नव दिल्ली, 30 अक्टूबरमासः (हि.स.)।

अन्ताराष्ट्रियव्यापारप्रतिनिधिमण्डलमहासङ्घस्य मुख्यसञ्चालनाधिकारी (सीओओ) बेन्सी जॉर्ज इत्यस्य नेतृत्वे भारतीयव्यापारप्रतिनिधिमण्डलेन रूसदेशस्य तातारस्तानगणराज्यस्य कजाननगरे आयोजिते ‘टाइम बिजनेस फोरम’ इत्यस्मिन् भागः गृहीतः।

आईटीडीएफसी इत्यस्य मुख्यसञ्चालनाधिकारी बेन्सी जॉर्ज शुक्रवासरे प्रसारिते वक्तव्ये अवदत् यत् अस्य कार्यक्रमस्य प्रमुखम् उद्देश्यं भारतरूसयोः आर्थिकसहयोगं प्रवर्धयितुम्, सीमापारव्यापारस्य अवसरान् अन्वेष्टुं तथा भारतीयानां रूसीयानां च हितधारकाणां मध्ये सुदृढसम्बन्धान् स्थापयितुम् आसीत्।

तेन उक्तं यत् अस्मिन् प्रतिनिधिमण्डले व्यापारक्षेत्रे सार्वजनिकजीवने च सम्बद्धाः अनेकाः प्रमुखाः व्यक्तयः सम्मिलिताः आसन्। तेषु देहलीविधानसभायाः (राष्ट्रियराजधानीक्षेत्रं देहलीसर्वकारः) सदस्यः हरीशखुराना, आईबस इत्यस्य सुभाषवासुदेवनः, चिनार मैनपावर इत्यस्य अब्राहममैथ्यू, रेङ्गिथमोहनः अन्ये च भारतीयव्यापारप्रतिनिधयः आसन्।

बेन्सी जॉर्ज उक्तवान् यत् रूसदेशस्य तातारस्तानगणराज्यस्य राजधानीकजाननगरे आयोजिते अस्मिन् व्यापारिकमञ्चे अन्ताराष्ट्रियव्यापारस्य आर्थिकसहकारितानां च प्रवर्धनार्थं भारतस्य प्रतिबद्धतां सुदृढीकर्तुं तेषां सहभागिता दर्शयति यत् उभयोः देशयोः आर्थिकसम्बन्धान् सुदृढीकर्तुं सार्वजनिकनेतृत्वं, उद्योगजगत् अन्ताराष्ट्रियव्यापारजालं च परस्परं सम्बद्धं करणं कियत् महत्त्वपूर्णम् अस्ति।

भारतरूसयोः व्यापारस्य आर्थिकसहयोगस्य च संवर्धनम्

जॉर्ज उक्तवान् यत् पूर्णसत्रे हरीशखुराणेन भारतरूसयोः व्यापारसम्बन्धान् सुदृढीकर्तुं महत्त्वं प्रतिपादितम्। तेन द्विपक्षीयार्थिकविकासस्य नवीनावसरान् उद्घाटयितुं गहनव्यावसायिकसम्बन्धान्, संस्थागतसहयोगं निरन्तरसञ्चारं च प्रोत्साहितम्। तातारस्ताननिवेशविकाससंस्थायाः प्रमुखा तालिया मिनुलिना अपि सभां सम्बोधितवती। तया अन्तरराष्ट्रीयव्यापारसहयोगस्य तस्मिन् सम्मिलितानां पक्षाणां मध्ये सुदृढसहकारितासम्बद्धासु चर्चासु स्वयोगदानं प्रदत्तम्।

तेन उक्तं यत् अस्मिन् मञ्चे व्यापारविस्ताराय, निवेशस्य सुविधाकरणाय तथा व्यावसायिकसंस्थानां संस्थानानां च मध्ये प्रत्यक्षसम्बन्धान् प्रवर्धयितुं मार्गान् अन्वेष्टुं महत्त्वपूर्णः अवसरः प्रदत्तः। अपरतः चर्चासु अस्मिन् विषये बलं दत्तं यत् साझा आर्थिकहितान् सहयोगस्य व्यावहारिकावसरेषु परिणमयितुं अन्तरराष्ट्रीयमञ्चाः कियत् महत्त्वपूर्णाः भवन्ति।

