पूर्वी सिंहभूमः, 10 नवंबरमासः (हि.स.)।

कदमा मुख्यमार्गस्थिते श्रीश्रीरङ्किणीमन्दिरे मङ्गलवासरे अन्नकूटमहोत्सवः श्रद्धया, भक्त्या धार्मिकश्रद्धया च आचरितः।

अन्नकूटमहोत्सवस्य समये मन्दिरपरिसरः मातुः अन्नपूर्णायाः जयघोषैः भक्तिमयेन वातावरणेन च गुज्जितः अभवत्। बहुसङ्ख्यकाः श्रद्धालवः मन्दिरम् आगतवन्तः तथा मातुः रङ्किण्याः अन्नपूर्णायाश्च पूजाऽर्चनां कृत्वा सुखशान्तिसमृद्धीनां कामनां कृतवन्तः।

धार्मिकमान्यतानुसारम् अन्नकूटमहोत्सवे अन्नं मातुः अन्नपूर्णायाः स्वरूपं मत्वा तस्य पूजनं क्रियते। एतामेव भावनाम् अनुसृत्य मन्दिरे छप्पनप्रकारकाणां व्यञ्जनानां भोगः सज्जीकृत्य विधिविधानपूर्वकं मातुः अन्नपूर्णायै समर्पितः। भोगसमर्पणानन्तरं श्रद्धालूनां मध्ये प्रसादस्य वितरणं कृतम्। मान्यता अस्ति यत् अन्नकूटस्य पवित्रप्रसादस्य सेवनं कृत्वा मातुः अन्नपूर्णायाः कृपा प्राप्यते तथा परिवारे सुखसमृद्धिश्च तिष्ठति। श्रद्धालवः एतं प्रसादं मातुः आशीर्वादं मत्वा गृह्णन्ति।

मन्दिरप्रबन्धनानुसारम् अन्नकूटमहोत्सवस्य परम्परा विगतेभ्यः ३२ वर्षेभ्यः निरन्तरं प्रचलति। प्रतिवर्षमिव अस्मिन् वर्षेऽपि सहस्रशः श्रद्धालवः महोत्सवे सम्मिलिताः। श्रद्धालुभिः मातुः दर्शनं कृत्वा पूजाऽर्चना कृता तथा अन्नकूटप्रसादः गृहीतः।

श्रीश्रीरङ्किणीमन्दिरस्य महासचिवः जनार्दनपाण्डेयः अवदत् यत् मन्दिरस्य धार्मिकपरम्पराः बहुवर्षेभ्यः श्रद्धालूनाम् आस्थायाः केन्द्रं सन्ति। तेन उक्तं यत् रङ्किणीमन्दिरस्य स्थापना अभवत् प्रायः ५० वर्षाणि व्यतीतानि। मातुः रङ्किण्याः प्रति जमशेदपुरस्य एव न, अपितु समीपवर्तिक्षेत्राणां जनानाम् अपि गहनश्रद्धा अस्ति। विभिन्नेषु पर्वसु धार्मिकायोजनेषु च अत्र दूरस्थेभ्यः क्षेत्रेभ्यः श्रद्धालवः आगच्छन्ति।

अन्नकूटमहोत्सवस्य समये मन्दिरे विशेषपूजाऽर्चनया, भोगसमर्पणेन प्रसादवितरणेन च धार्मिकानुष्ठानं सम्पन्नम्। श्रद्धालुभिः मातुः अन्नपूर्णायाः समीपे सर्वेषां जीवने अन्नस्य, धनस्य, सुखशान्तेः समृद्धेश्च निरन्तरं स्थितये प्रार्थना कृता।

---------------

Hindusthan Samachar / Dheeraj Maithani