यन्ति, यदा तु अवैध-नामानि निष्कासयिष्यन्ते।

जयवीरसिंहः अकथयत् यत् निर्वाचन-आयोगः पारदर्शकतया सह मतदाता-सूचीं सज्जीकरोति। सः आशां प्राकटयत् यत् प्रदेशाय पारदर्शिका मतदाता-सूची लप्स्यते। पर्यटनमन्त्रिणा काङ्ग्रेसनेतारं राहुल-गान्धिनम् अभिलक्ष्य अपि आक्षेपः कृतः।

कार्यक्रमे अखिल-भारतीय-क्षत्रिय-महासभायाः विविध-राज्येभ्यः आगताः पदाधिकारिणः उपस्थिताः आसन्।

–––––––––––––––––––––––––––––

Hindusthan Samachar / Divya Ranjan