सुरक्षायै ५१८ आरक्षकाधिकारिणः, १,२०० आरक्षकाः च नियुक्ताः।

५० रूप्यकैः शुल्केन स्यूतकम्, शिरस्त्राणं च स्थाप्यते।

राञ्ची, ९ अक्टोबरमासः (हि.स.)। भारत-वेस्टइण्डीसमयोः द्वितीयां टी-२० अन्ताराष्ट्रियां क्रीडास्पर्धां प्रति राञ्चीनगरस्य जेएससीए-अन्ताराष्ट्रिय-क्रीडाङ्गणस्य परितः शुक्रवासरस्य प्रातःकालादेव क्रिकेटप्रेमिणां समूहाः समागन्तुम् आरब्धवन्तः। क्रीडास्पर्धां प्रति दर्शकेषु विशेषः उत्साहः दृश्यते। क्रीडाङ्गणस्य बहिः पथपार्श्वेषु स्थितासु आपणपङ्क्तिषु भारतीयदलस्य नील-वर्णीयक्रीडावस्त्राणां त्रिवर्णध्वजानां च याचना वर्धिता। अपरतः, क्रीडास्पर्धायाः शान्तिपूर्णतया सुरक्षिततया च आयोजनाय राञ्ची-आरक्षकप्रशासनेन व्यापकाः सुरक्षाव्यवस्थाः कृताः। क्रीडाङ्गणस्य अन्तः बहिश्च बहुसंख्यकाः आरक्षकाधिकारिणः आरक्षकाः च नियुक्ताः सन्ति।

क्रीडास्पर्धायाः पूर्वं क्रीडाङ्गणं परितः क्षेत्रं क्रिकेटमयम् इव दृश्यते। मार्गपार्श्वेषु स्थापितेषु अस्थायिषु आपणेषु भारतीय-क्रीडकाणां क्रीडावस्त्राणि, त्रिवर्णध्वजाः अन्यानि क्रिकेटसम्बद्धानि वस्तूनि च विक्रीयन्ते। दर्शकेषु स्थानीययुवक्रीडकस्य वैभवसूर्यवंशिनः ०३-सङ्ख्याङ्कित-क्रीडावस्त्रं श्रेयस-अय्यरस्य ९६-सङ्ख्याङ्कितक्रीडावस्त्रं च प्रति विशेषः उत्साहः दृश्यते। क्रीडास्पर्धां द्रष्टुम् आगच्छन्तः क्रिकेटप्रेमिणः स्वप्रिय-दलस्य क्रीडकाणां च समर्थनाय तेषां क्रीडावस्त्राणि अन्यानि वस्तूनि च क्रीणन्ति।

जेएससीए-प्रबन्धनेन स्पष्टं कृतं यत् क्रीडाङ्गणस्य प्रवेशद्वारे स्यूतकानां शिरस्त्राणानां वा स्थापनायै आधिकारिक-व्यवस्था नास्ति। अस्य लाभम् आदाय क्रीडाङ्गणस्य बहिः स्थानीयैः जनैः अस्थाय्यः आपणाः स्थापिताः सन्ति। एतेषु आपणेṣu दर्शकेभ्यः प्रत्येकस्य स्यूतकस्य शिरस्त्राणस्य वा स्थापनायै ५० रूप्यकाणि शुल्करूपेण गृह्यन्ते।

जेएससीए-संस्थानस्य अनुसारं दर्शकानां प्रवेशाय क्रीडाङ्गणस्य द्वाराणि अपराह्णे त्रिवादनात् उद्घाटयिष्यन्ते। क्रीडाङ्गणे प्रवेशाय वैधं प्रवेशपत्रम् अनिवार्यम् अस्ति। बालानां नवजातशिशूनां च कृते अपि प्रवेशपत्रं क्रेतव्यम् अस्ति। प्रवेशपत्रं विना कस्मैचित् दर्शकाय प्रवेशस्य अनुमतिः न भविष्यति।

