वाराणसी, 09 अक्टूबरमासः (हि.स.)। शारदीयनवरात्रोत्सवे काश्यां शङ्कराचार्यस्वामिनः अविमुक्तेश्वरानन्दसरस्वत्याः सान्निध्ये नवचण्डीपाठः भविष्यति, गौमातुः राष्ट्रमातृपदप्राप्तये सङ्कल्पः स्वीकरिष्यते।

उत्तरप्रदेशस्य धार्मिकनगरी काश्यां शङ्कराचार्यघाटे स्थिते श्रीविद्यामठे शारदीयनवरात्रोत्सवस्य सज्जताः प्रारब्धाः सन्ति। अक्टोबरमासस्य एकादशदिनाङ्कतः विंशतिदिनाङ्कपर्यन्तम् आयोजिते अस्मिन् उत्सवे ज्योतिष्पीठाधीश्वरस्य जगद्गुरोः शङ्कराचार्यस्वामिनः अविमुक्तेश्वरानन्दसरस्वत्याः सान्निध्ये विविधाः धार्मिकानुष्ठानाः सम्पन्नाः भविष्यन्ति। अस्मिन् अवसरे गौमातुः राष्ट्रमातृत्वपदप्राप्तये गोवंशस्य प्राणानां रक्षायै च सङ्कल्पेन वैदिकाचार्यैः नवचण्डीपाठः क्रियते।

शुक्रवासरे शङ्कराचार्यस्य प्रवक्ता तथा सञ्चारमाध्यमप्रभारी सञ्जयपाण्डेयः एतां सूचनां दत्तवान्। तेन उक्तं यत् आश्विनमासस्य शुक्लप्रतिपदातः नवमीपर्यन्तं श्रीविद्यामठे नवरात्रस्य विशेषानुष्ठानानि आयोजयिष्यन्ते। अस्मिन् काले शङ्कराचार्यस्वामी अविमुक्तेश्वरानन्दसरस्वती प्रतिदिनं भगवत्याः राजराजेश्वर्याः त्रिपुरसुन्दर्याश्च विशेषपूजनम् अर्चनं च करिष्यति। एतदतिरिक्तं श्रीविद्यासाधनाशिबिरस्य आयोजनमपि भविष्यति, यस्मिन् देशस्य विभिन्नभागेभ्यः शङ्कराचार्येण दीक्षिताः शिष्याः सन्ताश्च सम्मिलिताः भविष्यन्ति।

### वैदिकमन्त्रघोषस्य मध्ये नवचण्डीपाठः भविष्यति

नवरात्रोत्सवस्य समये प्रतिदिनं प्रातः अष्टवादनात् काश्याः श्रेष्ठैः वैदिकाचार्यैः मार्गदर्शितः नवचण्डीपाठः क्रियते। गौमातुः राष्ट्रमातृत्वपदप्राप्तये गोवंशस्य संरक्षणाय च एतदनुष्ठानं सम्पन्नं भविष्यति। एतदतिरिक्तं प्रतिदिनं शङ्कराचार्यस्य सान्निध्ये श्रीविद्यासाधनायाः धार्मिकाध्ययनस्य च कार्यक्रमाः आयोजयिष्यन्ते।

### पूजनं, शास्त्रपाठः, प्रवचनं च आयोजयिष्यते

मठस्य सञ्चारमाध्यमप्रभारिणः अनुसारं प्रतिदिनं प्रातः सार्धसप्तवादनतः अष्टवादनपर्यन्तं श्रीविद्यायाः अध्ययनं भविष्यति। ततः प्रातः अष्टवादनात् सार्धनववादनपर्यन्तं शङ्कराचार्यस्य सान्निध्ये प्रस्थानत्रय्याः पाठः सम्पन्नः भविष्यति।

प्रातः पौनेदशवादने श्रीविष्णोः पूजनानन्तरं मध्याह्नद्वादशवादनतः सायं चतुर्वादनपर्यन्तं भगवत्याः त्रिपुरसुन्दर्याः विशेषपूजनार्चनं भविष्यति। अस्मिन् काले प्रतिदिनं नवभिः द्रव्यैः भगवत्याः अर्चनं क्रियते।

तेन सूचितं यत् सायं पञ्चवादनतः शङ्कराचार्यस्वामी अविमुक्तेश्वरानन्दसरस्वती भगवत्याः लीलाम् आश्रित्य प्रवचनं प्रदास्यति। ततः सायं सप्तवादने भगवत्याः महाआरती भविष्यति।

नवरात्रोत्सवस्य काले श्रीविद्यामठे धार्मिकानुष्ठानैः, वैदिकपाठैः, साधनया, प्रवचनैश्च भक्तिमयं वातावरणं निर्मितं भविष्यति।

Hindusthan Samachar / Dheeraj Maithani