श्रीभूमिः(असमः), 30 अक्टूबरमासः (हि.स.)।

असमस्य कृषिसिञ्चनसंसदीयकार्याणां च मन्त्री पीयूष हजारिका शुक्रवासरे बराकघाट्याः जनपदेषु कृषकाणाम् आयवर्धनस्य कृषिविविधीकरणस्य च प्रोत्साहनार्थं विशेषस्य ‘राजमाषमिशन’ इत्यस्य शुभारम्भस्य घोषणां कृतवान्।

हजारिका श्रीभूमिजनपदात् प्रधानमन्त्रीकिसानसम्माननिधियोजनायाः (पीएम किसान) २४ तमायाः किस्तायाः वितरणार्थम् आयोजिते राष्ट्रियकार्यक्रमे आभासीयमाध्यमेन सम्मिलितः अभवत्। प्रधानमन्त्री नरेन्द्रमोदी गुजरातस्य बनासकण्ठात् देशस्य ९.३४ कोट्यधिकानां कृषकाणां बैंकखातेषु १८,६९० कोटिरूप्यकाणाम् अधिकां राशिं साक्षात् हस्तान्तरितवान्।

अस्मिन्नवसरे प्रधानमन्त्री कृषिअवसंरचनाकोषस्य (एआईएफ) अन्तर्गतं निर्मिताः ५२१ परियोजनाः राष्ट्राय समर्पितवान् तथा १२ उद्यानिकीसमूहानाम् उद्घाटनम् अपि कृतवान्।

कार्यक्रमं सम्बोधयन् हजारिका उक्तवान् यत् कृषिविभागः शीघ्रमेव बराकघाट्याः जनपदेषु राजमाषमिशनस्य शुभारम्भं करिष्यति। अस्य अन्तर्गतं आगामीवर्षात् कृषकेभ्यः उच्चगुणवत्तायुक्तानि राजमाषबीजानि व्यापकस्तरेण वितरितानि भविष्यन्ति। सः स्थानीयकृषकान् आयस्य अतिरिक्तस्रोतरूपेण राजमाषस्य कृषिं स्वीकर्तुम् आहूतवान्।

मन्त्री एतदपि घोषितवान् यत् क्षेत्रे बृहद्प्रमाणेन सुपारीफलस्य नारिकेलस्य च पौधाः वितरिताः भविष्यन्ति। तेन उक्तं यत् प्रधानमन्त्री नरेन्द्रमोदिनः मार्गदर्शने मुख्यमन्त्रिणः डॉ. हिमन्त बिस्वशर्मणः नेतृत्वे च राज्यसर्वकारः आधुनिककृषिअवसंरचनया, प्रौद्योगिक्या, सस्यविविधीकरणेन च कृषकाणाम् आर्थिकस्थितिं सुदृढां कर्तुं प्रतिबद्धः अस्ति।

अस्याः पूर्वं हजारिका श्रीभूमिजनपदस्य पथरकाण्डीविकासखण्डस्य अकैदुमग्रामस्थिते पथिनीचायोद्यानस्य नवनिर्मितायाः तैलताडनर्सर्याः निरीक्षणं कृतवान्। एषा राष्ट्रियखाद्यतैलमिशनस्य तैलताडयोजनायाः (एनएमईओ ओपी) अन्तर्गतं गोदरेज एग्रोवेट लिमिटेड इत्यस्य सहकारेण स्थापिता अस्ति।

१९७२ वर्गमीटरपरिमिते क्षेत्रे विस्तृतायाम् अस्यां आधुनिकायां छादनजालनर्सर्यां द्विलक्षं उच्चगुणवत्तायुक्तानि तैलताडपौधानि उत्पादयितुं क्षमता अस्ति। मन्त्रिणा उक्तं यत् पारम्परिकेषु चायोद्यानक्षेत्रेषु वैकल्पिकानां व्यावसायिकदृष्ट्या लाभप्रदानां च सस्यानां प्रोत्साहनेन स्थानीयार्थव्यवस्थायाः गतिः वर्धिष्यते, स्वयम् उद्यमस्य अवसराः वर्धिष्यन्ते कृषकाणां च आयः वर्धिष्यते।

स्वकीयभ्रमणस्य समये हजारिका श्रीभूमिजनपदस्य रामकृष्णनगरक्षेत्रस्य अनिपुरे महावीरलचितबरफूकनस्य पूर्णकायप्रतिमायाः अनावरणं कृतवान्। एतदतिरिक्तं रामकृष्णखण्डे भारतरत्नस्य अटलविहारीवाजपेयी इत्यस्य पूर्णकायप्रतिमायाः अपि अनावरणं कृतवान्।

एतेषु कार्यक्रमेषु मन्त्रिमण्डलमन्त्री कृष्णेन्दुपालः, विधायकः विजयमालाकारः, विधायकः कमलाक्षडेपुरकायस्थः इत्यादयः अन्ये गणमान्यजनाः उपस्थिताः आसन्।

-----------

Hindusthan Samachar / Dheeraj Maithani