नवदिल्ली, ९ अक्टोबरमासः (हि.स.)। पुरुषाणां हीरो-एशियाई-चैम्पियन्स-चषकस्य पञ्जाब-२०२६ इत्यस्य स्पर्धानां कार्यक्रमः शुक्रवासरे एशियाई-हॉकी-महासङ्घेन घोषितः। लीग्-चरणस्य स्पर्धाः अक्टोबरमासस्य २७ दिनाङ्कात् नवम्बरमासस्य २ दिनाङ्कपर्यन्तं जालन्धरनगरे भविष्यन्ति। सेमीफाइनल्-स्पर्धाः पदकस्पर्धाश्च नवम्बरमासस्य ४ तथा ५ दिनाङ्कयोः मोहालीनगरे आयोजयिष्यन्ते।

प्रतियोगितायाः स्पर्धाः जालन्धरस्य ओलम्पियन-सुरजीतसिंह-हॉकी-क्रीडाङ्गणे तथा मोहालीस्थे ओलम्पियन-बलबीरसिंह-वरिष्ठ-अन्ताराष्ट्रिय-हॉकी-क्रीडाङ्गणे भविष्यन्ति। प्रतियोगितायाः उद्घाटनसमारोहः अक्टोबरमासस्य २७ दिनाङ्के भविष्यति। ततः अनन्तरमेव भारतं बाङ्गलादेशस्य विरुद्धं स्पर्धमानेन स्वस्य अभियानस्य आरम्भं करिष्यति।

भारतस्य सर्वाः लीग्-स्पर्धाः सायं सप्तवादने

प्रतियोगितायां भारतं, मलेशिया, जापानम्, दक्षिणकोरिया, चीनं तथा बाङ्गलादेशः भागं ग्रहीष्यन्ति। षट् अपि दलानि लीग्-चरणे परस्परं स्पर्धिष्यन्ते। प्रत्येकं दलं पञ्च स्पर्धाः क्रीडिष्यति। अङ्कतालिकायाः शीर्षस्थाने विद्यमानानि चत्वारि दलानि सेमीफाइनल्-स्पर्धायै अर्हतां प्राप्स्यन्ति।

भारतीयदलम् स्वस्य सर्वाः लीग्-स्पर्धाः भारतीयसमयानुसारं सायं सप्तवादने क्रीडिष्यति। भारतीयदलम् अक्टोबर-मासस्य २७ दिनाङ्के बाङ्गलादेशेन सह, २९ दिनाङ्के चीनदेशेन सह, ३० दिनाङ्के जापानेन सह तथा नवम्बरमासस्य १ दिनाङ्के मलेशियया सह, २ दिनाङ्के च दक्षिणकोरियया सह स्पर्धिष्यते। प्रतियोगितायां अक्टोबर-मासस्य २८ तथा ३१ दिनाङ्कयोः, नवम्बरमासस्य ३ दिनाङ्के च विश्रामदिवसाः भविष्यन्ति। सेमीफाइनल्-स्पर्धाः नवम्बरमासस्य ४ दिनाङ्के तथा कांस्यपदकस्य स्वर्णपदकस्य च स्पर्धाः ५ दिनाङ्के भविष्यन्ति।

भारतं विजितोपाधेः रक्षणाय अवतरिष्यति

भारतं प्रतियोगितायाः सर्वाधिकोपाधि-विजेतृदलं वर्तते। भारतीयदलेन २०११, २०१६, २०१८ (पाकिस्तानदलेन सह संयुक्तविजेता), २०२३ तथा २०२४ वर्षेषु उपाधिः विजिता। पञ्चवारं विजेतृपदं प्राप्तं भारतीयदलं सम्प्रति जापाने आयोजिते एशियाई-क्रीडामहोत्सवे निरन्तरं द्वितीयवारं स्वर्णपदकं विजित्य प्रत्यागतम् अस्ति। प्रतियोगितायां सर्वाधिकं वरीयताप्राप्त-दलरूपेण अवतरन् भारतं स्वदेशीय-दर्शकानां समक्षम् अन्याम् एकाम् उपाधिं विजेतुं प्रयासं करिष्यति।

पञ्जाबराज्यं भारतीय-हॉकी-क्रीडायाः प्रतिभानां प्रमुखं केन्द्रं मन्यते। अस्मात् राज्यात् देशाय अनेकाः प्रख्याताः हॉकी-क्रीडकाः प्राप्ताः सन्ति। अतः पञ्जाबे अन्ताराष्ट्रिय-हॉकी-क्रीडायाः पुनरागमनेन स्थानीयप्रशंसकानां शीर्षस्तरीयाः स्पर्धाः द्रष्टुम् अवसरः प्राप्स्यते।

हॉकी-इण्डियादलस्य उत्साहः प्रकटितः

हॉकी-इण्डियादलस्य अध्यक्षः डॉ. दिलीप-टिर्की अवदत्, “स्पर्धानां कार्यक्रमस्य घोषणया हीरो-एशियाई-चैम्पियन्स-चषक-पञ्जाब-२०२६ इत्यस्य विषये उत्साहः अधिकः वर्धितः। एशियायाः विभिन्नदलानां पञ्जाबे स्वागतं कर्तुं वयं प्रसन्नाः स्मः। उच्चस्तरीयाः हॉकी-स्पर्धाः द्रष्टुं वयं उत्सुकाः स्मः।”

हॉकी-इण्डियायाः महासचिवः भोला-नाथ-सिंहः अवदत्, “कार्यक्रमस्य घोषणया सह प्रतियोगितायाः प्रतीक्षायाः गणना आरब्धा। भागं ग्रहीतुं समागतानां देशानां स्वागतं कर्तुं तथा पञ्जाबस्य क्रीडानुरागम् आतिथ्यभावं च प्रदर्शयितुं हॉकी-इण्डिया गौरवान्विता अस्ति। वयं रोमाञ्चकारीं प्रतिस्पर्धापूर्णां च प्रतियोगिताम् अपेक्षामहे। एषा प्रतियोगिता प्रशंसकान् क्रीडायाः अधिकं समीपम् आनेष्यति तथा प्रत्येकं दलाय उच्चतमस्तरे प्रदर्शनस्य अवसरं प्रदास्यति।”

Hindusthan Samachar / Divya Ranjan