Enter your Email Address to subscribe to our newsletters
- श्रीनारायणसंस्कृतमहाविद्यालयस्य नवनिर्मितं भवनं दृष्ट्वा राजनाथसिंहः प्रसन्नतां व्यक्तवान्।
- योगिसर्वकारस्य संरक्षणे शासनव्यवस्था सनातनव्यवस्था च उभे अपि उत्कर्षं प्राप्नुतः — रक्षामन्त्री।
अयोध्या, ०५ अक्टोबरमासः (हि.स.)। रक्षामन्त्री राजनाथसिंहः सोमवासरे रामनगरीम् अयोध्याम् आगत्य उदासीनऋषिआश्रमस्य राणोपालीस्थे श्रीगुरुपर्वमहामहोत्सवे सन्तसम्मेलने च सम्मिलितवान्। अस्मिन् अवसरे आयोजिते सन्तसम्मेलने समारोहस्य च सम्बोधनं कुर्वन् सः अवदत् यत् उदासीनपरम्परा सनातनधर्मस्य सा जीवन्मयी धारा अस्ति, या शताब्देभ्यः भारतस्य आध्यात्मिकचेतनां पोषयन्ती अस्ति।
अयोध्यां प्राप्तस्य राजनाथसिंहस्य हनुमानगढ्यां श्रीराममन्दिरे च दर्शनपूजनम् अभवत्। उदासीनाश्रमे सन्तैः राजनाथसिंहस्य माल्यार्पणेन अङ्गवस्त्रप्रदानेन च स्वागतं कृतम्।
सः अवदत् यत् भारतस्य सभ्यतायाः एकं महत्त्वपूर्णं वैशिष्ट्यम् एतत् आसीत् यत् अत्र ज्ञानं केवलं पुस्तकेषु सीमितं न स्थापितम्। ज्ञानं परम्परा अभवत्। सा परम्परा संस्कारः अभवत्, ततः संस्कारः शिक्षामाध्यमेन समाजस्य आचरणे अवतरितः।
शिक्षा कस्यापि सभ्यतायाः मेरुदण्डः भवति। यदा च शिक्षायाः माध्यमं संस्कृतमिव देवभाषा भवति, तदा तस्याः महत्त्वम् अधिकमेव वर्धते। अद्य यत् श्रीनारायणसंस्कृतमहाविद्यालयं मया दृष्टम्, तस्य स्थापना १९१२ तमे वर्षे बाबा श्रीकेशवरामजीमहाराजेन कृता आसीत्। एतत् हर्षस्य विषयः अस्ति यत् तां परम्परां अद्यापि अत्रत्याः सन्ताः आचार्याश्च निर्वहन्ति।
अहं अस्मिन् अवसरे श्रीमन्तं डॉ. स्वामी भरतदासजीमहाराजं हृदयेन अभिनन्दामि। तस्य नेतृत्वे अयम् आश्रमः निरन्तरं प्रगतिपथे अग्रसरः अस्ति। एषा सम्पूर्णा परम्परा संस्कृतेः महत्त्वपूर्णम् आधारं धारयति।
संस्कृतं केवलं भाषारूपेण न अवगन्तव्यम्। संस्कृते भारतस्य ज्ञानपरम्परायाः विशालः निधिः विद्यते। वेदेभ्यः उपनिषत्सु पर्यन्तम्, दर्शनात् व्याकरणपर्यन्तम्, आयुर्वेदात् गणितपर्यन्तम्, ज्योतिषः साहित्यपर्यन्तम्, न्यायात् मीमांसापर्यन्तं भारतीयज्ञानपरम्परायाः विशालः भागः संस्कृतस्य माध्यमेन संततेः संततिं प्रति अग्रे प्रवाहितः, तथा च अनेन विश्वस्य बौद्धिकपरम्पराः समृद्धाः कृताः।
रक्षामन्त्री राजनाथसिंहः अवदत् यत् सः योगी आदित्यनाथस्य सर्वकारं प्रति प्रदेशस्य सर्वेषु विद्यालयेषु वैदिकगणितस्य पठनस्य आग्रहं करिष्यति। सः अवदत् यत् योगिसर्वकारस्य संरक्षणे शासनव्यवस्था सनातनव्यवस्था च उभे अपि उत्कर्षं प्राप्नुतः।
राजनाथसिंहः अयोध्यां केवलं भौगोलिकस्थानरूपेण न, अपि तु चेतनायाः संस्कृतेः सभ्यतायाश्च केन्द्ररूपेण वर्णितवान्। सः अवदत् यत् भगवान् श्रीरामः अयोध्यायाः भूमिं पवित्रां कृतवान् तथा च अत्रतः धर्मस्य न्यायस्य मर्यादायाश्च सन्देशः सम्पूर्णे विश्वे प्रसारितः।
श्रीनारायणसंस्कृतमहाविद्यालयस्य नवनिर्मितं भवनं दृष्ट्वा राजनाथसिंहः प्रसन्नतां व्यक्तवान्। आचारसंहितायाः कारणात् सः भवनस्य उद्घाटनं कर्तुं न अशक्नोत्।
राममन्दिरान्दोलने सन्तानां योगदानं स्मरन् सः अवदत् यत् सन्तैः कारागारस्य यातनाः सोढाः, बलिदानानि च दत्तानि। अतः तेषां त्यागः सर्वदा स्मरणीयः भविष्यति।
केन्द्रीयः रक्षामन्त्री राजनाथसिंहः संस्कृतं देवभाषां अध्यात्मस्य च भाषां वर्णयन् वैदिकगणितस्य विशेषतां प्रतिपादितवान्। सः अवदत् यत् लण्डनस्कूल् आफ् इकोनॉमिक्स् इत्यत्रापि वैदिकगणितस्य अध्ययनम् अध्यापनं च भवति।
Hindusthan Samachar / Dheeraj Maithani