मुम्बई, २१ अक्टोबरमासः (हि.स.)। महाराष्ट्रनवनिर्माणसेनायाः अध्यक्षः राजठाकरे बुधवासरे मुम्बईनगरे अवदत् यत् यदि देशे निर्वाचनप्रक्रिया पारदर्शिनी अस्ति, तर्हि मतपत्रैः निर्वाचनं कर्तुं बाधा किमर्थम्? राजठाकरे इत्यनेन एतदपि उक्तं यत् देशस्य स्थितिः शोचनीया अस्ति तथा च अग्रिमेषु कतिपयेषु मासेषु महत् राजनैतिकं परिवर्तनं सम्भाव्यते।

राजठाकरे मुम्बई-प्रेस-क्लब इत्यत्र आयोजितायां पत्रकारसम्मेलनवार्तायां सम्बोधनं कुर्वन् आसीत्। सः अवदत् यत् देशे इलेक्ट्रॉनिक-मतदानयन्त्राणाम् स्थाने मतपत्रैः निर्वाचनं कारयितव्यम्। सः प्रश्नम् अकरोत् यत् यदि निर्वाचनप्रक्रिया पूर्णतया पारदर्शिनी अस्ति, तर्हि मतपत्रैः मतदानं कारयितुं किम् आपत्तिः अस्ति? सः अवदत् यत् सः २०१८ तमवर्षात् निरन्तरं मतपत्रैः निर्वाचनं कारयितुम् आग्रहं कुर्वन् अस्ति। तस्य मते ईवीएम-माध्यमेन मतदानानन्तरं शीघ्रमेव निर्वाचनपरिणामाः आगच्छन्ति, किन्तु मतदातॄणां मनसि सन्तुष्टेः निर्वाचनप्रक्रियायाः विश्वसनीयतायाश्च विषये प्रश्नाः अवशिष्यन्ते। निर्वाचनपरिणामानां घोषणायां कतिपयदिनानि अधिकानि लगन्ति चेत् अपि महदन्तरं न भवति इति सः अवदत्।

राजठाकरे एतदपि प्रश्नम् अकरोत् यत् विश्वे केवलं त्रयाणां चतुर्णां वा देशानां विहाय अन्येषु सर्वेषु देशेषु मतपत्रैः मतदानं क्रियते। निर्वाचनप्रक्रियां प्रति नागरिकाणां मनसि उत्पद्यमानानां सन्देहानां निराकरणस्य आवश्यकतायां सः बलं दत्तवान्। राजठाकरे अवदत् यत् वर्तमानपरिस्थितौ कदाचित् देशे प्रधानमन्त्री अपि न भवेत्। अग्रिमेषु त्रिषु चतुर्षु वा मासेषु महत्त्वपूर्णाः राजनीतिकघटनाः सम्भवेयुः इति सः आशङ्कां प्रकटितवान्। देशे जनानां मनसि असन्तोषः वर्धमानः अस्ति तथा च आगामीकाले अन्येऽपि बहवः विषयाः प्रकाशं गमिष्यन्ति इति सः अवदत्। तस्य मते जनानां मनसि विद्यमाना अप्रसन्नता व्यापकानां विरोधप्रदर्शनानां रूपं धारयितुं शक्नोति।

राजठाकरे भाजपादलस्य केन्द्रसर्वकारस्य च कार्यशैल्याः आलोचनाम् अकरोत्। सः अवदत् यत् कस्यापि राजनीतिकदलस्य सत्तायां सर्वदा स्थातुं निश्चितता नास्ति। तस्य मते राजनीतिकदलैः स्वनिर्णयानां नीतिनां च दूरगामीणां प्रभावाणां विषये विचारः करणीयः।

सः प्रश्नम् अकरोत् यत् किं देशस्य नागरिकैः सत्तासीनानां जनानां निर्णयाः सर्वदा स्वीकर्तव्याः एव? लोकतान्त्रिकसंस्थानां स्वायत्ततायाः नागरिकाणाम् अधिकाराणां च रक्षणं महत्त्वपूर्णम् इति सः प्रतिपादितवान्। राजठाकरे एतदपि आरोपितवान् यत् देशस्य अनेकासां संस्थानां स्वायत्तता प्रभाविता अभवत्। शान्तिपूर्णं प्रदर्शनं कुर्वतां नागरिकाणां विद्यार्थिनां च विरुद्धं पुलिसप्रशासनस्य कार्यवाहीं प्रति सः प्रश्नान् उत्थापितवान्। अपि च, सः भाजपादलं तस्य पूर्वराजनीतिककालं स्मारयन् अवदत् यत् सत्तासीनैः दलैः विरोधस्वराणां प्रति संवेदनशीलं भवितव्यम्।

राजठाकरे अभिव्यक्तिस्वातन्त्र्यस्य विषयम् उत्थाप्य अमेरिकायाः भारतस्य च परिस्थित्योः तुलना कृतवान्। सः आरोपितवान् यत् भारते सर्वकारस्य आलोचनां कुर्वतीः सामग्रीः अन्तर्जालीय-मञ्चेभ्यः निष्कासयितुं बलं क्रियते। गौतम-अडानी-सम्बद्धायाः एकस्याः वृत्तचित्रस्य उल्लेखं कुर्वन् सः दावं कृतवान् यत् तत् यू-ट्यूब-मञ्चात् निष्कासयितुं बलं दत्तम्। राजठाकरे अवदत् यत् लोकतन्त्रे सर्वकारस्य आलोचनायाः असहमतिम् अभिव्यक्तुं च स्वातन्त्र्यस्य सम्मानः करणीयः।

Hindusthan Samachar / Divya Ranjan