Enter your Email Address to subscribe to our newsletters
नाहनम्, 07 अक्तूबरमासः (हि.स.)।प्रधानमन्त्रिणः नरेन्द्रमोदिनः सार्वजनिकजीवने पञ्चविंशतिवर्षपूर्त्युपलक्ष्ये भाजपया प्रदेशव्यापिनः सञ्चालितस्य विशेषस्य ‘सेवासङ्कल्पाभियानस्य’ अन्तर्गतं बुधवासरे सिरमौरजनपदस्य नाहनस्थे बर्मापापडीनगरे ‘विकसितभारतसङ्कल्पसेवाज्योतियात्रायाः’ आयोजनं कृतम्। कार्यक्रमे भाजपायाः प्रदेशाध्यक्षः डॉ. राजीवबिन्दलः मुख्यातिथिरूपेण सहभागितां कृतवान्।
अस्मिन् अवसरे माध्यमप्रतिनिधिभिः सह सम्भाषमाणः डॉ. राजीवबिन्दलः उक्तवान् यत् ‘सेवाज्योतियात्रायाः’ उद्देश्यं प्रधानमन्त्रिणः नरेन्द्रमोदिनः नेतृत्वे केन्द्रसर्वकारेण सम्पादितानि विकासकार्याणि जनकल्याणकारीयोजनाश्च समाजस्य अन्तिमव्यक्तिपर्यन्तं प्रापयितुम् अस्ति। तेन उक्तं यत् भाजपाकार्यकर्तारः ग्रामं ग्रामं गत्वा जनान् केन्द्रसर्वकारस्य योजनानां विषये जागरूकान् कुर्वन्ति तथा २०४७ तमवर्षपर्यन्तं भारतं विकसितराष्ट्रं कर्तुं यः सङ्कल्पः अस्ति, तं जनजनपर्यन्तं प्रापयन्ति।
डॉ. बिन्दले उक्तं यत् प्रधानमन्त्री नरेन्द्रमोदिनः सार्वजनिकजीवनं प्रशासनिककार्यकालश्च राष्ट्रसेवायै समर्पितः अभवत्। तेन उक्तं यत् सार्वजनिकजीवनस्य पञ्चविंशतिवर्षीयः तस्य कार्यकालः देशस्य इतिहासे स्वर्णाक्षरैः अङ्कितः भविष्यति। तस्य नेतृत्वे भारतं वैश्विकस्तरे स्वस्य सुदृढं परिचयं निर्मितवान् तथा देशः विश्वस्य प्रमुखशक्तिरूपेण उदितः अस्ति।
तेन सूचितं यत् प्रधानमन्त्री नरेन्द्रमोदिनः जन्मदिवसात् १७ सितम्बरतः प्रारब्धम् ‘सेवासङ्कल्पाभियानम्’ १७ अक्टोबरपर्यन्तं प्रवर्तिष्यते। अस्य अवधौ भाजपाकार्यकर्तृभिः विभिन्नानि सेवाकार्याणि जनसम्पर्ककार्यक्रमाश्च आयोजिताः भवन्ति। एतेषां कार्यक्रमाणां माध्यमेन केन्द्रसर्वकारस्य उपलब्धीनां योजनानां च सूचना जनानां पर्यन्तं प्राप्यते, समाजसेवासम्बद्धानि कार्याणि च सम्पाद्यन्ते।
Hindusthan Samachar / Dheeraj Maithani