— मन्त्रिणा सारङ्गेन एशियाईक्रीडासु स्वर्णपदकविजेत्र्या क्रिकेट-क्रीडिकया क्रान्तिगौड: इत्यनया सह कृतं मिलनम्

भोपालम्, ४ अक्टोबरमासः (हि.स.)। मध्यप्रदेशस्य सहकारिता-क्रीडा-युव-कल्याणमन्त्री विश्वास-कैलाश-सारङ्गः अवदत् यत् प्रदेशस्य कन्या क्रान्तिगौड: स्वप्रतिभया, कठिनपरिश्रमेण दृढ-सङ्कल्पेन च एशियाईक्रीडासु स्वर्णपदकं विजित्य सम्पूर्णे विश्वे प्रदेशस्य गौरवं वर्धितवती। प्रदेशस्य एकस्मात् लघुग्रामात् उद्गत्य अन्ताराष्ट्रियस्तरे देशस्य प्रतिनिधित्वं कृत्वा स्वर्णपदकस्य प्राप्तिः तस्याः असाधारणप्रतिभायाः अथक-परिश्रमस्य च प्रमाणम् अस्ति। क्रान्ति-गौड इत्यस्याः एषा उपलब्धिः मध्यप्रदेशस्य लक्षशः कन्याभ्यः प्रेरणादायिनी अस्ति।

मन्त्री सारङ्गः रविवासरे राजधानी-भोपालनगरे एशियाईक्रीडा-२०२६ मध्ये महिलाक्रिकेट-क्रीडायां स्वर्णपदकं विजित्य देशस्य मध्यप्रदेशस्य च गौरवं वर्धितवत्या प्रदेशस्य प्रतिभाशालिन्या क्रिकेट-क्रीडिकया क्रान्तिगौड इत्यनया सह अमिलत्। मिलनसमये मन्त्री सारङ्गः तस्यै उत्कृष्टोपलब्धेः कृते शुभकामनाः अयच्छत् तथा च तस्याः उज्ज्वलभविष्यस्य कामनाम् अकरोत्। मन्त्री सारङ्गः अवदत् यत् क्रान्तिगौडया सिद्धं कृतं यत् प्रतिभायाः परिश्रमस्य च बलेन प्रदेशस्य कन्याः कस्यामपि उन्नतिं प्राप्तुं शक्नुवन्ति। तस्याः सफलता प्रदेशस्य अन्यान् युवाक्रीडकान् अपि महत्स्वप्नानि द्रष्टुं तानि च साकारं कर्तुं प्रेरयिष्यति।

भारतीयक्रीडकैः देशस्य गौरवं वर्धितम्

मन्त्री सारङ्गः अवदत् यत् एशियाईक्रीडासु भारतीयक्रीडकैः उत्कृष्टं प्रदर्शनं कृत्वा देशस्य गौरवं वर्धितम्। क्रीडकानां परिश्रमेण, समर्पणेन उत्कृष्टप्रदर्शनेन च त्रिरङ्गस्य गौरवं अधिकं वर्धितम्। मन्त्री सारङ्गः अवदत् यत् प्रदेशे क्रीडाप्रतिभाभ्यः उत्तमावसरान्, आधुनिकक्रीडासंरचनां आवश्यकसुविधाश्च प्रदातुं निरन्तरं कार्यं क्रियमाणम् अस्ति, येन प्रदेशस्य क्रीडकाः राष्ट्रिय-अन्ताराष्ट्रियस्तरेषु उत्कृष्टं प्रदर्शनं कर्तुं शक्नुयुः। मन्त्री सारङ्गः अवदत् यत् क्रान्तिगौडासदृशाः प्रतिभाः मध्यप्रदेशस्य नूतनक्रीडाशक्तेः परिचायकाः सन्ति। प्रदेशस्य लघुनगरेभ्यः ग्रामेभ्यश्च उद्गताः क्रीडकाः अद्य अन्ताराष्ट्रियमञ्चे स्वप्रतिभायाः प्रदर्शनं कुर्वन्ति। एतत् मध्यप्रदेशे वर्धमानस्य क्रीडावातावरणस्य क्रीडकान् प्रति च सर्वकारस्य प्रति-बद्धतायाः परिणामः अस्ति।

Hindusthan Samachar / Divya Ranjan