आईटीडीएफसी नेतृत्वस्य दृष्टिकोणः

अस्मिन् सम्पर्के प्रतिक्रियां ददन् आईटीडीएफसी इत्यस्य मुख्यकार्यकारीाधिकारी सैयद अरीश हुसैनो भारतस्य वैश्विकव्यापारसहकारिताः सुदृढीकर्तुं ‘विकसितभारत’ इति परिकल्पनां च अग्रे नेतुं सङ्घटनस्य प्रतिबद्धतां पुनः प्रतिपादितवान्। ‘विकसितभारत’ इयं परिकल्पना नवाचारम्, समावेशिविकासम्, वैश्विकसहकारिताः तथा अन्ताराष्ट्रियार्थव्यवस्थायां अधिकसुदृढसहभागितां च आधारीकरोति।

केरलतातारस्तानयोः क्षेत्रीयसहकारितासु विशेषं ध्यानम्

अस्य सम्पर्कस्य एकः प्रमुखः पक्षः केरलस्य तातारस्तानस्य च मध्ये आर्थिकसहयोगस्य सम्भावनानां विचारः आसीत्। चर्चासु केरलस्य व्यावसायिकविशेषताः, व्यापारसम्भावनाः निवेशावसराश्च प्रमुखतया चर्चिताः। अस्याः पहलायाः उद्देश्यम् आसीत् यत् केरलस्य तातारस्तानगणराज्यस्य च उद्यमानां संयोजनाय, व्यावसायिकसहकारितानां प्रवर्धनाय परस्परलाभदायकसहयोगस्य विकासाय च मार्गाः अन्विष्यन्ते।

एतादृश्याः क्षेत्रीयसाझेदारीः भारतरूसयोः व्यापकान् आर्थिकसम्बन्धान् अधिकं सुदृढान् कर्तुं शक्नुवन्ति। एताभिः व्यवसायिभ्यः नवीनविपणीनाम् अभिज्ञानस्य, संस्थागतसम्बन्धानां विकासस्य विशिष्टक्षेत्रेषु च सहयोगान्वेषणस्य अवसराः प्राप्यन्ते।

संवादात् व्यावसायिकावसरान् प्रति

प्रमुखचर्चाभ्यः अतिरिक्तं भारतीयप्रतिनिधिमण्डलेन बीटूबी उपवेशनेषु, व्यावसायिकविचारविनिमये, भ्रमणेषु विभिन्नसंस्थानां निरीक्षणेषु च भागः गृहीतः। एतासां गतिविधीनां माध्यमेन हितधारकैः सह प्रत्यक्षः संवादः अभवत्, सम्भावितव्यावसायिकसहकारिताः अन्विष्टाः तथा भविष्ये सहयोगाय नवीनक्षेत्राणां च अभिज्ञानं कृतम्।

प्रतिनिधिमण्डलस्य एषा सहभागिता व्यापारकूटनीतेः एकं प्रमुखम् उद्देश्यम् अधोरेखयति। सः उद्देश्यः व्यवसायानां, संस्थानां जनप्रतिनिधीनां च मध्ये एतादृशानां सार्थकसम्बन्धानां स्थापनम् अस्ति, ये भविष्ये निरन्तरव्यावसायिकसम्बन्धानां मार्गं प्रशस्तं कर्तुं शक्नुयुः।

