Enter your Email Address to subscribe to our newsletters
भोपालम्, ३१ अक्टोबरमासः (हि.स.)। मध्यप्रदेशस्य मुख्यमन्त्री डॉ. मोहनयादवः अवदत् यत् केन्द्रीयमन्त्री हरदीपसिंहपुरी भारतसर्वकारे कुशलप्रशासकरूपेण विशिष्टं परिचयम् अधिगच्छति। तस्य व्यापकः प्रशासनिकानुभवः कार्यकुशलता च निश्चयेन केन्द्रसर्वकारस्य सहैव प्रदेशस्य विकासाय अपि लाभप्रदा सिद्धा भविष्यति तथा च तस्य अनुभवस्य लाभः प्रदेशाय प्राप्स्यते।
मुख्यमन्त्री डॉ. यादवः शनिवासरे विधानसभापरिसरे सञ्चारमाध्यमैः सह वार्तालापं कुर्वन् आसीत्। अस्मात् पूर्वं मुख्यमन्त्रिणः डॉ. यादवस्य उपस्थितौ शनिवासरे भाजपादलस्य राज्यसभा-प्रत्याशी तथा केन्द्रीयपेट्रोलियम-प्राकृतिकगैस-मन्त्री, आवासन-नगर-कार्यविषयकः मन्त्री च हरदीपसिंहपुरी मध्यप्रदेशविधानसभां प्राप्य पीठासीना-धिकारिणे स्वनामाङ्कनपत्रं समर्पितवान्। अस्मिन् अवसरे उपमुख्य-मन्त्रिणौ जगदीशदेवडा-राजेन्द्रशुक्लौ, नगरीयविकास-आवास-संसदीयकार्य-विभागस्य मन्त्री कैलाशविजयवर्गीयः, वरिष्ठः पञ्चायत-ग्रामीणविकास-श्रम-मन्त्री प्रह्लादसिंहपटेलः, प्रदेशाध्यक्षः हेमन्तखण्डेलवालः इत्यादयः वरिष्ठजन-प्रतिनिधयः, मन्त्रिणः, विधायकाश्च उपस्थिताः आसन्।
मुख्यमन्त्री डॉ. यादवः अवदत् यत् प्रधानमन्त्रिण: नरेन्द्रमोदिनः नेतृत्वे प्रदेशाय केन्द्रीयमन्त्री हरदीपसिंहपुरी-सदृशस्य अनुभवीयस्य, वरिष्ठस्य, कुशलस्य च नेतृत्वस्य सहयोगः लप्स्यते इति सर्वेषां कृते हर्षस्य सौभाग्यस्य च विषयः अस्ति। मुख्यमन्त्री केन्द्रीयमन्त्री पुरीमहोदयस्य सफलतायै बाबा महाकालं प्रति प्रार्थनां कृतवान् तथा च तस्मै अभिनन्दनानि शुभकामनाश्च प्रदत्तवान्।
उल्लेखनीयम् अस्ति यत् मध्यप्रदेशं पेट्रोलियम-प्राकृतिकगैसक्षेत्रे समृद्धं कर्तुं तथा प्रदेशे आवासन-नगरीय-विकासक्षेत्रयोः सुविधानां विस्ताराय केन्द्रीयमन्त्री पुरीमहोदयस्य महत्त्वपूर्णं योगदानम् अस्ति। प्रायः ४९ सहस्रकोटि-रूप्यकाणां निवेशेन निर्मीयमाणस्य बीना-परिष्करणागारस्य विस्तारीकरणस्य अधःप्रवाह-पेट्रोरसायन-समुच्चयस्य च आधारशिला प्रधानमन्त्री मोदी १४ सेप्टेम्बर २०२३ दिनाङ्के स्थापितवान्।
प्रदेशस्य भोपालम्, इन्दौरम्, जबलपुरम्, ग्वालियरम्, सागरः, सतना, उज्जयिनी च इति सप्तनगराणि जनवरी २०१६ तः जून २०१७ पर्यन्तं स्मार्टसिटी-मिशनस्य अन्तर्गतं चयनितानि। उडानयोजनायाः अन्तर्गतं ग्वालियर-बेङ्गलूरु तथा ग्वालियर-कोलकाता विमानसेवाः २० जून २०१९ दिनाङ्के प्रारब्धाः। १६ मार्च २०२० दिनाङ्के इन्दौर-किशनगढयोः मध्ये प्रत्यक्षविमानसेवा प्रारब्धा। जबलपुरविमानस्थानकस्य नूतनस्य टर्मिनल इत्यस्य निर्माणाय जून २०१९ मासे अनुबन्धः प्रदत्तः। भोपालविमान-स्थानकस्य एटीसी-नियन्त्रणमीनार-सह-प्राविधिकखण्ड-परियोजनायाः अनुबन्धः एप्रिल २०२१ मासे प्रदत्तः।
भोपाल-इन्दौर-मेट्रोपरियोजनयोः केन्द्रमन्त्रिमण्डलेन ३ अक्टोबर २०१८ दिनाङ्के अनुमोदनं कृतम्। १४,४४२.२० कोटिरूप्यकाणां अस्याः परियोजनायाः कृते १९ अगस्त २०१९ दिनाङ्के त्रिपक्षीयसन्धौ हस्ताक्षराणि कृतानि। स्वच्छसर्वेक्षणे २०२४-२५ तमे वर्षे भोपालं देशस्य स्वच्छतमेषु प्रमुखनगरेषु स्थानं प्राप्तवत् तथा इन्दौरं ‘सुपरस्वच्छलीग्’ इत्यस्मिन् प्रविष्टम्। अमृत् २.० योजनायाः शुभारम्भः १ अक्टोबर २०२१ दिनाङ्के अभवत्। २०२४ वर्षस्य अन्तपर्यन्तं प्रदेशे १२ सहस्रं ९६३ कोटि: १४ लक्षरूप्यकाणां व्ययेन १,२७३ परियोजनाः अनुमोदिताः। २०२१ तः २०२६ पर्यन्तं ३५ एथेनॉल-आसवनालयाः तथा १५ संपीडित-जैवगैस-संयन्त्राणि स्थापितानि।
Hindusthan Samachar / Divya Ranjan