हरिद्वारम्, २८ अक्टोबरमासः (हि.स.)। हरिद्वारे स्थिते पतञ्जलिविश्वविद्यालये अक्टोबरमासस्य २९ दिनाङ्कात् ३१ दिनाङ्कपर्यन्तम् आयोज्यमाने द्विपञ्चाशत्तमे अखिलभारतीयप्राच्य-विद्यासम्मेलने सनातनधर्मस्य भारतीय-ज्ञानपरम्परायाश्च अपकीर्तिं कर्तुं क्रियमाणानां षड्यन्त्राणां तथ्यानां प्रमाणानां च आधारेण पर्दाफाशः क्रियते। योगगुरुः स्वामी रामदेवः बुधवासरे कनखलस्थे दिव्ययोगमन्दिरे पत्रकार-सम्मेलनं कृत्वा सम्मेलनस्य रूपरेखां तस्य उद्देश्यानि च अवदत्। तेन उक्तं यत् त्रिदिवसीये अस्मिन् सम्मेलने देशविदेशेभ्यः विद्वांसः, शिक्षाविदः, शोधकर्तारश्च भागं ग्रहीष्यन्ति।

स्वामी रामदेवः सनातनधर्मस्य वैदिकपरम्पराणां च विषये प्रश्नान् उत्थापयतां जनानां तीव्रं खण्डनं कुर्वन् अवदत् यत् वेदेषु भेदभावस्य सन्देशः नास्ति, अपितु समस्तमानवजातेः कल्याणस्य सन्देशः निहितः अस्ति। सनातनधर्मं सङ्कीर्णदृष्ट्या पश्यन्तः जनाः स्वकीयां विचारधारां विस्तृतां कुर्युः। सनातनधर्मः केवलम् उपासनापद्धतिः न, अपितु जीवनस्य अवलोकनस्य, प्रकृत्या सह सामञ्जस्यस्थापनस्य, समग्र-मानवजातेः कल्याणस्य च मार्गः अस्ति। भारतस्य परिचयः तस्य ऋषिपरम्परया, वेदैः, उपनिषद्भिः समृद्धया सांस्कृतिक-धरोहरेण च अस्ति। अस्याः धरोहरायाः विषये गौरवं कर्तुं प्रत्येकं भारतीयस्य स्वाभाविकः अधिकारः अस्ति। स्वपरम्पराः अविज्ञाय तासु प्रश्नान् उत्थापयितुं हीनभावनां च धारयितुं न उचितम्। सनातनधर्मस्य मूलभावना समन्वयः, सह-अस्तित्वम्, करुणा, विश्वकल्याणं च अस्ति।

तेन उक्तं यत् भारतीयज्ञानपरम्परायाः अवलोकनं पूर्वाग्रहपूर्णदृष्ट्या न कर्तव्यम्। वेदानां सन्देशः कस्यचित् एकस्य वर्गस्य कृते सीमितः नास्ति, अपितु मानवजीवनं श्रेष्ठं कर्तुं प्रेरणां ददाति। सनातनपरम्परया शताब्देभ्यः विचारविनिमयाय, आध्यात्मिकचिन्तनाय, ज्ञानस्य विविधाभ्यः धाराभ्यश्च स्थानं प्रदत्तम्। भारतस्य सांस्कृतिकधरोहराणि केवलम् अतीतस्य सम्पत्तिः न, अपितु वर्तमानस्य भविष्यस्य च मार्गदर्शिका अपि अस्ति। योगस्य, आयुर्वेदस्य, अध्यात्मस्य, वैदिकज्ञानस्य च प्रासङ्गिकताम् अद्य सम्पूर्णं विश्वम् अनुभवति।

स्वामी रामदेवः आरोपितवान् यत् केचन जनाः धर्मशास्त्राणां पुराणानां च सन्दर्भान् परिवर्त्य तादृशीः कथाः प्रस्तुवन्ति, याभिः सनातनधर्मस्य आराध्यदेवतानां च छविः प्रभाविता भवति। मर्यादापुरुषोत्तमं भगवान् श्रीरामं मातरं सीतां च मांसाहारेण मद्यपानेन च सम्बद्धरूपेण प्रस्तुतम्, भगवत: श्रीकृष्णस्य दिव्यं महारासं मिथ्यासन्दर्भे विकृतरूपेण वर्णितम्, महायोगिनं शिवं च मादकद्रव्यसेवनेन सम्बद्धरूपेण प्रदर्शितम्—एतानि सर्वाणि तस्य षड्यन्त्रस्य अङ्गानि सन्ति।

तेन उक्तं यत् धार्मिकविषयेषु धारणा निर्मातुं पूर्वं मूलसन्दर्भानां प्रमाणानां च अवगमनम् आवश्यकम्। सनातनधर्मस्य विषये निराधारान् आरोपान् कुर्वद्भिः जनैः तथ्याधारितानि वक्तव्यानि प्रस्तुतव्यानि। सम्मेलनकाले वेदेषु, उपनिषत्सु, योगे, आयुर्वेदे, भारतीयदर्शने, संस्कृतसाहित्ये च विद्वांसः शोधपत्राणि प्रस्तुतं करिष्यन्ति। पुस्तकप्रदर्शिनी, शास्त्रार्थः, सांस्कृतिक-गतिविधयश्च अपि आयोजयिष्यन्ते। भ्रामक-विचारान् प्रसारयतां जनानां विरुद्धं नैयायिककार्यवाहीसम्बद्धानां पक्षाणां विचारार्थं समितेः गठनस्य प्रस्तावः प्रस्तुतः भविष्यति।

सनातनमण्डलस्य गठनविषये तेन उक्तं यत् अखिलभारतीय-अखाडापरिषद्, सन्त-समितिः इत्यादयः बृहन्तः सङ्घटनाः पूर्वमेव सन्ति। नूतनमण्डलस्य स्वरूपं स्वायत्तं भविष्यति अथवा पृथक्, इति विषये स्थितिः अद्यापि स्पष्टा भवितुं शेषा अस्ति।

देशे सत्तापरिवर्तनस्य आशङ्कानां विषये स्वामी रामदेवः अवदत् यत् भारते बाङ्ग्लादेशे, श्रीलङ्कायां, नेपालदेशे अथवा मध्यपूर्वस्य देशेषु इव सत्तापरिवर्तनं न भविष्यति। अस्माकं समीपे लक्षशः सैनिकाः, अर्धसैनिकबलानि, आरक्षक-बलानि, न्यायालयाः, सुदृढं लोकतन्त्रं च सन्ति। यः सत्तां प्राप्तुम् इच्छति, सः लोकतान्त्रिकमार्गेण सत्तासीनः भवितुम् अर्हति। मार्गेषु आन्दोलनं कृत्वा शासनव्यवस्थायाः परिवर्तनं न सम्भवति। तेन नेतॄन् आहूतवान् यत् ते ‘मम दलम्, मम नेता’ इत्यस्याः विचारधारायाः उपरि उत्थाय राजधर्मस्य राष्ट्रधर्मस्य च प्राथमिकतां दद्युः।

Hindusthan Samachar / Divya Ranjan