Enter your Email Address to subscribe to our newsletters
लखनऊ, 08 अक्टूबरमासः (हि.स.)।मुख्यमंत्री योगी आदित्यनाथः गुरुवासरे ‘मुख्यमन्त्री समीक्षा’ इत्यस्य अष्टमायां उच्चस्तरीयसभायां विकासपरियोजनानां, औद्योगिकनिवेशस्य, ऊर्जाक्षेत्रस्य, कौशलविकासस्य, श्रमिककल्याणस्य, जनकल्याणकारीयोजनानां च प्रगतेः समीक्षां कृतवान्। मुख्यमंत्री अवदत् यत् प्रदेशे प्रचलिताः बृहत्परियोजनाः केवलं प्रक्रियासु सीमिताः न भवेयुः, अपि तु ताः समयबद्धरीत्या धरातले कार्यरूपेण परिणताः करणीयाः।
मुख्यमन्त्रिणा मण्डीषु कृषकेभ्यः उत्तमसुविधानां प्रदाने निर्देशाः प्रदत्ताः। सः अवदत् यत् मण्डीषु समुचितस्वच्छताव्यवस्था भवेत्, जलावरोधस्य स्थितिः न जायेत तथा च कृषकाः स्वकीयाम् उपजां नीत्वा कस्यापि प्रकारस्य असुविधां न प्राप्नुयुः। मण्डीपरिसराणां नियमितनिरीक्षणं तथा आवश्यकव्यवस्थानां सुनिश्चितीकरणं करणीयम्।
सः अवदत् यत् अपरमुख्यसचिवस्तरीयाः अधिकारिणः भवन्तु अथवा क्षेत्रेषु नियुक्ताः अधिकारिणः, औद्योगिकस्य आधारभूतसंरचनाविकासस्य च परियोजनानां प्राथमिकतया शीघ्रं पूर्णता सुनिश्चितं कुर्युः। भूमिग्रहणम्, अनुमोदनम्, निविदा तथा विभागान्तरसमन्वयसम्बद्धानां बाधानां तत्कालं समाधानं करणीयम्।
द्रुतमार्गपरियोजनानां समीक्षायां ज्ञातं यत् चित्रकूटसम्बद्धद्रुतमार्गस्य कृते चतस्रः निविदाः प्राप्ताः सन्ति तथा च अक्तूबरमासे निविदाप्रक्रिया पूर्णा करिष्यते। फर्रुखाबाद, आगरा लखनऊ पूर्वाञ्चलसम्बद्ध, झाँसी तथा जेवरसम्बद्धद्रुतमार्गाणां कृते असीतितः एकनवतिप्रतिशतपर्यन्तं भूमिः उपलब्धा अभवत्। मेरठ हरिद्वार, विन्ध्य तथा विन्ध्य पूर्वाञ्चलस्परद्रुतमार्गाणां कृते सत्यापनकार्यं पूर्णम् अस्ति तथा भूमिग्रहणस्य प्रक्रिया अग्रे वर्धिता अस्ति। मुख्यमंत्री सम्बन्धितजिलाधिकारिभ्यः अद्यतनस्थितेः सूचनां गृहीत्वा अवशिष्टभूमिसम्बद्धकार्येषु तीव्रतां वर्धयितुं निर्देशान् दत्तवान्।
सभायां ग्रेटरनोएडास्थितस्य बहुविधपरिवहनतन्त्रयुक्तस्य मालवाहनकेन्द्रस्य अपि समीक्षा कृता। अत्र त्रिशतत्रयोविंशति हेक्टेयरपरिमितायाः भूमेः मध्ये त्रिशतैकहेक्टेयरपरिमितायां भूमौ अधिकारः प्राप्तः अस्ति। मुख्यमंत्री औद्योगिकेषु मालवाहनसम्बद्धेषु च परियोजनासु आवश्यकप्रक्रियाः शीघ्रं पूर्णीकर्तुं निर्देशान् दत्तवान्।
महिलानां श्रमसहभागितां वर्धयितुं कार्यरतमहिलाछात्रावासानां प्रगतेः समीक्षां कुर्वन् मुख्यमंत्री तेषां निर्माणकार्ये तीव्रतां वर्धयितुं निर्देशितवान्। सः अवदत् यत् छात्रावासानां निर्माणेन सह तेषां प्रभाविसञ्चालनाय अपि उत्तमोपयोगिनी नीतिः निर्मातव्या।
शून्यदारिद्र्याभियानस्य समीक्षायां ज्ञातं यत् चिह्नितेषु द्वादशलक्षपञ्चाशत्सहस्रपरिवारेषु प्रायः नवसहस्रपरिवाराः आवासयोजनायाः पात्राः इति ज्ञाताः सन्ति। मुख्यमन्त्रिणः आवासयोजनायाः अन्तर्गतं त्रिंशत्सहस्रसप्तशतपञ्चविंशतिः आवासाः स्वीकृताः सन्ति। अभियानस्य अन्तर्गतं पात्रपरिवारान् श्रमिकपञ्जीकरणेन, आयुष्मान्पत्रेण, अन्त्योदयपत्रेण, कौशलप्रशिक्षणेन, रोजगारावसरेण च योजयितुं कार्यं प्रचलति। मुख्यमंत्री अवदत् यत् अभियाने केवलं पात्रपरिवाराणां चिह्नीकरणं पर्याप्तं नास्ति, अपि तु प्रत्येकस्मै पात्रपरिवाराय सम्बन्धितयोजनानां लाभः सुनिश्चिततया प्रदातव्यः।
अग्निसुरक्षायाः समीक्षायां मुख्यमंत्री चिकित्सालयेषु, चिकित्सामहाविद्यालयेषु, होटलेषु च वैधाग्निसुरक्षानापत्तिप्रमाणपत्रस्य सुनिश्चिततां कर्तुं निर्देशान् दत्तवान्। सः अवदत् यत् प्रमाणपत्रस्य अवधिः समाप्तेः पूर्वमेव नवीकरणप्रक्रिया पूर्णा कारयितव्या तथा अग्निसुरक्षामानकानां नियमितनिरीक्षणमपि सुनिश्चितं करणीयम्।
Hindusthan Samachar / Dheeraj Maithani