—सर्वजनसनातनपार्टी इत्यस्याः राष्ट्रियाध्यक्षरूपेण निर्वाचितः

वाराणसी, ०३ अक्टूबरमासः (हि.स.)। उत्तरप्रदेशस्य धार्मिकनगरी वाराणस्यां शनिवासरे पूर्वतनः सीबीआईनिदेशकः एम्. नागेश्वररावः स्वस्य सार्वजनिकजीवनस्य नूतनाध्यायस्य प्रारम्भस्य घोषणां कृतवान्। भेलूपुरस्थिते एकस्मिन् होटले आयोजितायां पत्रकारवार्तायां एम्. नागेश्वररावः सर्वजनसनातनपार्टी (एसएसपी) इत्यस्याः राष्ट्रियाध्यक्षरूपेण स्वकीयां नूतनां राजनीतिकभूमिकां सार्वजनिकरूपेण घोषितवान्।

सः प्रायः चत्वारिंशद्वर्षपर्यन्तं सुरक्षायाः, विधिव्यवस्थायाः प्रशासनस्य च क्षेत्रेषु कार्यं कृत्वा सक्रियां राजनीतिं प्रविश्य स्वस्य सार्वजनिकजीवने नूतनां दायित्वभूमिकां स्वीकृतवान्। सः अवदत् यत् प्रशासनिकव्यवस्थां समीपतः अवलोक्य अधुना स्वानुभवं राष्ट्रस्य समाजस्य च व्यापकहिताय उपयोजयितुं सक्रियां राजनीतिं प्रविष्टवान्।

पूर्वतननिदेशकः अवदत् यत् “सत्यं सनातनं नित्यं नूतनम्” इति केवलं घोषवाक्यं न, अपितु तस्य दृष्टेः मूलाधारः अस्ति। तस्य मतानुसारं सनातनं केवलं पूजापद्धतिः न, अपितु सत्यस्य, धर्मस्य, कर्तव्यस्य, न्यायस्य, करुणायाः लोककल्याणस्य च जीवनदृष्टिः अस्ति। सः अवदत् यत् भारतं आधुनिकतायां विज्ञानक्षेत्रे प्रौद्योगिक्यां आर्थिकविकासे च अग्रे गन्तव्यम्, किन्तु अस्मिन् विकासेन सह स्वस्य सभ्यतायाः संस्कृतेः इतिहासस्य ज्ञानपरम्पराणां च मूलैः सम्बद्धाः स्थातव्यम्।

रावः अवदत् यत् वयं आधुनिकभारतस्य निर्माणं कुर्मः, किन्तु स्वमूलैः विच्छिन्नाः भूत्वा न। विकासयात्रायां स्वसभ्यतां न विस्मर्तव्यम्। आगामिन्यः संततयः एतद्बोधं धारयेयुः यत् ताः कस्याः महान् सभ्यतापरम्परायाः उत्तराधिकारिण्यः सन्ति।

काशीं स्वस्य नूतनराजनीतिकयात्रायाः प्रारम्भकेन्द्ररूपेण निर्दिश्य सः अवदत् यत् काशी भारतस्य तस्याः सभ्यतागतनिरन्तरतायाः प्रतीकम् अस्ति, या कालेन सह अनेकपरिवर्तनानां साक्षिणी भूत्वापि स्वकीयां मूलचेतनां जीवितवती स्थापयति।

सः अवदत् यत् तस्य लक्ष्यं अतीते प्रत्यावर्तनं न, अपितु स्वस्य सभ्यतागतैः मूलैः दृढतया स्थित्वा भविष्यभारतस्य निर्माणम् अस्ति। भारतस्य पुनर्निर्माणस्य स्वदृष्टिकोणं कामधेनोः चतुष्पादैः सम्बद्ध्य शिक्षां, स्वास्थ्यं, आजीविकां सभ्यतागतपुनर्सम्बन्धं च तस्याः चत्वारः प्रमुखाः आधाराः इति प्रतिपादितवान्। तस्य मतानुसारं एतेषु चतुर्षु क्षेत्रेषु सन्तुलितविकासेन तादृशस्य भारतस्य निर्माणं कर्तुं शक्यते यः आधुनिकः अपि भवेत् तथा स्वस्य सनातनसभ्यतागतैः मूलैः सम्बद्धः अपि भवेत्।

वार्तायां पार्टी इत्यस्याः राष्ट्रिय उपाध्यक्षः श्रीमन्तः तीर्थानन्दः, उपाध्यक्षः रितु राठौड़ः, महासचिवः राजा सक्षमसिंहयोगी, प्रवक्त्री बबिता शर्मा, उत्तरप्रदेशप्रभारी राकेशतिवारी च अपि उपस्थिताः आसन्।