सुरक्षायाः व्यवस्थायाश्च रक्षणाय क्रीडाङ्गणस्य अन्तः बहूनां वस्तूनां नयनं निषिद्धम् अस्ति। दर्शकाः जलपात्राणि, मुद्राः, सिगरेट्-प्रज्वालकानि, शिरस्त्रा-णानि, स्यूतकानि, डीएसएलआर-चित्रग्राहकयन्त्राणि खाद्यपेयवस्तूनि च नीत्वा प्रवेशं कर्तुं न शक्ष्यन्ति। अपि च, दर्शकैः स्वनिर्धारिते विभागे एव स्थातव्यम्। एकस्मात् विभागात् अन्यस्मिन् विभागे गमनस्य अनुमतिः न भविष्यति।

दर्शकानां सुविधायै एम.एस.धोनी-क्रीडकमण्डपस्य, माध्यमप्रतिनिधीनां कक्षस्य, विभिन्नविभागानां च दिशि गच्छत्सु मार्गेषु अवरोधकवेष्टनानि स्थापितानि सन्ति। तथैव विभिन्नस्थानेषु दिशासूचकफलकानि स्थापितानि सन्ति, येन दर्शकाः स्वनिर्धारितासनेषु सरलतया प्राप्नुयुः।

क्रीडास्पर्धायाः सुरक्षाव्यवस्था द्वयोः स्तरयोः विभक्ता अस्ति। समग्रतया ५१८ आरक्षकाधिकारिणः १,२०० आरक्षकाः च नियुक्ताः सन्ति। क्रीडाङ्गणस्य अन्तः आसन्दिपङ्क्तिषु, क्रीडकमण्डपेषु, संवेदनशीलदीर्घासु च ३३५ आरक्षकाधि-कारिभिः सह ८५० आरक्षकाः नियुक्ताः भविष्यन्ति। एते सुरक्षाकर्मिणः दर्शकाणां गतिविधिषु दृष्टिं स्थापयिष्यन्ति तथा जनसमूहस्य नियन्त्रणं सुरक्षाव्यवस्थां च सम्हालिष्यन्ति।

क्रीडाङ्गणस्य बाह्यपरिसरे, वाहनस्थापन-स्थलेषु, परीक्षणार्थं स्थापितेषु अवरोधक-स्थानेषु प्रमुखचतुष्पथेषु च १८३ आरक्षकाधिकारिणः ३५० आरक्षकाः च नियुक्ताः सन्ति। महिलादर्शकानां सुरक्षायै तासां परीक्षणाय च ४०० महिला-आरक्षकाः अपि नियुक्ताः सन्ति।

सम्पूर्णसुरक्षाव्यवस्थायाः निरीक्षणम् अतिरिक्तमहानिदेशकः करोति। क्रीडाङ्ग-णस्य अन्तः बहिश्च प्रवेशपरीक्षणे, जनसमूहप्रबन्धने, विशिष्टव्यक्तीनां गमनागमने च विशेषं ध्यानं दीयते।

राञ्चीनगरस्य वरिष्ठारक्षकाधीक्षकः राकेशरञ्जनः अवदत् यत् भारत-वेस्टइण्डीसमयोः क्रीडास्पर्धां दृष्ट्वा रेडिसन ब्लू-होटलात् आरभ्य जेएससीए-अन्ताराष्ट्रियक्रीडाङ्गणपर्यन्तं कठोराः सुरक्षाव्यवस्थाः कृताः सन्ति। पर्याप्तसङ्ख्यायाम् आरक्षकाधिकारिणः आरक्षकाः च नियुक्ताः सन्ति। क्रीडास्पर्धां द्रष्टुम् आगच्छन्तः दर्शकाः कस्यामपि असुविधायां न पतन्तु तथा सम्पूर्णम् आयोजनं शान्तिपूर्णतया सम्पन्नं भवेत् इति आरक्षकप्रशासनस्य प्रयासः अस्ति।

क्रीडास्पर्धां प्रति क्रिकेटप्रेमिणाम् उत्साहस्य मध्ये आरक्षकप्रशासनेन सुरक्षायै, यातायातनियन्त्रणाय, दर्शकसुविधायै च प्राथमिकता प्रदत्ता अस्ति। क्रीडाङ्गणे प्रवेशात् आरभ्य दर्शकानां स्वासनेषु प्राप्तिपर्यन्तं तथा क्रीडास्पर्धायाः समाप्त्य-नन्तरं सुरक्षितनिर्गमनपर्यन्तं सर्वासु व्यवस्थासु सततं दृष्टिः स्थाप्यते।

Hindusthan Samachar / Divya Ranjan