वैश्विकव्यापारकूटनीतिं प्रति आईटीडीएफसी इत्यस्य प्रतिबद्धता

टाइम बिजनेस फोरम इत्यस्मिन् सहभागिता, रणनीतिकव्यापारप्रतिनिधिमण्डलानां माध्यमेन, व्यापारकूटनीत्या, संस्थागतसहकारिताभिः अन्ताराष्ट्रियसम्पर्कजालस्य च माध्यमेन अन्ताराष्ट्रियविपणिभिः सह भारतस्य आर्थिकसम्बन्धान् अग्रे नेतुं आईटीडीएफसी इत्यस्य व्यापकां प्रतिबद्धतां प्रदर्शयति।

भारतीयव्यवसायिनां विदेशीयहितधारकाणां च मध्ये प्रत्यक्षसंवादाय मञ्चं निर्माय आईटीडीएफसी इत्यस्य उद्देश्यं विपण्यप्रवेशं सुगमं कर्तुम्, निवेशं प्रोत्साहितुम्, व्यावसायिकसाझेदारीः प्रवर्धयितुं दीर्घकालिकान् आर्थिकसम्बन्धान् च सुदृढीकर्तुम् अस्ति।

एतत् सङ्घटनं निरन्तरम् एतादृशान् अन्ताराष्ट्रियसहयोगावसरान् अन्वेषयति, ये भारतीयोद्यमान् उदीयमानविपणिभिः सह संयोजयितुं वैश्विकव्यावसायिकपरिवेशे तेषां सहभागितां च सुदृढीकर्तुं शक्नुयुः।

आगामिनः अन्ताराष्ट्रियव्यावसायिककार्यक्रमाः

आगामिषु मासेषु आईटीडीएफसी पोलैण्डदेशे दक्षिणाफ्रीकादेशे च व्यावसायिकप्रतिनिधिमण्डलानां नेतृत्वं करिष्यतीति सम्भावना अस्ति। तत्सह सम्बद्धानां कार्यक्रमाणां व्यवस्थायाः च आधारेण स्विट्जरलैण्डदेशस्य दावोसनगरे आयोज्यमाने विश्व आर्थिकमञ्चस्य वार्षिकोपवेशने अपि अस्य सहभागितायाः सम्भावना अस्ति। एतेषां प्रस्तावितकार्यक्रमाणाम् उद्देश्यं अन्ताराष्ट्रियव्यापारसहकारितानां विस्तारः, निवेशावसराणां प्रवर्धनम्, व्यवसायानां मध्ये परस्परसम्बन्धानां सुदृढीकरणं तथा रणनीतिकव्यापारकूटनीतेः माध्यमेन वैश्विकार्थिकक्षेत्रे भारतस्य सहभागितायाः संवर्धनम् अस्ति।

एताभिः नियोजिताभिः पहलाभिः आईटीडीएफसी स्वकीयाम् अन्ताराष्ट्रियव्याप्तिं विस्तारितुम् इच्छति। अस्य लक्ष्यं भारतीयव्यवसायानां कृते वैश्विकविपणिभिः सह सम्पर्कस्थापनाय, नवीनसाझेदारीणाम् अन्वेषणाय परस्परलाभदायकव्यावसायिकसम्बन्धानां विकासाय च अधिकाधिकान् अवसरान् सृजितुम् अस्ति।

कजाननगरे आयोजिता एषा गतिविधिः भारतीयव्यवसायान् अन्ताराष्ट्रियावसरैः सह संयोजयितुं वैश्विकव्यापारे ‘सहकारिताधारितदृष्टिकोणस्य’ प्रवर्धनाय च आईटीडीएफसी इत्यस्य व्यापकस्य अभियानस्य दिशि अन्यः एकः पदक्षेपः अस्ति। रणनीतिकप्रतिनिधिमण्डलैः, संस्थागतसहयोगेन व्यावसायिककूटनीत्या च आईटीडीएफसी विभिन्नविपणीनां मध्ये सेतुनिर्माणाय, निवेशमार्गाणां विकासाय विश्वस्य विभिन्नेषु भागेषु भारतस्य आर्थि

कसहकारिता सुदृढीकर्तुं च प्रतिबद्धम् अस्ति।

---------------

Hindusthan Samachar / Dheeraj Maithani