भागलपुरम्, 28 अक्टूबरमासः (हि.स.)।

उत्तरदक्षिणबिहारयोः जीवनरेखा इति मन्यमानस्य अत्यन्तमहत्त्वपूर्णस्य विक्रमशिलासेतोः स्थायिजीर्णोद्धारकार्यं सम्प्रति युद्धस्तरेण प्रचलति। सेतोः षट्त्रिंशत्तमस्पैनस्य समीपे स्थितानां त्रयाणां दुर्बलानां क्षतिग्रस्तानां च स्लैबानां तथा गुरूणां कङ्क्रीटगर्डराणां कटरयन्त्रैः कर्तनपूर्वकं निष्कासनप्रक्रिया पूर्णा कृता अस्ति। अस्याः महत्याः बाधायाः दूरीकरणानन्तरम् अधुना विशालानां इस्पातगर्डराणां स्थापनार्थं सज्जता तीव्रतया क्रियते।

निर्माणसंस्थया एसपी सिङ्गला इत्यनया बरारीस्थे स्वकीये यार्डस्थले इस्पातगर्डराणाम् संयोजनकार्यं प्रायः पूर्णं कृतम् अस्ति। एते गर्डराः शीघ्रमेव हाइड्रोलिकक्रेनस्य साहाय्येन सेतोः उपरि स्थापयिष्यन्ते। भविष्ये सेतोः सुरक्षां सुनिश्चितं कर्तुं तस्य संरचनात्मकं भारं न्यूनीकर्तुं च अभियन्तृभिः महत्त्वपूर्णः परिवर्तनः कृतः अस्ति। सेतोः उपरि स्थितः पुरातनः कङ्क्रीटनिर्मितः पदपथः सुरक्षावेष्टनं च पूर्णतया निष्कासितम् अस्ति। तयोः स्थाने अधुना आधुनिकः लौहनिर्मितः पदपथः सुरक्षावेष्टनं च स्थापयिष्यते, येन सेतोः अतिरिक्तभारः पर्याप्तमात्रया न्यूनः भविष्यति।

सम्प्रति गर्डराणां स्थापनार्थं स्तम्भेषु बेयरिङ्गस्य स्थापनकार्यं चतुर्विंशतिघण्टं प्रचलति। अस्मिन् कार्ये प्रायः एकसप्ताहस्य समयः अपेक्षितः अस्ति। बेयरिङ्गस्थापनकार्यस्य समाप्त्यनन्तरं पञ्चदशतः विंशतिदिनाभ्यन्तरे इस्पातगर्डराणां स्थापनप्रक्रिया सम्पूर्णा भविष्यति।

अस्य मरम्मतकार्यस्य विस्तारः केवलं क्षतिग्रस्तभागपर्यन्तं सीमितः नास्ति। दीर्घकालात् अनुरक्षणस्य अभावेन जीर्णतां प्राप्तस्य सेतोः सर्वेषां सप्तषष्टीनाम् एक्स्पेन्शनज्वाइन्ट् इत्याख्यानां विस्तारसन्धीनां निष्कासनकार्यमपि प्रारब्धम् अस्ति। एतेषु सर्वेषु स्थानेषु नवीनानां विस्तारसन्धीनां निर्माणं कारयित्वा तेषां स्थापनं करिष्यते। एतदतिरिक्तं सेतोः मध्यभागे निर्मितः पुरातनः निरीक्षणकक्षः अपि पूर्णतया परिवर्त्यते।

अधिकारिणां कथनानुसारं निर्माणसंस्थायै सम्पूर्णं कार्यं जनवरीमासस्य चतुर्दशदिनाङ्कपर्यन्तं सम्पादयितुं समयसीमा निर्धारिता अस्ति, येन अस्मिन् मार्गे पुनः सुचारुरूपेण सुरक्षितस्य आवागमनस्य व्यवस्था स्थापयितुं शक्यते। भविष्ये सेतोः क्षतिं निवारयितुं नियमितकालान्तरे तस्य अनुरक्षणार्थम् एकां विशेषयोजनामपि निर्मीयमाणाम् अस्ति।

---------------

Hindusthan Samachar / Dheeraj Maithani