धर्मशालायां लोकतन्त्रं रक्षतु, अराजकतां दूरीकरोतु इति पदयात्रायै शुक्रवासरे मार्गेषु अवतरिष्यति भाजपा

धर्मशाला, २९ अक्टूबरमासः (हि.स.)। भारतीयजनतापक्षः अक्टोबरमासस्य ३० दिनाङ्के धर्मशालायां ‘लोकतन्त्रं रक्षतु, अराजकतां दूरीकरोतु’ इति पदयात्राम् आयोजयिष्यति। भारतीयजनतापक्षस्य वरिष्ठनेता सुलहविधानसभाक्षेत्रस्य विधायकः विपिनसिंहपरमारः अवदत् यत् एषा पदयात्रा गान्धिवाटिकातः प्रारभ्य कचहरीअड्डापर्यन्तं गमिष्यति।

तेन उक्तं यत् अस्य कार्यक्रमस्य माध्यमेन भाजपा लोकतान्त्रिकमूल्यानां, जनहितस्य, सर्वकारस्य उत्तरदायित्वस्य तथा प्रदेशस्य वर्तमानराजनैतिकपरिस्थितिभिः सम्बद्धान् विषयान् जनसमक्षम् उपस्थापयिष्यति। भाजपायाः उद्देश्यम् अस्ति यत् जनसमस्यानां सशक्ततया प्रस्तुतिः भवेत् तथा सर्वकारः स्वदायित्वस्य बोधं प्राप्नुयात्। शान्तिपूर्णं जनसहभागित्वं लोकतन्त्रस्य शक्तिः अस्ति। यदा जनाः स्वाधिकारान्, अपेक्षाः, समस्याः च आधृत्य स्वरम् उत्थापयन्ति, तदा सर्वकारस्य दायित्वं भवति यत् सः तेषां प्रश्नानाम् उत्तराणि दद्यात् तथा जनहिताय आवश्यकानि पदानि स्वीकरोतु।

तेन धर्मशालानगरस्य नागरिकान्, भाजपापदाधिकारिणः, कार्यकर्तॄन् च पदयात्रायां भागं ग्रहीतुम् आह्वानं कृतम्। तेन उक्तं यत् लोकतन्त्रस्य सुदृढीकरणाय जनजागरणम्, वैचारिकसंवादः, सत्तायाः उत्तरदायित्वस्य सुनिश्चितीकरणं च आवश्यकम् अस्ति। भाजपा जनसमस्यानां विषये स्वस्य स्वरं निरन्तरं मुखरं करिष्यति तथा प्रदेशसर्वकारात् तस्य निर्वाचनप्रतिज्ञानां लेखां याचिष्यति।

गुरुवासरे पदयात्रायाः सज्जतां प्रति आयोजिते उपवेशने विपिनसिंहपरमारः कांग्रेसदलं प्रति तीव्रं राजनैतिकं प्रहारं कुर्वन् अवदत् यत् लोकतन्त्रे निर्वाचनपरिणामान् प्रति प्रश्नान् उत्थापयितुं पूर्वं राजनैतिकदलैः स्वकीयतर्काणां, दावानां, सङ्गठनात्मकस्थितेः च विषये ईमानदारीपूर्वकम् आत्मनिरीक्षणं करणीयम्। तेन उक्तं यत् कांग्रेसदलं निरन्तरम् ईवीएमयन्त्राणां निर्वाचनप्रक्रियायाश्च विषये प्रश्नान् उत्थापयति, किन्तु मतपत्रैः सम्पन्नानाम् निर्वाचनानां परिणामाः अपि तस्य राजनैतिकविमर्शे गम्भीरान् प्रश्नान् जनयन्ति।

लोकतन्त्रे जनादेशः सर्वोपरि भवति। राजनैतिकदलेभ्यः अपेक्षा क्रियते यत् ते स्वराजनैतिकविफलतानां समीक्षा कुर्युः, न तु पुनः पुनः निर्वाचनव्यवस्थां प्रश्नानां कठघरे स्थापयित्वा स्वदायित्वात् पलायनस्य प्रयासं कुर्युः।

परमारः अवदत् यत् वर्षे २०२७ तमे विधानसभानिर्वाचनेषु प्रदेशसर्वकारस्य कार्याणां, निर्वाचनप्रतिज्ञानां, जनहितसम्बद्धविषयाणां च मूल्याङ्कनं स्वाभाविकरूपेण जनमध्ये भविष्यति।

उपवेशने धर्मशालाविधायकः सुधीरशर्मा, सङ्गठनात्मकजनपदकाङ्गडाभाजपाध्यक्षः सचिनशर्मा, प्रदेशमाध्यमसहप्रभारी अधिवक्ता विश्वचक्षुः, उभयोः मण्डलयोः अध्यक्षौ (नगरीयः ग्रामीणश्च), महापौरः शमशेरसिंहनैहरिया, जनपदमहामन्त्री देवेन्द्रकोहली इत्यादयः जनपदस्य अन्ये वरिष्ठपदाधिकारिणः कार्यकर्तारश्च उपस्थिताः आसन्।

Hindusthan Samachar / Dheeraj Maithani