राञ्ची, ४ अक्टोबरमासः (हि.स.)। विश्वहिन्दूपरिषदः केन्द्रीयसङ्गठनमन्त्री अम्बरीषः अवदत् यत् दिवङ्गतेन अशोक-सिंघलेन हिन्दूसमाजस्य सांस्कृतिक-नवजागरणाय श्रीरामजन्मभूम्याः आन्दोलनं च जनसामान्यं प्रति नेतुं स्वजीवनं राष्ट्रस्य हिन्दूसमाजस्य च सेवायै समर्पितम्। अयोध्यायां श्रीराममन्दिरस्य निर्माणम्, जम्मू-कश्मीरतः अनुच्छेदस्य ३७० इत्यस्य निरसनं, श्रीरामसेतोः संरक्षणं च तस्य अनेकाः सङ्कल्पाः साकाराः अभवन्। तस्य अवशिष्टान् सङ्कल्पान् पूर्णं कर्तुं विश्वपटलस्य भारतं नेतृत्वकारीभूमिकायां स्थापयितुं च समाजस्य सर्वैः वर्गैः मिलित्वा कार्यं करणीयम्।

अम्बरीषः रविवासरे धुर्वास्थिते सरस्वती-शिशुविद्यामन्दिरस्य सभागारे विश्व-हिन्दूपरिषदः झारखण्डप्रान्तस्य वतीत्या आयोजितस्य अशोकसिंघलस्य जन्म-शताब्दीसमारोहस्य प्रथमस्य प्रान्त-स्तरीयस्य कार्यक्रमस्य सम्बोधनं कुर्वन् एतद् अवदत्।

कार्यक्रमस्य शुभारम्भः श्रीरामदरबारस्य भारतमातुश्च चित्रयोः पुरतः दीपप्रज्वलनेन अभवत्। श्रद्धेयस्य अशोकसिंघलस्य चित्रे पुष्पाञ्जलिं समर्प्य तस्मै श्रद्धाञ्जलिः अर्पिता।

अम्बरीषः स्वसम्बोधने अवदत् यत् आग्रानगरे प्रतिष्ठिते समृद्धे च परिवारे जातः अशोकसिंघलः काशीनगरस्थात् हिन्दूविश्वविद्यालयात् अभियान्त्रिकीशिक्षां प्राप्तवान्। ततः सुखसुविधापूर्णं गृहस्थ-जीवनं न स्वीकृत्य राष्ट्रियस्वयं-सेवकसङ्घस्य पूर्णकालिककार्यकर्ता-रूपेण स्वजीवनं राष्ट्राय, हिन्दूसमाजाय, हिन्दूदर्शनाय संस्कृतये च समर्पितवान्। तस्य जीवनं त्यागस्य तपस्यायाः सङ्घटनसाधनायाश्च आदर्शरूपम् आसीत्।

सः अवदत् यत् अशोकसिंघलः केवलं श्रीरामजन्मभूम्याः आन्दोलनपर्यन्तं सीमितः नासीत्, अपि तु धर्मान्तरणस्य विरुद्धं जनजागरणम्, जनजातीयक्षेत्रेषु एकलविद्यालयानां स्थापना, गोरक्षा, गङ्गासंरक्षणम्, वेदसम्मेलनानां आयोजनम्, वेदपाठशालानां स्थापना, सामाजिकसमरसतायै सन्तरविदासयात्रा एकात्मतायात्रा च इत्यादीनि अनेकानि कार्याणि गतिं नीतवान्। हिन्दूबौद्ध-सम्मेलनस्य माध्यमेन वैश्विकस्तरे हिन्दूसमाजस्य एकतां सांस्कृतिकचेतनां च सुदृढीकर्तुमपि प्रयत्नं कृतवान्। बजरङ्गदलस्य, दुर्गावाहिन्याः मातृशक्तेः च माध्यमेन युवशक्तिं महिलाशक्तिं च सङ्गठितुं तस्य महत्त्वपूर्णा भूमिका आसीत्।

अम्बरीषः अवदत् यत् हिन्दूजीवनमूल्यानि विश्वं सम्यग्दिशि नेतुं स्थायीशान्तिं च प्रदातुं शक्नुवन्ति। आवश्यकता अस्ति यत् सक्षमः, सशक्तः, सङ्गठितः भेदरहितश्च हिन्दूसमाजः निर्मीयेत। जातिगतं सामाजिकं च विभेदं परित्यज्य सर्वान् वर्गान् सङ्गृह्य अग्रे गन्तव्यम्। सः अवदत् यत् दास्यस्य प्रतीकचिह्नानां निष्कासनं भारतस्य सांस्कृतिकवैभवस्य पुनर्स्थापनं च प्रति कार्यं करणम् एव अशोकसिंघलं प्रति सत्या श्रद्धाञ्जलिः भविष्यति।

