मुरादाबादम्, २७ अक्टोबरमासः (हि.स.)। लखनऊनगरस्य सिटी-मोण्टेसरी-विद्यालये आयोजितायां ‘स्पर्धा इन्टरनेशनल स्पोर्ट्स ओलम्पियाड्-२०२६’ इति क्रीडास्पर्धायां मुरादाबादस्य आरएसडी-एकेडमी-पब्लिक-विद्यालयस्य जूडो-क्रीडकैः स्वकौशलस्य, दृढसङ्कल्पस्य, कठोरपरिश्रमस्य च बलेन अन्ताराष्ट्रियस्तरे नगरस्य देशस्य च गौरवं वर्धितम्। विद्यालयस्य क्रीडकैः एकं स्वर्णपदकम्, एकं रजतपदकं, षट् कांस्यपदकानि च विजितानि।

जूडो-प्रशिक्षकः मयङ्ककश्यपः अवदत् यत् बहुदिनपर्यन्तं प्रचलितायाम् अत्यन्तं रोमाञ्चकारिण्यां कठिनायां च प्रतियोगितायां विश्वस्य श्रेष्ठक्रीडकैः सह तीव्रस्पर्धां कुर्वती आरएसडी-एकेडमी-विद्यालयस्य विजेतृदलेन अष्टौ पदकानि प्राप्तानि। एतेषु एकं स्वर्णपदकम्, एकं रजतपदकं, षट् कांस्यपदकानि च सन्ति।

मयङ्ककश्यपः अग्रे अवदत् यत् ख्यातिसिंहेन स्वर्णपदकं, गुनीचौधर्या रजतपदकं च विजितम्। हिमांशुसैनी, अभिराजठाकुरः, मान्याशर्मा, राणीयादवः, शुभाङ्गसिंहः, नमनकुमारः च कांस्यपदकानि प्राप्तवन्तः।

आरएसडी-एकेडमी-विद्यालयस्य क्रीडकानां अस्याः ऐतिहासिकायाः गौरवपूर्णायाश्च उपलब्धेः कृते विद्यालयस्य निदेशकाः डॉ. विनोदकुमारः, डॉ. जी.कुमारः, डॉ. गौरवकुमारः, डॉ. गरिमाशर्मा, डॉ. अजयशर्मा तथा प्रधानाचार्यः अभिषेकशर्मा च सर्वान् विजेतॄन् जूडो-प्रशिक्षकं मयङ्ककश्यपं च अभिनन्दितवन्तः तथा तेषां उज्ज्वलभविष्याय शुभकामनाः प्रदत्तवन्तः। अन्ताराष्ट्रियस्तरे प्राप्तया अस्याः महत्त्वपूर्णायाः सफलतया सम्पूर्णे विद्यालये मुरादाबादजनपदे च हर्षस्य वातावरणम् अस्ति।

Hindusthan Samachar / Divya Ranjan