कुम्भपर्व २०२७ : गङ्गानहरस्य अवरोधकाले निर्माणकार्यं तीव्रतरम्, मेलाधिकारिण्या निरीक्षणं कृतम्।

हरिद्वारम्, २४ अक्टोबरमासः (हि.स.)। कुम्भमेलायां २०२७ तमे वर्षे श्रद्धालुभ्यः स्नानस्य उत्तमसुविधां प्रदातुं प्रमुखघट्टेषु जनसमर्दस्य भारं न्यूनीकर्तुं च हरिद्वारे नूतनघट्टानां निर्माणकार्यं तीव्रं कृतम् अस्ति। सिञ्चनविभागस्य माध्यमेन हरिद्वारतः बहादराबादपर्यन्तं प्रायः त्रिकिलोमीटरमिते विस्तारे घाटाः निर्मीयन्ते। गङ्गानहरस्य अवरोधकालस्य उपयोगं कुर्वता मेलाप्रशासनेन निर्माणकार्येषु वेगः वर्धितः।

निर्माणकार्याणां प्रगतेः निरीक्षणाय मेलाधिकारिणी सोनिका तथा अपरमेलाधिकारी दयानन्दसरस्वती शनिवासरे सायंकाले विभिन्नान् घाटान् निरीक्षितवन्तौ। ताभ्यां सम्बन्धिताधिकारिभ्यः निर्धारितसमयसीमायां गुणवत्तां संरक्ष्य कार्यं सम्पूर्णं कर्तुं निर्देशाः प्रदत्ताः।

सिञ्चनविभागस्य माध्यमेन हरिद्वारतः बहादराबादपर्यन्तं नवघट्टानां निर्माणं क्रियते। एतेषां समग्रदीर्घता २,९६६ मीटरमिता अस्ति।

अपरगङ्गानहरस्य वामतटे शहीदभगतसिंहघाटतः सिंहद्वारपर्यन्तं ३२१ मीटरदीर्घः कामधेनुघाटः निर्मीयते। अमरापुरघाटतः ऋषिकुलसेतुम्, शङ्कराचार्यचौकं तुलसीघाटक्षेत्रं च यावत् ७७० मीटरदीर्घे विस्तारे घाटानां निर्माणकार्यं प्रचलति।

ऋषिकुलसेतुतः साक्षीसतनामघाटपर्यन्तं ७३५ मीटरमिते क्षेत्रे जानकीघाटः, लक्ष्मणघाटः, भरतघाटश्च इति त्रयः भागाः विकसिताः क्रियन्ते। अपरगङ्गानहरस्य दक्षिणतटे नगरनिगमकार्यालयस्य समीपे २७५ मीटरदीर्घः घाटः निर्मीयते। एतदतिरिक्तं बैरागीकैम्पक्षेत्रे स्केपचैनलमार्गे २६० मीटरदीर्घः घाटः, खड्खडीक्षेत्रे ७५ मीटरदीर्घः वेदनिकेतनघाटः, बहादराबादे च षष्ठबैरियरस्य समीपे २०० मीटरदीर्घः छठपूजाघाटः निर्मीयते।

ज्वालापुरे जटवाडासेतोः ऊर्ध्वप्रवाहक्षेत्रे ३०० मीटरदीर्घस्य दुर्गामन्दिरस्य समीपे च ३० मीटरदीर्घस्य घाटस्य निर्माणमपि प्रस्तावितम् अस्ति। एतदतिरिक्तं हरकीपैडीपुनर्विकासयोजनायाः अन्तर्गतं सीसीआरतः धनुषसेतुपर्यन्तं ८२ मीटरदीर्घस्य घाटस्य निर्माणकार्यं क्रियते।

मेलाप्रशासनस्य अनुसारं नूतनघट्टानां निर्माणेन श्रद्धालूनां कृते स्नानस्थलानाम् उपलब्धता वर्धिष्यते तथा प्रमुखघट्टेषु जनसमर्दस्य भारं न्यूनीकर्तुं सहायता भविष्यति। निर्माणकार्याणां निरीक्षणाय प्रत्येकस्मिन् घाटे अभियन्तॄणां नियुक्तिः कृता अस्ति।

Hindusthan Samachar / Dheeraj Maithani