— विजयादशम्यां श्रीकाशीविश्वनाथ-धाम्नि शास्त्रोक्तविधिना शस्त्रपूजनम्

वाराणसी, २० अक्टोबरमासः (हि.स.)। उत्तरप्रदेशस्य धार्मिकनगरे वाराणस्यां विजयादशम्याः पावनावसरे मङ्गलवासरे श्रीकाशीविश्वनाथधाम्नि मन्दिरचत्वरस्य सांस्कृतिकमञ्चे श्रद्धया पारम्परिकविधि-विधानेन च शस्त्रपूजनसमारोहस्य आयोजनम् अभवत्। अस्मिन् अवसरे श्रीकाशीविश्वनाथमन्दिर-न्यासस्य प्रतिनिधित्वं कुर्वन् यजमानरूपेण मुख्यकार्यपालनाधिकारी सत्यम् मिश्रः शास्त्रोक्तविधिना शस्त्रपूजनं सम्पन्नवान्।

सः अवदत् यत् विजयादशमीपर्व अधर्मस्य उपरि धर्मस्य, असत्यस्य उपरि सत्यस्य, दुष्टतायाः उपरि च सदाचारस्य विजयस्य प्रतीकम् अस्ति। भगवान् श्रीरामेण रावणस्य उपरि प्राप्तविजयस्य स्मरणेन सम्बद्धम् इदं पर्व अस्मान् सत्यस्य, साहसस्य, कर्तव्यनिष्ठायाः, धर्ममार्गस्य च अनुसरणाय प्रेरयति। भारतीयसंस्कृतौ शस्त्रपूजनस्य परम्परा शक्तेः, शौर्यस्य, सुरक्षायाश्च सम्मानस्य प्रतीकम् अस्ति। एषा परम्परा शस्त्राणां सदुपयोगस्य तथा समाजस्य, राष्ट्रस्य, धर्मस्य च रक्षणे उत्तरदायित्वस्य सन्देशमपि ददाति।

पूजनसमारोहे विधिपूर्वकं शस्त्राणां पूजनं कृतम्। राष्ट्रस्य एकतायाः, अखण्डतायाः, शान्तेः, सुरक्षायाश्च कामना अपि कृता।

स्वर्णकारक्षत्रियसमित्या विधिपूर्वकं शस्त्र-पूजनम्, सनातनपरम्परायाः क्षत्रिय-गौरवस्य च सन्देशः

१९५४ तमवर्षात् प्रचलितानां परम्पराणां निर्वहणं कुर्वती स्वर्णकारक्षत्रियसमितिः स्वकीयां सांस्कृतिकपरिचितिम्, एकतां, गौरवशालिनीं परम्परां च संरक्षन्ती मङ्गलवासरे विजयादशमीपर्वणि शस्त्र-पूजनम् अकरोत्। छत्तातलेचौकस्थिते दुर्गाभवने, लालूसेठस्य कटरा इति स्थाने आयोजिते अस्मिन् धार्मिकानुष्ठाने सनातनसंस्कृतेः, शौर्यस्य, पराक्रमस्य, क्षत्रियपरम्पराणां च प्रति श्रद्धा प्रकटिता।

समितेः अध्यक्षः घनश्यामसेठः ‘बच्चा’ शस्त्रपूजनम् अकरोत्। कार्यक्रमस्य आगन्तुकानां स्वागतं समितेः महामन्त्री राजूवर्मा अकरोत्, कोषाध्यक्षः विक्रमसिंहः च सर्वेभ्यः आभारं प्रकटयन् धन्यवादं ज्ञापितवान्। कार्यक्रमे काश्याः प्रकाण्डविद्वद्भ्यां कृष्णमोहनशुक्लेन विपिनगर्गेण च सह सान्निध्ये दुर्गासप्तशत्याः सम्पुटपाठः कृतः। धार्मिक-मन्त्राणां घोषेण विधिविधानेन च सम्पन्नेन शस्त्रपूजनेन विजयादशम्याः आध्यात्मिकं सांस्कृतिकं च महत्त्वं पुनः प्रतिपादितम्।

मठात् राष्ट्राय शान्तेः वीरतायाश्च सन्देशः

श्रीकाशीविश्वनाथमन्दिरपरिसरे स्थिते अन्नपूर्णामठमन्दिरे परम्परानुसारं ध्वजारोहणानन्तरं महन्तेन शङ्करपुरीमहाराजेन शस्त्रपूजनं कृतम्। ततः पूर्वं मन्दिरस्य महन्तः शङ्करपुरीमहाराजः मातुः अन्नपूर्णायाः ध्वजस्य विधिपूर्वकं ध्वजारोहणम् अकरोत्।

सः अवदत्, “काश्याः अन्नपूर्णामठमन्दिरे परम्परानुसारम् इदं पूजनं भवति। अद्य विजयादशमी अस्ति। विजयादशम्यां ध्वजः शान्तेः, वीरतायाः, विजयस्य च प्रतीकः भवति। एतदेव दृष्ट्वा अद्य विजयादशम्यां मातुः अन्नपूर्णायाः ध्वजः उत्तोलितः, मठस्य ध्वजश्च आरोहितः।”

महन्तः अवदत् यत् विजयादशम्याः ध्वजः केवलं ध्वजः नास्ति, अपितु शान्तेः, वीरतायाः, विजयस्य च प्रतीकम् अस्ति। अस्मिन् दिने ध्वजारोहणेन मातुः अन्नपूर्णायाः कृपा समग्रायां काश्यां राष्ट्रे च निरन्तरं भवति।

सः काश्याः समस्तेभ्यः भारतवासिभ्यः सनातनधर्मावलम्बिभ्यश्च विजयादशम्याः शुभकामनाः प्रदाय सर्वेषां मङ्गलमय-जीवनस्य कामनाम् अकरोत्।

Hindusthan Samachar / Divya Ranjan