अशोकसिंघलस्य जीवनम् प्रेरणादायकम् अनुकरणीयं च : सच्चिदानन्दः

कार्यक्रमस्य मुख्यातिथिः राष्ट्रियस्वयं-सेवकसङ्घस्य झारखण्ड-प्रान्तस्य सङ्घ-चालकः सच्चिदानन्द-लाल-अग्रवालः अवदत् यत् अशोकसिंघलेन हिन्दू-समाजस्य हिन्दू-राष्ट्रस्य च निर्माणस्य दिशि महत्त्वपूर्णा भूमिका निर्वुढा। तस्य सम्पूर्णं जीवनं समाजाय राष्ट्राय च समर्पणस्य प्रेरणादायकम् उदाहरणम् अस्ति।

संस्कारसम्पन्नायाः युववंशस्य निर्माणे बलम् : पद्मश्री-महावीरनायकः

विशिष्टातिथिः पद्मश्री-महावीरनायकः अवदत् यत् भारतं ऋषिमुनिनां भूमिः अस्ति तथा च गुरूशिष्यपरम्परया शताब्देभ्यः समाजाय संस्काराः ज्ञानं च प्रदत्तम्। सः युववंशं भारतीयसंस्कृत्या संस्कारैश्च संयोज्य राष्ट्रनिर्माणस्य दिशि अग्रे नेतुम् आवश्यकतायाः विषये बलं दत्तवान्।

जातिवर्गभेदात् उपरि उत्थाय हिन्दूसमाजः अग्रे गच्छेत् : चन्द्रकान्त-रायपत:

विहिप-झारखण्डप्रान्तस्य अध्यक्षः चन्द्र-कान्त-रायपत: अवदत् यत् हिन्दूसमाजस्य जागरणस्य सङ्घटनस्य च आवश्यकता अस्ति। जात्याः वर्गस्य च आधारेण भवतः विभाजनात् उपरि उत्थाय सामाजिक-समरसतां सुदृढां कर्तव्यम्। सः मातृशक्तेः युवशक्तेश्च समाजनिर्माणे अग्रणीभूमिकां सुनिश्चितुं बलं दत्तवान्।

झारखण्डे २७ सेप्टेम्बरतः जन्मशताब्दी-समारम्भः : मिथिलेश्वर-मिश्रः

विहिप्-झारखण्डप्रान्तस्य महामन्त्री मिथिलेश्वर-मिश्रः अशोकसिंघलस्य जीवनस्य कार्याणां च विषये प्रकाशं कुर्वन् अवदत् यत् झारखण्डे जन्मशताब्दी-समारोहस्य शुभारम्भः २७ सेप्टेम्बरतः अभवत्। देशस्य ४७ तः अधिकेषु स्थानेषु अद्यावधि जन्मशताब्दी-समारोहस्य अन्तर्गतं कार्यक्रमाः आयोजिताः सन्ति। राञ्चीनगरे आयोजितः कार्यक्रमः झारखण्डस्य प्रथमः राज्यस्तरीयः समारोहः अस्ति।

अस्मिन् अवसरे श्रीरामजन्मभूम्याः आन्दोलने सक्रियां भूमिकां निर्वहद्भ्यः कारसेवकेभ्यः सम्मानं प्रदत्तम्। समारोहे अशोकसिंघलस्य जीवनं, सङ्घर्षः, सङ्घटनक्षमता हिन्दूसमाजाय तस्य योगदानं च स्मृतम्।

कार्यक्रमे स्वामी श्रीकृष्णचैतन्यब्रह्मचारी इत्यादिभिः अन्यैः अतिथिभिरपि सम्बोधनं कृतम्। समापनं पूर्णतामन्त्रस्य वन्दे-मातरम्-गीतस्य च गायनेन अभवत्।

समारोहे सङ्कटमोचनहनुमानमन्दिरस्य महन्तः स्वामीकेशवमहाराजः, विहिप्-पटनायाः गुवाहाटीक्षेत्रस्य च धर्माचार्य-प्रमुखः वीरेन्द्रबिमलः, पटनाक्षेत्रमन्त्री डॉ. वीरेन्द्रसाहूः, विहिप्-झारखण्डप्रान्तस्य उपाध्यक्षः गङ्गाप्रसादयादवः, प्रान्त-सहमन्त्री मनोजपोददारः, प्रान्तसङ्गठन-मन्त्री चित्ररञ्जनकुमारः, सुनीलगुप्तः, रामस्वरूपरुङ्गटा, डॉ. एच.पी.नारायणः, स्वामीदिव्यानन्दः, पूर्वसांसदः प्रो. यदुनाथ-पाण्डेयः इत्यादयः झारखण्डस्य विभिन्नेभ्यः जनपदेभ्यः विहिप्-पदाधिकारिणः कार्य-कर्तारश्च बहुसङ्ख्यया उपस्थिताः आसन्।

Hindusthan Samachar / Divya Ranjan